Pajlug 28:2
Nqe cim:
“Thaum muaj kev ntxeev nom ntxeev tswv nyob hauv lub tebchaws yuav muaj ntau tus nomtswv los kav. Tiamsis thaum tus thawjcoj uas txawj ntse los kav lub tebchaws yuav nyob ruaj khov” (Pajlug 28:2)
Peb saib ntxiv hauv phau txhais tshiab MWW2022
“Thaum lub tebchaws ua txhaum, ces yuav muaj ntau tus nomtswv los kav. Tiamsis thaum muaj tus thawjcoj uas thoob tsib thiab txawj ntse los kav, lub tebchaws yuav nyob ruaj khov”.
Lus nug xav:
– Yam dabtsi tshwm muaj thaum ib lub tebchaws lossis ib tug neeg ua txhaum?
– Tus thawjcoj zoo li cas thiaj coj tau kev tiaj tus los rau lub tebchaws?
– Peb qhia tshwm kev txawj ntse Vajtswv pub los ntawm feem xyuam txhua hnub zoo li cas?
Nqe Pajlug no hais txog qhov tsis ruaj khov thiab ruaj khov. Thaum ib lub tebchaws tsis muaj kev ncaj ncees, ua txhaum, ntxeev nom ntxeev tswv tshwm tuaj, qhov ntawd yuav hloov thawjcoj tsis tseg. Ib “lub tebchaws” lossis ib cheebtsam av txojkev ua zoo poob mus raug qhov ntxeev nom ntxeev tswv vim cov thawjcoj tsis txaus peevxwm coj. Ces cov thawjcoj yuav tsis ruaj siab, tsis muaj homphiaj, ua rau ntau qhov ntxhov siab. Xws li Vajntwv Ahaj, Vajntxwv Manaxes ua rau lub tebchaws raug txomnyem. Qhov kev tawmtsam Vajtswv tsis yog ntxeev nom ntxeev tswv xwb tiamsis tseem ua rau kev ua neej thiab tsevneeg ntxhov.
Dua li ntawd, “thaum tus thawjcoj uas txawj ntse los kav lub tebchaws yuav nyob ruaj khov”. Vim Vajtswv yog lub hauvpaus txawj ntse (Pajlug 2:6), yog li kev txawj ntse uas los ntawm tus Tswv los ua rau muaj kev meej tseeb, taw kev ua neej ruaj khov ntev loo. Ib tug thawjcoj lossis ib tug ntseeg twg thaum nrhiav tau qhov tseeb ntawm tus Tswv thiab taug tus Tswv txojkev, ces yuav dhau los ua tus coj thajyeeb thiab muaj hauvpaus hauvntsis rau sawvdaws. Txojkev txawj ntse no tsis yog kev txawj ntse ntawm tibneeg, tiamsis yuav tsum yog muaj qhov hwm tus Tswv thiab mloog Nws lus. Xws li Vajntxwv Yauxiyas, Vajntxwv Hexekiyas txhim tsa dua tebchaws, cawm cov neeg raug kaw dim, thiab lub tebchaws ruaj khov ntev loo.
Yog tus ntseeg Yexus, peb tau nqua hu kom ua neeg txawj ntse nyob hauv lub ntiajteb uas ua neej tsis muaj homphiaj no. Txawm yog hauv tsevneeg, Pawg Ntseeg lossis tebchaws, peb yuav tau qhia tshwm Vajtswv yog tus muaj hauvpaus hauvntsis los ntawm kev ua neej dawbhuv, txo hwjchim thiab ncaj ncees. Sab ntsujplig tsuas ruaj khov thaum peb lub siab ua raws li Vajtswv lub siab nyiam. Los ntawm Tswv Yexus, peb tsis yog tau txais kev cawm dim xwb tiamsis tseem tau txais kev txawj ntse kom ua tau lub neej yog. Cia li saib rau seem uas peb ua, tsevneeg, Pawg Ntseeg lossis qhov chaw ua haujlwm. Cia li nrhiav kev txawj ntse ntawm Vajtswv txhua hnub los ntawm Vajtswv Txojlus qhia kev thov Vajtswv. Thov Vajtswv pab kom peb ua tawm raws li kev txawj ntse thiab ua lub hauvpaus coj kev ruaj khov rau tej neeg nyob ibncig.
Thov Vajtswv,
Peb Leej Txiv tus uas nyob saum ntuj ceebtsheej, Koj yog Vajtswv tus uas muaj hauvpaus hauvntsis thiab muaj kev kaj siab. Thov Koj zam txim rau nyuam yaus thaum txav deb tsis taug Koj txojkev thiab ua rau muaj kev ntxhov hauv lub neej. Thov Koj pub kom nyuam yaus totaub thiab thoob tsib Koj tej lus. Thov pab nyuam yaus ua neej txawj ntse thiab ncaj ncees ua rau muaj kev ruaj khov thiab kaj siab rau tej neeg nyob ibncig. Nyuam yaus tuav Tswv Yexus Khetos lub npe thov, Amees.
Peb tabtom ua kom muaj kev kaj siab thiab muaj hauvpaus hauvntsis, los yog ua kom muaj kev ntxhov nyob hauv tsevneeg thiab tej neeg sawvdaws?
Nyeem Vajluskub hauv peb lub xyoo: Yauj 15
Kênh Youtube BHKTHN:
