Klei Aê Diê Blŭ: Y-Yôsuê 2:12-24
Êlan kliăng: “Leh anăn lui hdĭp amĭ ama, ayŏng adei amai adei kâo, leh anăn jih jang phung mbĭt hŏng diñu, leh anăn bi mtlaih hmei mơ̆ng klei djiê.” (Y-Yôsuê 2:13)
Klei êmuh ksiêm mĭn: Ya klei H’Rahap akâo kơ phung knuă kat asei? Klei anei brei ƀuh si ai tiê ñu hŏng găp djuê hlăm gŏ sang? Ya drei ngă čiăng đru kơ găp djuê pô mâo klei bi mtlaih?
Tơdah ƀuh dua čô knuă Israel nao ti Yêrikô snăn H’Rahap đăo phung Israel dơ̆ng mă leh ƀuôn anei. Ñu đăo Aê Diê phung Israel jing Aê Diê kơ jih lăn ala êngĭt adiê
(Y-Yôsuê 2:11) srăng bi blah kơ diñu kyua Ñu brei leh kơ diñu ƀuôn prŏng anei. Aê Diê bi khuôt Êa Ksĭ Hrah kơ phung ƀuôn sang Israel găn, leh anăn đru diñu dưi bi mdjiê dua čô mtao phung Amôrit, ăt srăng đru diñu mâo mă ƀuôn Yêrikô. Ñu đăo knŏng hjăn sa klei anăn čiăng amâo luč ram jing tui duah klei Yêhôwa Aê Diê pap, leh anăn anei jing sa klei bi knăl kơ klei đăo. Klei đăo sĭt amâo djŏ knŏng dôk jing klei đăo kơ Aê Diê Pô myang ôh ƀiădah brei lŏ dơ̆ng tui duah klei dôk kđap ti gŭ siap myang Ñu. H’Rahap amâo djŏ knŏng huĭ ti anăp klei myang Aê Diê ngă ôh (Y-Yôsuê 2:9-11), ƀiădah gơ̆ lŏ đăo Aê Diê jing Aê Diê bŏ hŏng klei pap, klei khăp kơ phung êran nao kơ Ñu.
H’Rahap akâo kơ phung knuă kat asei hŏng Yêhôwa Aê Diê ƀuăn srăng “lui hdĭp amĭ ama, ayŏng adei amai adei kâo, leh anăn jih jang phung mbĭt hŏng diñu, leh anăn bi mtlaih hmei mơ̆ng klei djiê” (êlan 13). Tơdah akâo snăn, ñu đăo knang Aê Diê srăng răng mgang ñu tơdah phung knuă amâo ngă klei ƀuăn leh. Phung knuă ƀuăn srăng ngă kơ ñu “klei jăk leh anăn sĭt suôr” tơdah Aê Diê brei krĭng anăn kơ diñu, knŏng čiăng ñu amâo hưn ôh kơ bruă digơ̆ ngă. Êngao anăn, ñu kă klei mrai hrah ti ƀăng bhă điêt leh anăn brei bi kƀĭn jih phung găp djuê ñu čiăng mtlaih hlăm sang ñu snăn digơ̆ srăng dưi răng mgang. Ñu ƀuăn srăng ngă snăn. Leh anăn, ñu mtrŭn digơ̆ ti ƀăng bhă điêt hŏng klei bră, kyuadah sang anôk ñu dôk ti dlông arăng ngă mnư̆. Ñu lač kơ digơ̆ nao đuĕ dăp hlăm čư̆ tlâo hruê leh anăn lŏ wĭt.
H’Rahap bi êdah leh klei đăo sĭt hlăk đru phung knuă leh anăn hlăk êjai ñu đăo kơ Aê Diê jing Pô răng mgang ñu hŏng gŏ sang hlăm wưng ƀuôn sang Israel nao plah mă ƀuôn Yêrikô. Ti anăp klei luč rai dơ̆ng truh kơ ƀuôn Yêrikô, ñu amâo knŏng bi mĭn kơ klei êđăp ênang, huĭ hyưt kơ pô ôh ƀiădah lŏ bi mĭn kơ găp djuê pô. Ñu akâo kơ digơ̆ dưi hdĭp, ƀuăn srăng krơ̆ng digơ̆ hlăm sang dưi bi knăl hŏng klei mrai hrah kă ti ƀăng bhă điêt sang ñu.
Jing mnuih dưi dưn klei khăp, klei pap Khua Yang, brei drei bi mĭn kơ klei luč ram lă lar srăng truh kơ găp djuê pô tơdah diñu amâo đăo kơ Khua Yang. Brei drei wah lač leh anăn gĭr jih ai tiê đru diñu dưi mâo klei bi mtlaih hŏng klei ba diñu kơ Krist leh anăn dôk ti gŭ êyui siap myang Khua Yang. Anăn ăt jing klei bi êdah kơ klei đăo sĭt.
Si drei mđing wah lač leh anăn đru kơ găp djuê pô thâo kral Khua Yang?
Wah lač: Ơ Khua Yang, akâo kơ Ih pap brei kơ kâo leh anăn gŏ sang kâo. Akâo kơ Ih đru kâo amâo djŏ knŏng mĭn kơ pô ôh ƀiădah jih ai tiê ba Klei Mrâo Mrang Jăk Ih truh kơ găp djuê kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Galati 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
