Yausuas 2:12-24
Nqe cim:
“Thov neb coglus rau kuv hais tias, nej yuav pab kuv niam kuv txiv, kuv cov nus, kuv tej vivncaus thiab lawv tsevneeg kom dim, tsis txhob cia luag tua peb!” (Yausuas 2:13)
Lus nug xav:
– Lahaj thov cov tub soj tebchaws yuav tsum coglus yam dabtsi?
– Qhov no qhia pom Lahaj muaj lub siab li cas rau nws cov txheeb ze?
– Peb ua dabtsi los pab peb cov txheeb ze kom tau txais kev cawmdim?
Thaum uas pom cov Yixalayees ob tug tub soj tebchaws tuaj txog Yelikaus ces Lahaj ntseeg hais tias lub nroog no yeej yuav raug cov Yixalayees txeeb kom tau xwb. Nws ntseeg cov Yixalayees tus Vajtswv yog Tus tswj tagnrho lub ntuj thiab lub ntiajteb (Yausuas 2:11) Nws yuav ntaus rog rau lawv vim Nws twb muab lub nroog no rau lawv lawd. Vajtswv tau ua rau hiavtxwv qhuav qhawv rau cov Yixalayees mus dhau, thiab pab lawv tua yeej cov Amaules ob tug vajntxwv, kuj yuav pab lawv tua yeej lub nroog Yelikaus no. Lahaj ntseeg hais tias qhov uas yuav tsis raug tua pov tseg yog nrhiav tus Tswv txoj kev hlub tshua, thiab nov yog lub cim ntawm kev ntseeg. Kev ntseeg tsis yog tsuas nres ntseeg ntawm Vajtswv lub hwjchim ua txujci xwb tiamsis yuav tsum nrhiav kev nkaum hauv tus Tswv kev tiv thaiv. Lahaj tsis yog ntshai tes haujlwm ntawm Vajtswv lub hwjchim ua tau xwb (Yausuas 2:9-11), nws tseem ntseeg hais tias Vajtswv yog Tus muaj lub siab ntev thiab puv npo kev hlub rau txhua tus uas los cuag Nws.
Lahaj thov ob tug soj tebchaws tuav Vajtswv lub npe coglus hais tias “nej yuav pab kuv niam kuv txiv, kuv cov nus, kuv tej vivncaus thiab lawv tsevneeg kom dim, tsis txhob cia luag tua peb!” (nqe 13). Thaum thov li ntawd, txawm yog ob tub soj tebchaws tsis ceev nkawd tej lus cogtseg los xij, Lahaj ntseeg hais tias Vajtswv yuav tiv thaiv nws. Ob tug soj tebchaws coglus hais tias “yuav ua raws li tej lus uas…tau cog tseg” thaum uas Vajtswv muab lub tebchaws no rau lawv, tsuav yog Lahaj tsis qhia tej uas nkawd tuaj ntawd xwb. Tsis tas li ntawd, nws yuav tsum muab ib pluaj ntaub liab khi rau ntawm lub qhovrai thiab Lahaj yuavtsum coj nws niam nws txiv, nws cov nus, cov vivncaus thiab lawv tsevneeg tuaj nyob hauv nws tsev ces lawv thiaj tau txais kev tiv thaiv. Lahaj coglus yuav ua li ntawd. Lahaj lub tsev nyob npuab tus ntsa yeej uas thaiv lub nroog, nws tso hlua dauv ntawm qhovrai raws tus ntsa yeej rau sab nraud rau nkawd nqis khiav lawm. Lahaj kom nkawd khiav mus nkaum peb hnub rau pem tej roob thiab tom qab ntawd mam rov mus tsev.
Lahaj qhia tshwm kev ntseeg tseeb thaum uas pab cov tub soj tebchaws, thiab nws cia siab hais tias Vajtswv yog Tus yuav tiv thaiv nws thiab tsev neeg thaum cov Yixalayees tuaj txeeb lub lub nroog Yelikaus. Ua ntej txoj kev puastsuaj los ze lub nroog Yelikaus, Lahaj tsis yog nrhiav txoj kev tso siab rau nws xwb tiamsis tseem nrhiav rau nws cov txheeb ze thiab. Nws thov kom nws tsev neeg tsis tuag, nws coglus muab ib pluaj ntaub liab khi rau ntawm lub qhovrai ua lub cim rau lawv paub.
Peb yog ib tug neeg uas tau txais Vajtswv kev ua siab ntev thiab lub siab hlub tshua, peb yuav tsum xav txog txoj kev puastsuaj ib txhis tej zaum yuav los rau peb cov txheeb ze yog hais tias lawv tsis ntseeg Tswv Yexus. Peb yuav tsum thov Vajtswv thiab siv zog pab kom cawm tau lawv dim los ntawm qhov uas coj lawv los cuag Tswv Yexus thiab nkaum hauv Nws qab phabtis tsomkwm. Ntawm yog lub cim ntawm txoj kev ntseeg tseeb.
Thov Vajtswv,
Vajtswv, thov hlub txog nyuam yaus cov txheeb ze. Thov pab kom nyuam yaus tsis yog tsuas xav txog nyuam yaus tiamsis tas siab coj Txojmoo Zoo mus qhia rau nyuam yaus cov txheeb ze kom tau txais kev cawmdim. Nyuam yaus tuav Tswv Yexus Khetos lub npe thov, Amees.
Peb nco thov Vajtswv thiab pab peb cov txheeb ze kom lawv paub Tswv Yexus li cas?
Nyeem Vajluskub hauv peb lub xyoos: Kalatias 4
Kênh Youtube BHKTHN:
