Klei Aê Diê Blŭ: I Kôrantô 8:1-13
Êlan kliăng: “Klei thâo săng bi mgao arăng, ƀiădah klei khăp bi mđĭ ai” (I Kôrantô 8:1b)
Klei êmuh ksiêm mĭn: Hlăm trăn Klei Aê Diê Blŭ anei, kơ ya êlan hdră yuôm Khua ƀĭng kna Y-Pôl mtô? Ya jing dua klei mĭn mdê mdê tơdah mă yua klei Khua ƀĭng kna Y-Pôl mtô? Si ngă drei mă yua klei hriăm anei hlăm klei hdruôm hră Klei Aê Diê Blŭ amâo tuôm ghă ôh?
Mơ̆ng klei êmuh djŏ kơ klei ƀơ̆ng mnơ̆ng ngă yang, Khua ƀĭng kna Y-Pôl bi êdah sa hdră êlan jing yuôm hĭn, dưi yua kơ lu mta klei hlăm klei hdĭp: Mâo klei drei “dưi ngă” ƀiădah kăn brei drei ngă rei. Knŏng hlăm pluh tlâo êlan Klei Aê Diê Blŭ, boh ngă “thâo”, leh anăn boh anăn “klei thâo săng” Khua ƀĭng kna Y-Pôl yua truh kơ pluh sa blư̆, čiăng bi djŏ hŏng boh ngă “khăp” leh anăn boh anăn “klei khăp” (êlan 1, 3). Ñu lač klei thâo săng bi mgao arăng, ƀiădah klei khăp bi mđĭ ai (êlan 1). Wăt tơdah thâo kơ sa mta klei jing klei dưi ngă, ƀiădah tơdah amâo mĭn bi nik ôh kơ bruă pô ngă anăn srăng ba klei jăk hĕ amâodah klei jhat kơ pô mkăn, snăn boh sĭt gơ̆ “ka thâo ôh msĕ si klei djŏ brei ñu thâo” (êlan 2). Lu mnuih hriăm lu kơ Klei Aê Diê Blŭ leh anăn thâo săng lu, jưh ti klei hdruôm hră Klei Aê Diê Blŭ amâo tuôm ghă ôh diñu ngă hŏng klei êngiê djăp mta klei, amâo uêñ ôh kơ klei ngă anăn bi hmăi jhat kơ pô mkăn, snăn pô anăn ka thâo săng ênŭm ôh kơ klei djŏ brei ñu thâo săng. Khua ƀĭng kna Y-Pôl mtă kơ phung anei snei: “Knŏng brei diih răng, đăm brei klei êngiê diih jing hĕ klei bi têč hnêč kơ phung awăt” (êlan 9).
Klah čŭn, tơdah mă yua klei Khua ƀĭng kna Y-Pôl mtă, khăng mâo dua klei mĭn mdê mdê: Tal sa, êlâo kơ ngă sa mta klei, brei drei ksiêm bi nik klei drei ngă bi hmăi jăk hĕ amâodah bi hmăi jhat kơ klei đăo pô mkăn. Tal dua, kyuadah huĭdah klei pô ngă pô mkăn amâo khăp leh anăn amâo ư ai ôh kyuanăn yua klei êngiê diñu pô čiăng pô mkăn tĭng ksiêm jăk kơ diñu.
Knhuah hdĭp tal sa kbiă hriê mơ̆ng klei mĭn kơ klei tŭ dưn leh anăn klei khăp kơ mnuih mkăn, msĕ si Khua ƀĭng kna Y-Pôl bi knap leh ñu pô čiăng kơ pô mkăn amâo lĕ ôh: “Kyua anăn tơdah sa mta mnơ̆ng ƀơ̆ng huă bi lĕ ayŏng adei kâo, kâo amâo srăng ƀơ̆ng kđeh čĭm ôh, huĭdah kâo bi lĕ ayŏng adei kâo” (I Kôrantô 8:13). Bi knhuah hdĭp tal dua, kbiă hriê mơ̆ng klei huĭ kơ klei mnuih mkăn ktĭng ksiêm, mơ̆ng klei čiăng mâo klei mnuih mkăn tŭ, boh knhal tuč jing boh sĭt gơ̆ ñu pô leh anăn mnuih mkăn amâo mă tŭ klei tŭ dưn ôh. Knhuah hdĭp tal sa bi mơak kơ Khua Yang, knhuah hdĭp tal dua knŏng čiăng bi mơak kơ mnuih ƀiădah amâo uêñ ôh Khua Yang mơak hĕ amâodah hơăi.
Klei čiăng lač kơ drei jing phung đăo kơ Krist hruê anei jing si klei êngiê drei mâo hlăm klei hdruôm hră Klei Aê Diê Blŭ amâo tuôm ghă klă ôh msĕ si klei mnăm kpiê ƀiêr, klei djŭp hăt, klei in jin, klei blei mrô, lu klei mkăn đa đa…Akâo Khua Yang đru drei čuăn ngă nanao tui si klei thâo săng nao mbĭt hŏng klei khăp, mĭn nanao kơ klei čiăng bi mơak kơ Khua Yang leh anăn bak lei tŭ dưn kơ phung ayŏng adei.
Klei hdĭp drei dôk bi mđĭ ai kơ phung ayŏng adei hĕ amâodah dôk bi têč hnêč kơ phung ayŏng adei? Ya klei drei čuăn ngă leh hriăm klei hriăm anei?
Wah lač: Ơ Khua Yang, đru kâo hŏng klei luă gŭ hriăm Klei Ih Blŭ čiăng thâo săng klă kơ klei Ih čiăng. Akâo Ih bi ktang kâo čiăng kơ klei kâo thâo săng jing klei thâo săng bŏ hŏng klei khăp leh anăn bi mđĭ ai mnuih mkăn. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yôp 16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
