Malakaus 15:22-24
Nqe cim:
“Yexus Khetos yog tus uas ris peb lub txim saum tus ntoo khaublig, kom txojkev txhaum tsis muaj hwjchim kav peb, peb thiaj ua tau neeg ncaj ncees” (I Petus 2:24a).
Lus nug rau sawvdaws xav:
– Tswv Yexus raug ntsia rau saum tus ntoo khaublig zoo licas?
– Vim licas hnub tus Tswv tuag thiaj tau hu ua “Hnub Rau Kaj Siab”?
– Peb tau qhuab ntuas licas thaum saib ntsoov Tus uas raug ntsia rau saum tus ntoo khaublig?
Hnub no yog Hnub Xya, peb los sibcog xav txog Hnub Rau Tswv Yexus raug ntsia, thiab vim licas luag hu hnub ntawd ua “Hnub Rau Kaj Siab”. Phau Malakaus tsuas sau luv luv hais tias, “Thaum lawv muab Yexus ntsia rau saum ntoo khaublig lawm” (nqe 24a) vim cov neeg nyeem tiam ntawd totaub meej qhov uas raug ntsia rau saum ntoo khaublig zoo licas. Tomqab uas raug ntaus sab sab, luag coj Tswv Yexus mus ntsia rau saum roob Khaulakhauthas, luag muab tej ntsia hlau loj ntsia tshab plaws Tswv Yexus dab teg thiab dab taws ua rau Nws raug mob kawg nkaus li. Qhov txaus ntshai tshaj yog Nws tsis tuag tamsim ntawd. Cov tubrog Loos muab ib tug kav tauj chob ib lub xwbkuab raus cawv txiv hmab qaub cev mus rau ntawm Tswv Yexus qhovncauj kom nws ntaug mob mentsis tiamsis Nws tsis kam haus. Tus Tswv xav tiv qhov kev mob no kom txaus nkaus. Nyob hauv phau ntawv Zaj Plaub Tua Tswv Yexus, Kws Xibhwb John MacArthur piav qhia txog qhov txaus ntshai thaum ntsia neeg rau saum ntoo khaublig li no: “Yuav nqus pa, tus neeg raug ntsia yuav tsum ncab ib ce, tso tag nrho lub cev rau ob txhais tes taw uas raug ntsia, thiab cia nraub qaum uas raug nplawm to tiag rau ntawm tus ntoo khaublig. Thaum tus neeg raug ntsia tsis muaj zog tsa taubhau lawm ces ua tsis taus pa ntxiv, thaum kawg raug txhaws qa tuag”.
Ntawd yog Hnub Rau, hnub uas Tswv Yexus raug teem txim, raug kwv ntoo khaublig rhais ruam rau ncua kev txomnyem mus lawm saum roob Khaulakhauthas thiab raug ntsia rau saum tus ntoo khaublig. Nws cov ntshav ntws nto. Nws lub cev raug mob. Nws ntsujplig qaug zog. Neeg ibncig thuam hnyos. Vaj Leej Txiv muab tso. Nws nyob ntawd ib leeg thiab raug tuag. Hnub Rau ntawd yog hnub tsaus ntuj nti. Tswv Yexus txojkev tuag tsis yog raug swb. Tiamsis, yog kev muaj yeej vim twb daws tau kev txhaum lub txim lawm. Hnub Rau tsaus nti thiaj dhau los ua “Hnub Rau Kaj Siab” vim “Yexus Khetos yog tus uas ris peb lub txim saum tus ntoo khaublig, kom txojkev txhaum tsis muaj hwjchim kav peb, peb thiaj ua tau neeg ncaj ncees” (I Petus 2:24).
Nyob hauv Koob Tsheej Nco Txog Tswv Yexus Raug Txomnyem xyoo no, peb txhua tus cia li tig ntsia tus ntoo khaublig, qhov chaw thaum ub Tswv Yexus raug txomnyem kom saib pom tus kheej tej kev txhaum phem qias, thiab pom tus Tswv txojkev hlub loj kawg nkaus pub rau peb. Cia li tig ntsia saum tus ntoo khaublig kom pom hais tias hnub ntawd tseeb yog “Hnub Rau Kaj Siab”, yog hnub peb tau zam txhua txoj kev txhaum, tau pub muaj lub neej tshiab, kov yeej kev txhaum, muaj nqis rau tus Tswv.
Thov Vajtswv,
Tus Tswv Cawmseej, thaum tig ntsia tus ntoo khaublig uas Koj raug ntsia, nyuam yaus pom txog tus kheej tej kev txhaum loj heev, tiamsis Koj txojkev hlub tseem loj tshaj. Nyuam yaus tsis muaj txaus suab lus los ua Koj tsaug vim Koj ris nyuam yaus lub txim. Thov ua Koj tsaug vim “Hnub Rau Kaj Siab”. Thov kom Koj tau koob meej dhau ntawm nyuam yaus lub neej hnub no thiab mus ibtxhis! Amees.
Peb pom dabtsi thaum tig ntsia tus ntoo khaublig uas thaum ub Tswv Yexus raug txomnyem?
Nyeem Vajluskub hauv peb lub xyoo: Nahus 2:11-3:19
Kênh Youtube BHKTHN:
