Klei Aê Diê Blŭ: Y-Đaniel 2:1-18
Êlan kliăng: “Kyuadah ih jing prŏng leh anăn ngă bruă yuôm bhăn; knŏng hjăn ih yơh jing Aê Diê.” (Klei Mmuñ Hđăp 86:10).
Klei êmuh ksiêm mĭn: Hlei pô mtao Nebukanetsar duah, čiăng đru ñu? Ya klei ñu čoh čuăn kơ phung anăn? Ya ngă ñu čoh čuăn msĕ snăn? Si klei Y-Đaniel ngă tơdah mtao čoh čuăn msĕ snăn? Ya drei ngă tơdah tlă anăp hŏng klei dleh hlăm klei hdĭp?
Mrâo đĭ dôk ti jhưng mtao mâo dua thŭn (êlan 1), sĭt yơh mtao Nebukanetsar bi mĭn kơ lu hdră bruă čiăng ngă hlăm ênuk ñu jing mtao. Kyuanăn yơh, ñu mâo sa klei êpei msĕ lu bliư̆ (boh blŭ “klei êpei” hlăm êlan 1 čiăng lač kơ lu bliư̆) ngă kơ ñu rŭng răng, amâo thâo pĭt ôh. Hlei pô dưi bi hlai klei rŭng răng leh anăn mblang brei klei êpei anăn dôk đuôm kma hlăm ñu? Ăt msĕ si yang đar, ñu duah êpul phung kčĕ kơ ñu: phung mdian, phung ksiêm mtŭ, phung mjâo, leh anăn phung Kaldê (êlan 2). Năng ai mtao thâo klei mblang kơ êpei anei jing yuôm, leh anăn kyuadah ñu amâo knang ôh kơ phung khua kčĕ anei, snăn ñu lač: “Diih sa ai hdơ̆ng diih blŭ luar, leh anăn blŭ jhat kơ kâo čang hmăng srăng mâo klei bi mlih.” (êlan 9b). Mtao čoh čuăn sa mta klei, amâo tuôm ƀuh amâo tuôm mâo hŏng diñu ôh, amâo djŏ knŏng mblang klei êpei ôh, ƀiădah êlâo hĭn brei diñu hưn kơ mtao thâo ya klei ñu êpei ƀuh leh (êlan 9c).
Sa mta klei čoh čuăn amâo găl djŏ ôh, msĕ khŏ mgu! Tui si klei thâo săng phung hriăm lu, “phung mdian phung ksiêm mtŭ, phung mjâo” yap jing phung knhâo sơaĭ, ƀiădah diñu amâo dưi wĭt lač ôh (êlan 10-11). Klei knhâo leh anăn wăt klei đăo phung Kalđê mông anei bi êdah kdriêl knhal klei jing diñu, klei amâo dưi, wăt klei mplư luar diñu. Diñu amâo dưi bi êđăp ai tiê rŭng răng mtao ôh. Diñu kăn dưi bi mtlaih phung khua kčĕ diñu mơ̆ng klei ba bi mdjiê rei.
Y-Đaniel mâo anăn mbĭt hŏng phung arăng amra bi mdjiê tui si hră mtrŭn mơ̆ng mtao, snăn hlăk hmư̆ hưn kơ klei truh, mông anăn mtam “Y-Daniel mŭt akâo kơ mtao bi kčah mmông čiăng kơ ñu dưi mblang klei êpei anăn kơ mtao” (êlan 16). Leh anăn ñu wĭt “hưn klei anăn kơ phung găp ñu”, “mtă kơ diñu kwưh klei pap mơ̆ng Aê Diê” (êlan 17-18). Amâo mâo klei kĭ kơ̆ ôh, Y-Đaniel thâo săng kơ Aê Diê ñu kkuh mpŭ jing Pô prŏng hĭn; amâo djŏ jing pliă pliê hơăi mang leh anăn amâo mâo klei dưi msĕ si yang phung mjâo, phung mdian Ƀaƀilôn ôh. Klei knhâo Aê Diê amâo mâo kdriêl knhal ôh, amâo msĕ si klei knhâo phung Kalđê ôh. Y-Đaniel đăo kơ Aê Diê ñu mâo klei wĭt lač kơ mta čuăn mơ̆ng mtao đăo kơ yang mkăn anei.
Mâo klei bi hriăm klei knhâo, thâo mĭn mơ̆ng phung Kalđê, ƀiădah Y-Đaniel thâo kơ kdriêl klei thâo mĭn anăn leh anăn klei amâo mâo knhal kơ Aê Diê ñu kkuh mpŭ. Ñu amâo dôk mang kăp tŭ ôh, ƀiădah hur har tui duah klei wĭt lač mơ̆ng Aê Diê kơ mta čuăn dleh dlan, phung knhâo lăn ala leh anăn wăt klei đăo diñu amâo mâo klei dưi wĭt lač ôh. Tơdah drei leh anăn găp djuê tlă anăp hŏng ya mta klei dleh, brei kjăp ai tiê nao kơ Khua Yang msĕ si Y-Đaniel čiăng “kwưh klei pap mơ̆ng Aê Diê hlăm adiê”.
Si ngă diih đăo mơ̆ Aê Diê mâo klei wĭt lač kơ djăp mta klei?
Ơ Ama kâo, lu bliư̆ kâo mĭndah Ama knŏng uêñ kơ mta čuăn klei hdĭp myang, kyuanăn kâo amâo thâo si srăng ngă, luč klei čang hmăng hŏng mta klei truh hlăm klei hdĭp. Akâo kơ Khua Yang đru kâo đăo kơ Khua Yang uêñ mĭn kơ jih lăn ala leh anăn mâo jih klei wĭt lač kơ djăp mta klei.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y-Yôsuê 21:43-22:20
Kênh Youtube BHKTHN:
