2 Kevcai 22:25-30
Nqe cim:
“Tsis txhob deev luag pojniam luag txiv” (Khiavdim 20:14).
Lus nug rau sawvdaws xav:
– Tus Tswv txwv tsis pub ua kev nkauj kev nraug thiab yog ua ces yuav raug txiav txim li cas?
– Vajtswv xav qhia rau Nws haiv neeg yam dabtsi dhau los ntawm tej kevcai no?
– Koj yuav tsum ua neej li cas nrog rau tiam neej niaj hnub nimno uas xav ua ywj pheej rau txoj kev nkauj kev nraug?
Ntu Vajluskub hnub no qhia txog 3 yam xwm tshwm sib txawv. Yam tim ib, yog muaj ib tus txivneej muab tus ntxhais uas luag twb qhaib lawm mos deev ces nws lub txim yog raug tua tuag. Yam tim ob, yog muaj ib tus txivneej mus mos tus ntxhais uas tsis tau muaj neeg qhaib deev, ces nws lub txim yog raug them tsib caug daim nyiaj rau tus ntxhais ntawd niam thiab txiv, thiab nws yuav tsum yuav tus ntxhais ntawd ua pojniam mus tas simneej tsis pub nrauj. Yam tim peb, txwv tsis pub cov ua tub deev nws txiv tus niam yaus lossis yuav ua pojniam.
Tej kevcai qhia no ua rau peb pom hais tias, kev ua nkauj ua nraug sib deev uas dhau ntawm yus tus txij nkawm yog yam uas phem qias, Vajtswv tsis txaus siab thiab yuav raug Vajtswv rau txim. Lub homphiaj uas rhawv tsim muaj tej kevcai no yog tsim los tiv thaiv txoj kev tsis dawbhuv cov ua txij nkawm thiab ceev tau txoj kev zoo siab nrog yus tus txij nkawm nyob hauv Vajtswv haivneeg. Los ntawm tej kevcai no pab tau Vajtswv haivneej ua neej zoo, tsis thooj lwm haivneeg. Lwm haivneeg saib txoj kev sib yuav ua txij nkawm tsis muaj nqis, lawv mus sib deev ua phem ua qias ywj siab, ua rau Vajtswv ntxub kawg nkaus thiab muab lawv ntiab tawm hauv lawv lub tebchaws mus lawm (Levis kevcai 18:27-28). Vim li ntawd, Vajtswv xav kom Nws haivneeg paub, thaum tau mus nyob hauv lub tebchaws coglus tseg lawm, yuav tsum coj raws txoj kevcai ua txij ua nkawm dawb huv uas Vajtswv tau qhia lawm, kom lawv tsis mus ua kev txhaum li lwm haivneeg.
Peb cov ntseeg Yexus tabtom nyob rau tiam uas tibneeg sawvdaws nyiam ua phem ua qias kawg nkaus, lawv ywj siab ua kev nkauj kev nraug tsis zais, tsis paub txaj muag tso rau saum huab cua, los ntawm duab yees, ntawm sau ntaub ntawv thiab hais xov xwm… Vim tsis ua lub neej dawbhuv hauv txoj kev ua txij nkawm li Vajtswv tej kevcai qhia, qee leej thiaj kis tau tej kab mob kis uas txaus ntshai thiab kho tsis tau xws li tus mob ej (AIDS). Lossis muaj qee leej ua nkauj ua nraug ywj siab, sib deev ua ntej sib yuav… thiaj muaj menyuam tsis raws li siab xav thiab ua rau txoj kev tua menyuam hauv plab ntau heev, thiab qhov nuj nqis uas raug sawvdaws yog kev mob ntawm sab nqaij tawv, mob sab siab ntsws, mob sab ntsujplig uas tsis muaj hnub yuav ploj ntawm lub neej mus, tshwjxeeb yog ntawm cov uas ua pojniam.
Yog tus ntseeg, yuav tsum paub hais tias kev pw ua niam txiv yog yam khoom plig uas Vajtswv pub tshwjxeeb rau hauv txoj kev txij nkawm xwb. Txhua txoj kev sib deev, sib mos deev lossis sib yuav tsis haum cai puavleej yog kev txhaum thiab tsis dawbhuv ntawm Vajtswv. Peb yog Vajtswv tus dawbhuv menyuam, peb yuav tsum ua lub neej dawbhuv rau hauv txoj kev sib yuav txij nkawm kom zoo tsis thooj li tibneeg ntiajteb thiaj rub tau lawv los nrhiav Vajtswv. Yog peb ua neej zoo li tibneeg ntiajteb, ces peb yeej tsis yog cov ntsev las neeg ntiajteb thiab tsis ua tau lub teeb ci rau neeg ntiajteb pom kev.
Thov Vajtswv
Vajtswv tus dawbhuv uas nyuam yaus pehawm. Thov qhia nyuam yaus khiav deb ntawm txoj kev dag ntxias uas deev luag pojniam luag txiv thiab paub ceev lub neej dawbhuv hauv kev txij nkawm li Koj Txojlus qhia. Amees!
Peb puas txiav txim siab ua neej kom txawv tibneeg ntiajteb ua?
Nyeem Vajluskub hauv peb lub xyoos: Tes Haujlwm 2:41-3:26.
Kênh Youtube BHKTHN:
