Klei Aê Diê Blŭ: Y‑Markôs 15:22-24
Êlan kliăng: “Ñu pô klam klei soh drei hlăm asei mlei Ñu pô ti kyâo bi kal, čiăng kơ drei dưi djiê kơ klei soh leh anăn hdĭp kơ klei kpă ênô.” (I Y‑Pêtrôs 2:24a)
Klei êmuh ksiêm mĭn: Si klei arăng pơ̆ng Khua Yang Yêsu ti kyâo bi kal? Si ngă arăng pia kơ hruê Khua Yang Yêsu djiê jing “Hruê Êma Jăk Siam”? Ya klei mñă brei drei hdơr tơdah dlăng kơ Pô arăng pơ̆ng ti kyâo bi kal?
Hruê anei, drei mđrăm mbĭt ksiêm hdơr kơ hruê êma Khua Yang Yêsu tŭ klei pơ̆ng msei kđĭn, leh anăn ya ngă arăng khăng pia kơ hruê anăn jing “Hruê Êma Jăk Siam”. Klei mrâo mrang jăk Y‑Markôs knŏng klah čŭn, “diñu pơ̆ng Gơ̆ ti kyâo bi kal” (êlan 24a) kyuadah phung dlăng hră ênuk anăn thâo săng klă snăk si jing klei jhat huĭ mduĭ kơ klei bi kmhal anăn. Leh tŭ klei arăng čăm biêng suăi kjham tơl păt čiăng tuč ai, ti kbuôn čư̆ Gôlgôtha, arăng pơ̆ng msei kđĭn hluh gah ti kngan leh anăn jơ̆ng Khua Yang Yêsu ruă knap tơl hnơ̆ng. Klei ruă knap jhat hĭn jing Gơ̆ amâo djiê mtam ôh. Phung kahan brei Khua Yang mnăm kpiê bi lŭk hŏng êa drao phĭ ƀâo mngưi čiăng bi êdu ƀiă klei ruă knap, ƀiădah Khua Yang hngah amâo mnăm ôh. Khua Yang čiăng djiêl găn jih klei bi kmhal anei kluôm ênŭm. Hlăm hră čih Klei Bi Mdjiê Khua Yang Yêsu, khua pô mtô John MacArthur mblang hnơ̆ng klei jhat ƀai kơ klei bi kmhal pơ̆ng hŏng msei kđĭn snei: “Čiăng dưi thâo hrip bi êwa, mnuih tŭ klei arăng pơ̆ng kpưn asei mlei, mdưm kluôm jih boh ktrŏ asei mlei ti anôk êka arăng pơ̆ng msei kđĭn ti jơ̆ng leh anăn kngan, bi rŏng kơhiêk êka leh lŏ bi kroh hŏng kyâo bi kal rŭk rĭk. Mnuih arăng pơ̆ng awăt yư̆ yư̆ tơl amâo lŏ dưi bi êwa, ti knhal tuč djiê kyuadah hngăt dăl êwa”.
Anăn jing hruê êma, hruê arăng phat kđi Khua Yang Yêsu, klam kyâo bi kal čhuang êbat ti êlan knap mñai truh ti cư̆ kbuôn Gôlgôtha leh anăn tŭ klei arăng pơ̆ng msei kđĭn ti kyâo. Êrah Gơ̆ blĕ. Asei mlei Gơ̆ mčah rai. Mngăt ai tiê Gơ̆ ktrŏ. Phung mnuih jŭm gah tlao mư̆c. Aê Diê Ama wir rŏng. gơ̆ dôk tinăn hjăn păn leh anăn tŭ klei djiê. Hruê Êma anăn jing mmăt tĭt snăk. Ƀiădah klei Khua Yang Yêsu djiê amâo djŏ jing klei dluh lĕ ôh. Mklăk wĭt, anăn jing klei dưi hĭn kyuadah kđi bi kmhal klei soh bi mgaih msir leh leh. Hruê êma mmăt tĭt bliư̆ jing “Hruê Êma Jăk Siam” kyuadah “Ñu pô klam klei soh drei hlăm asei mlei ñu pô ti kyâo bi kal, čiăng kơ drei dưi djiê kơ klei soh leh anăn hdĭp kơ klei kpă ênô. Hŏng anôk êka Ñu diih hlao leh” (I Y‑Pêtrôs 2:24).
Hlăm Knăm Bi Hdơr kơ klei Khua Yang Tŭ Klei Knap Mñai hlăm thŭn anei, brei grăp čô drei angưr dlăng kơ kyâo bi kal anôk hlăk đưm Khua Yang tŭ klei knap mñai čiăng thâo kral hnơ̆ng jhat kjham klei soh drei pô, leh anăn wăt čiăng ƀuh si klei khăp prŏng êlam Khua Yang pioh brei kơ drei. Brei drei dlăng kơ kyâo bi kal čiăng ƀuh hruê anăn sĭt nik jing “Hruê Êma Jăk Siam”, hruê drei mâo klei pap brei jih klei soh, mâo mmông găl dưi hdĭp sa klei hdĭp mrâo, mâo klei dưi hĭn hŏng klei soh, mâo boh tŭ dưn kơ Khua Yang.
Ya klei drei ƀuh tơdah angưr dlăng kơ kyâo bi kal anôk Khua Yang mphŭn dô tŭ klei knap mñai?
Wah lač: Ơ Khua Yang Pô Bi Mtlaih kâo, dlăng kơ kyâo bi kal anôk asei mlei Ih arăng pơ̆ng, kâo ƀuh klei soh kâo prŏng đei, ƀiădah klei Ih khăp jing prŏng hĭn mơh. Sĭt nik kâo amâo dưi djăp boh blŭ čiăng bi mni kơ Khua Yang kyua klam brei jih leh klei soh kâo. Bi mni kơ Khua Yang kyuadah mâo sa hruê “Hruê Êma Jăk Siam”. Akâo kơ Khua Yang mâo klei mpŭ mni mơ̆ng klei hdĭp kâo hruê anei leh anăn hlŏng lar!
Dlăng Klei Aê Diê Blŭ hlăm tlâo thŭn: Y‑Nahum 2:11-3:19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
