Khiavdim 3:1-10
Nqe cim:
“Tom qab ntawd tus Tswv hais tias, “Kuv pom kuv haivneeg uas nyob nram tebchaws Iziv raug kev tsimtxom heev, kuv hnov lawv tej suab quaj qw thov kuv pab kom lawv dim ntawm txojkev uas lawv raug yuam ua luag qhev. Kuv paub lawv raug kev txomnyem kawg nkaus li lawm.” (Khiavdim 3:7)
Lus nug rau sawvdaws xav:
– Tus Tswv haivneeg tabtom ua neej txomnyem ntsuav nram tebchaws Iziv zoo li cas?
– Tus Tswv hais kom Mauxes ua yam dabtsi hauv nqe 7?
– Tus Tswv tej lus hais pab tau peb ruaj siab rhais ruam mus rau xyoo tshiab 2025 li cas?
Ib tsoom mloog txhua tus,
Tus Tswv haivneeg tabtom raug ua qhev nyob nram tebchaws Iziv. Txhua hnub sawv los lawv ntsia zoo nkaus li tsis pom muaj tus Tswv nyob qhov twg li, tsuas pom tej neeg quabyuam lawv nyob ntawd txib lawv ua haujlwm xwb. Nyob ib hnub dhau ib hnub, lawv quaj hu tus Tswv tiamsis zoo li tus Tswv tsis hnov lawv lub suab. Tus Tswv muab lawv tso tseg lossis yog lawv muab tus Tswv tso tseg?
Ua Vajtswv tsaug, Nws tsis zoo li tej neeg sawvdaws xav, txog lub sijhawm Nws teem cia, Nws hais rau Mauxes hais tias: “Kuv pom, Kuv hnov, Kuv paub…” (nqe 7). Tsis muaj ib qhov thaiv tau kom tus Tswv tsis pom Nws haivneeg, tsis muaj ib lub suab twg uas tus Tswv tsis hnov li, thiab tsis muaj qhov twg uas tus Tswv tsis paub li, rau qhov Nws yog Vajtswv tus uas paub txhua yam thiab vim peb yog Nws cov menyuam. Txawm yog tus Tswv haivneeg hnub thaud thiab peb cov uas nyob tamsim no txojkev xav yuav zoo licas rau tus Tswv los Nws yeej tsis hloov, Nws yeej pom, yeej hnov thiab yeej paub Nws haivneeg tej kev txomnyem.
Hnub no 31 lub 12 hlis, twb yuav hla mus rau xyoo tshiab 2025. Tshuav tsis muaj pestsawg teev tsoov rau peb npaj lawm, hmo no tsis coob los twb muaj tsawg tus neeg siv sijhawm los zaum, ntsia saib yus tus kheej, tsevneeg, Pawg Ntseeg, tebchaws, lub ntiajteb no ib lub xyoos dhau los. Saib zoo siab lossis nyuaj siab? Ua tau lossis tseem ua tsis tau? Tau zoo lossis txomnyem? Muaj noj txaus lossis tsis muaj txaus? Tseem ntshaw ua neej lossis tsis ntshaw ua neej? Muaj zog lossis qaug zog? Tus Tswv nrog yus nyob lossis yus twb txav deb tus Tswv lawm?… Txawm yuav zoo li cas los peb yuav tsum ua Vajtswv tsaug, vim Nws niaj hnub nrog nraim peb, Nws pom ntsoov peb txawm peb saib zoo li tsis muaj Nws, Nws hnov ntsoov thaum peb thov lossis peb yws Nws, thiab Nws paub peb txawm yog zoo li peb tsis paub Nws nyob qhov twg. Peb lub neej nyob tagnrho hauv Vajtswv txojkev npaj, Nws twb tsim peb, cawm peb los ces Nws yeej yuav nrog nraim peb mus txog hnub kawg. Ua tsaug, Vajtswv Koj hlub peb heev.
Hnub no xaus xyoo 2024, thov tus Tswv pab kom peb ruaj siab hla mus rau xyoo tshiab 2025 paub ua tus Tswv tsaug thiab niaj hnub nrog Nws mus, txawm yog yuav zoo li cas los xijpeem. Txog lub xyoo tshiab, thov kom peb tsis txhob cia tej xwmtxheej ua rau peb poob kev ntseeg, tiamsis cia kom tej xwmtxheej ntawd ua rau peb kev ntseeg ruaj, sawv khov kho vim tus Tswv pom, hnov, paub huv tibsi.
Peb koom siab thov Vajtswv,
Tus Tswv, nyuam yaus ua Koj tsaug vim Koj Txojlus txhawb zog, ntxiv dag zog rau nyuam yaus ntau heev, kom nyuam yaus ruaj siab npaj rhais ruam hla mus rau xyoo tshiab 2025, ntseeg hais tias Koj pom, Koj hnov thiab Koj paub txhua yam nyob hauv nyuam yaus lub neej. Thov cia nyuam yaus nyob muaj nuj nqis pub rau Koj. Nyuam yaus tuav Tswv Yexus lub npe thov, Amees.
Peb puas ruaj siab thiab zoo siab hlo hla mus rau xyoo tshiab 2025 lawm tau?
Nyeem Vajluskub hauv peb lub xyoo: I Xamuyees 31
Kênh Youtube BHKTHN:
