Mathais 2:1-12
Nqe cim
“Hmo ntawd lawv ua npau suav pom Vajtswv los hais rau lawv hais tias kom lawv mus lwm txojkev mus tsev tsis txhob rov mus qhia rau Helauj.” (Mathais 2:12).
Lus nug rau sawvdaws xav:
– Cov neeg uas txawj saib hnubqub nyob qhov twg tuaj nrhiav tus cawmseej los yug?
– Tom qab uas pom tus Tswv, lawv mus txojkev twg mus lawm?
– Nimno, txojkev twg yog txoj uas coj mus tau txojsia thiab mus txog ntuj ceebtsheej ci ntsa iab?
Cov neeg txawj saib hnubqub nyob sab hnubtuaj tej zaum yog saib raws li Vajtswv Txojlus Phau Qub qhia, lossis yog tau Vajtswv qhia tawm tshwj xeeb rau lawv, vim li ntawd lawv thiaj zeem paub lub hnubqub taw kev tuaj nrhiav tus cawmseej. Lawv tuaj nrhiav txog hauv lub nroog Yeluxalees, hauv Vajntxwv Helauj tus uas siab phem lub vajloog, rau qhov lawv xav hais tias tus Tswv yuav los yug hauv tsev vajntxwv. Thaum cov neeg txawj saib hnubqub nug, “cov Yudais tus vajntxwv, nws yug rau qhov twg?” ces tagnrho Vajntxwv Helauj thiab lub nroog Yeluxalees nyuaj siab heev, vim ntshai tsam poob vajntxwv. Dhau los ntawm cov povthawj thiab cov xibhwb uas qhia Vajtswv txoj kevcai, Helauj paub hais tias Yexus Khetos los yug hauv lub nroog Npelehees. Vajntxwv mus ntsib cov neeg txawj saib hnubqub nug thiab hais rau lawv hais tias, “Nej cia li mus nrhiav tus metub ntawd; yog nej mus nrhiav tau nws lawm, nej rov qab los qhia rau kuv, kuv yuav mus pehawm nws thiab” (nqe 8). Tiamsis tsis muaj ib tug vajntxwv yuav zoo siab thaum hnov xov tias yuav muaj ib tug vajntxwv tshiab los yug li! Vajntxwv Helauj xav nrhiav kom tau thiab tua tus menyuam ntawd mus (nqe 16), vajntxwv txojkev xav tsis raws li Vajtswv lub siab nyiam, tsuas xav phem, ntxub xwb…
Cov neeg txawj saib hnubqub rov mus ncua kev deb kwvlam li cuaj kilumev thiaj mus txog lub nrog Npelehees raws li lub hnubqub coj kev. Lawv pom tus cawmseej nyob hauv ib lub tsev, lawv txhos caug ntua pehawm tus metub thiab lawv thau lawv tej khoom fij rau Nws (nqe 11). Lawv muaj kev zoo siab heev, yuav xav rov qab taug txoj qub kev mus qhia rau Vajntxwv Helauj paub tus cawmseej. Tiamsis txojkev qub yog kev tuag, kev chim, kev ntxhov siab (Mathais 2:16). Vajtswv los hais rau lawv kom mus lwm txojkev mus tsis txhob mus qhia rau Helauj, yog li lawv ua raws li Vajtswv tej lus hais thiab taug lwm txojkev mus tsev lawm. Lwm txojkev uas cov neeg txawj saib hnubqub taug mus yog txojkev uas Vajtswv qhia, yog txojkev cia siab, coj mus tau txojsia, zoo siab, thiab kaj siab.
Tibneeg paub pehawm tiamsis feem coob xaiv pehawm yuam kev thiab xaiv txojkev ua raws li siab nyiam tsis ua raws li tus Tswv nyiam. Yog pheej taug mus ntxiv ces yuav poob kev puastsuaj. Txojkev tseeb coj mus tau txojsia yog txojkev uas ntsib tau Tswv Yexus, tus uas los yug ua neeg, tuag txhiv peb lub txim thiab sawv rov los muaj yeej. Nov yog txojkev uas Tswv Yexus hais tias: “Kuv yog txojkev, yog qhov tseeb thiab yog txojsia; tsis muaj leejtwg mus cuag tau Leej Txiv, tsuas yog mus ntawm kuv mus xwb thiaj tau” (Yauhas 14:6), thiab nov yog txojkev coj peb mus txog ntuj ceebtsheej ci ntsa iab.
Thov Vajtswv,
Tus Tswv, nyuam yaus ua Koj tsaug vim Koj npaj muaj ib txojkev ciaj sia rau nyuam yaus. Thov Koj ntxiv dag zog kom nyuam yaus tsis txhob rov mus taug txoj qub kev dua, tiamsis taug txojkev dawbhuv thiaj mus txog lub tebchaws ci ntsa iab. Nyuam yaus tuav Tswv Yexus lub npe thov. Amees.
Ib tsoom cov mloog uas hmov thiab tshua,
Peb xaiv taug txojkev twg kom mus txog ntuj ceebtsheej?
Nyeem Vajluskub hauv peb lub xyoo: Tshwmsim 13:11-14:20
Kênh Youtube BHKTHN:
