Klei Aê Diê Blŭ: Klei Kbiă 3:1-10
Êlan Kliăng: “Yêhôwa lač, “Kâo ƀuh leh klei knap mñai phung ƀuôn sang kâo hlăm čar Êjip, leh anăn kâo hmư̆ leh klei diñu ur krao kyua phung khua bruă diñu; kâo thâo kral klei knap diñu” (Klei Kbiă 3:7)
Klei êmuh ksiêm mĭn: Si phung ƀuôn sang Aê Diê tŭ klei knap mñai êjai jing hlŭn kơ Êjip? Ya klei Aê Diê lač hŏng Y‑Môis hlăm êlan 7? Si Klei Aê Diê Blŭ đru drei kjăp ai tiê mŭt hlăm thŭn mrâo 2025?
Phung ƀuôn sang Aê Diê dôk tŭ klei knap mñai ti gŭ klei Êjip kiă kriê. Grăp hruê mdih pĭt msĕ si diñu amâo ƀuh ôh ti anôk Aê Diê ƀiădah knŏng ƀuh phung khua bruă diñu ƀô̆ mta jhat snăk, măk ƀai dôk ur jŭm dar pô. Hruê anei truh hruê mkăn ur hŏng Aê Diê ƀiădah msĕ si Aê Diê amâo hmư̆ ôh. Ñu lui leh digơ̆ hĕ amâodah digơ̆ srăng lui Aê Diê?
Bi mni kơ Aê Diê kyua Aê Diê amâo msĕ si phung ƀuôn sang bi mĭn ôh, truh wưng Ñu kčah, Ñu srăng lač hŏng Y‑Môis: “Kâo ƀuh leh, Kâo hmư̆ leh, Kâo thâo leh…” (êlan 7). Amâo mâo ôh si klei hdĭp phung ƀuôn sang ƀiădah Aê Diê amâo ƀuh, amâo mâo ôh asăp ur Aê Diê amâo hmư̆, leh anăn amâo mâo ôh klei knap mñai Aê Diê amâo thâo, kyua Ñu jing Aê Diê thâo jih leh anăn kyua drei jing anak êkei, anak mniê Ñu. Wăt tơdah phung ƀuôn sang Aê Diê êlâo dih leh anăn drei hruê anei ƀuh si Aê Diê jing dưn, ƀiădah Ñu amâo tuôm mlih ôh, Ñu ăt ƀuh, ăt hmư̆ leh anăn ăt thâo kơ klei dleh dlan phung ƀuôn sang Ñu.
Hruê tlâo pluh sa mlan pluh dua, dơ̆ng mŭt hlăm thŭn mrâo 2025. Knŏng dôk dŭm mmông čiăng mprăp, leh anăn mmăt anei grăp čô ƀiă lu ăt pioh ƀiă mnĭt mmông dôk tinăn, lŏ dlăng kơ pô, gŏ sang, Phung Sang Aê Diê, lăn čar, tar rŏng lăn sa thŭn êgao. Mơak amâodah ênguôt? Tŭ jing amâodah hơăi? Găl ênưih amâodah dleh dlan? Jăk mơak amâodah knap mñai? Hơ̆k mơak amâodah luč klei čang hmăng? Ktang kjăp amâodah êdu awăt? Aê Diê dôk mbĭt amâodah msĕ si Aê Diê dôk kbưi snăk?… Wăt tơdah si ngă snăn dưn ăt brei drei bi mni kơ Aê Diê mơh kyua Ñu ăt nao hrăm mbĭt hŏng drei nanao, Ñu ƀuh nanao drei wăt tơdah drei mĭn msĕ si amâo ƀuh ôh Ñu, Ñu đing hmư̆ nanao wăt tơdah drei kwưh akâo amâodah ƀuah ăl, leh anăn Ñu thâo nanao wăt tơdah drei msĕ si amâo ƀuh ôh ti anôk Ñu. Klei hdĭp drei dôk hlăm hdră leh anăn klei Ñu čiăng, Ñu hrih mjing leh drei, bi tui leh drei leh anăn ăt lŏ dơ̆ng hrăm mbĭt hŏng drei tơl truh knhal tuč. Bi mni kơ Aê Diê khăp hơiêng.
Hruê knhal tuč thŭn 2024, akâo kơ Khua Yang đru drei kjăp ai tiê mŭt hlăm thŭn mrâo 2025 hŏng ai tiê hdơr knga kơ Aê Diê leh anăn êbat nanao hŏng Khua Yang wăt tơdah si klei truh dưn. Êlâo kơ mŭt thŭn mrâo, đăm mâo ôh hlei pô brei klei truh hlăm klei hdĭp bi hmăi kơ klei đăo drei hlăm Khua Yang, ƀiădah mklăk wĭt dŭm klei truh anăn yơh đru kơ klei đăo drei ktang hĭn, kjăp hĭn kyua Aê Diê drei ƀuh nanao, hmư̆ nanao, thâo nanao.
Drei kjăp ai tiê leh anăn hơ̆k mơak mŭt hlăm thŭn mrâo 2025 mơ̆?
Wah lač: Ơ Khua Yang, kâo bi mni kơ Ih kyua Klei Aê Diê Blŭ bi juh, mđĭ ai leh anăn thiăm ai ktang kơ kâo lu snăk čiăng kơ kâo kjăp ai tiê mprăp mŭt hlăm thŭn mrâo 2025 hŏng ai tiê đăo kơ Aê Diê ƀuh nanao, mđing hmư̆ nanao leh anăn thâo nanao djăp mta klei hlăm klei hdĭp kâo. Akâo kơ Ih đru kâo hdĭp tŭ dưn hlăm hruê mlan Ih dưm kâo ti lăn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y‑Samuel 31
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
