I Kauleethaus 9:1-14
Nqe cim:
“Txawm yog li los peb yeej txhob txwm tsis sau nej tug. Peb ua siab ntev nyiaj txhua yam kev txomnyem thiaj yuav tsis muaj ib yam dabtsi tabkaum Txojmoo Zoo uas hais txog Yexus Khetos zaj” (I Kauleethaus 9:12b)
Lus nug xav:
– Timthawj Paulus siv cov lus qhia txog kev ywjpheej hauv tshooj 8 rau nws zoo li cas?
– Paulus qhia paub nws muaj tej cai twg thiab vim li cas nws tsis siv tej cai ntawd?
Timthawj Paulus tsis yog qhia xwb. Tus cai ua neej uas tsis cia txoj kev ywjpheej ua rau cov kwvtij uas kev ntseeg yau yuam kev ua txhaum (I Kauleethaus 8:13) tau Paulus siv meej tseeb rau nws tus kheej. Nyob hauv tshooj 9, Paulus ua ntau lo lus nug qhia paub nws muaj txaus qhov timkhawv siv tej khoom uas lwm tus muab los nws tsis ua li, Paulus tseem xaws tsev ntaub kom muaj nyiaj siv mus ua haujlwm. Txawm yog Paulus muaj cai siv los nws tsis ua li ntawd kom tsis txhob tabkaum tes haujlwm mus qhia Txojmoo Zoo cawm neeg (nqe 12).
Hauv nqe 1-6, Timthawj Paulus hais txog qhov uas nws tes haujlwm ua timthawj thiab yog tus coj Txojmoo Zoo mus qhia rau cov ntseeg nyob hauv nroog Kauleethaus. Lub meejmom no, tsis yog Paulus tib leeg tsimnyog tau pab, tiamsis nws thiab Npananpas tau cai zoo li “Petus thiab txhua tus timthawj, lawv puavleej muaj cuabkav coj pojniam menyuam nrog lawv mus rau ub rau no” (nqe 5). Hauv nqe 7-8, Paulus rov hais ntxiv los ntawm qhov yog kev yog cai raws li kev ua neej: Tus uas mus ua tubrog tsis rov los noj mov hauv tsev, tus neeg uas cog txiv hmab nws muaj cai tau noj cov txiv hmab ntawd, tus neeg uas yug yaj nws yeej tau tso yaj tej kua mis. Yog tus lw ua neej no qhia tau tias tsimnyog ces thaum siv ua Vajtswv tes haujlwm, siv tau raws tus cai uas Vajtswv Txojlus Phau Qub qhia: “Thaum nej tabtom muab nyuj tsuj nplej, nej tsis txhob muab hnab looj nyuj qhovncauj”, Timthawj Paulus ua lus nug: “Puas yog Vajtswv txhawj nyob tsam nyuj tsis tau noj? 10Vajtswv hais li ntawd tsis yog Vajtswv hais txog peb los? twb yog Vajtswv hais txog peb ntag. Tus uas laij teb thiab tus uas ntaus nplej, nkawd yeej cia siab hais tias nkawd yuav tau qoobloo sib npaug” (nqe 9-10). Txhais tau tias yog ua raws li twb ua rau lwm tus timthawj, thiab raws txoj cai Vajtswv Txojlus Phau Qub qhia, Paulus puavleej muaj cai tau txais kev pab thaum ua tes haujlwm mus qhia Moo Zoo tsis tas ua tes haujlwm xaws tsev ntaub lawm. Tiamsis Timthawj Paulus ua qauv uas tsis tau siv txoj cai ntawd dua li, “thiaj yuav tsis muaj ib yam dabtsi tabkaum Txojmoo Zoo uas hais txog Yexus Khetos zaj” (nqe 12). Paulus tsis siv nws qhov kev ywjpheej kom ua rau tus Tswv Txojmoo Zoo muaj kev ywjpheej nthuav dav mus rau lwm tus. Paulus xwbtim ua rau nws noj, tsis txais kev pab ntawm cov ntseeg uas mloog nws qhia, kom lwm tus tsis ntsib kev khwv thaum ntseeg Txojmoo Zoo.
Ua raws Timthawj Paulus tus qauv ua haujlwm, tsis yog muaj cai, muaj kev yeej pheej ua ib yam twg ces yuav tau ywjsiab nam qees ua yam ntawd. Thov Vajtswv pab kom peb nquag ua Vajtswv haujlwm los ntawm lub siab kub lug pheej xav txog cov neeg uas tsis tau txais kev cawm dim. Txaus siab hlo tso qhov uas yus tau cai tseg kom tus Tswv Txojmoo Zoo nrov mus rau coob leej tau hnov.
Thov Vajtswv,
Vajtswv, yog muaj tes haujlwm twg nyuam yaus ua es ua rau lwm tus ua txhaum, thov Koj qhia kom nyuam yaus ua tau tus neeg zoo siab hlo fij tus kheej kom mus txhawb tau cov kwvtij ntseeg thiab muaj ntau leej los ntseeg. Nyuam yaus tuav Tswv Yexus Khetos lub npe thov, Amees.
Tej yam twg uas peb txiav txim siab tsis ua kom muaj nuj nqis rau lwm tus?
Nyeem Vajluskub hauv peb lub xyoo: Yauj 17
Kênh Youtube BHKTHN:
