Pajlug 19:16-23
Nqe cim:
“Cov menyuam, nej yuav tsum mloog nej niam nej txiv lus, thiaj raws li tus Tswv txoj kevcai.” (Efexus 6:1).
Lus nug rau sawvdaws xav:
- Vajntxwv Xalumoos qhia li cas txog qhov kev mloog niamtxiv lus hauv tus Tswv?
- Thaum mloog niamtxiv lus hauv tus Tswv muaj nqis li cas?
- Muaj yam dabtsi peb cheemtsum hloov kev xav thiab kev ua thaum mloog niamtxiv tej lus qhia hauv tus Tswv?
Vajntxwv Xalumoos hais kom cov menyuam yuav tsum ua tib zoo mloog niamtxiv lus hauv tus Tswv. Nws siv lo lus “hwm” txhais tau hais tias “ua raws” los hais qhov tseemceeb ntawm tes haujlwm mloog niamtxiv tej lus qhia raws li tus Tswv txoj kevcai hais: “Hwm tus Tswv txoj kevcai, koj thiaj yuav muaj sia ua neej nyob ntev.” (nqe 16a). Tus neeg uas tsis ua tib zoo saib, tsis mloog niamtxiv tej lus qhia, saib tsis taus tus Tswv txoj kevcai yuav tuag (nqe 16b). Qhov uas ua tib zoo mloog niamtxiv lus, tus menyuam kuj yuav tsum xyaum tswj tus kheej, thiab txaus siab hlo cia niamtxiv ntuas qhia hauv txojkev hlub. Mloog tej lus ntuas tsis tau txaus, tiamsis yuav tsum kawm tej lus cob qhia, ua li ntawd lub neej thiaj txawj ntse (nqe 20). Nqe lus “muaj ib hnub” hais txog nqi zog rau lub neej tom ntej. Rau qhov nimno tej lus uas niamtxiv ntuas raws li tus Tswv lub siab nyiam yuav ua rau menyuam pom hais tias nws ua tsis tau li tej phoojywg, ntiajteb, tiamsis yog mloog lus thaum kawg yuav pom tej ntawd muaj nqis rau menyuam, ua rau meyuam txawj ntse.
Hauv feem xaus ntawm ntu Vajluskub no, Vajntxwv Xalumoos qhia paub qhov muaj nqis ntawm kev hwm tus Tswv: “Hwm tus Tswv, koj thiaj muaj sia ua neej nyob ntev, muaj kev txaus siab thiab tsis raug xwm phem dabtsi.” (nqe 23) Hwm tus Tswv tsis yog ua kom tau txojsia ntev dhawv ibtxhis xwb, tiamsis hauv lub neej tamsim no muaj kev txaus siab. Tej kev txomnyem hauv lub ntiajteb, txawm yuav tshwmsim tuaj los yuav thaiv tsis tau peb txojkev ntseeg li.
Timthawj Paulus qhia rau cov ntseeg: “Cov menyuam, nej yuav tsum mloog nej niam nej txiv lus, thiaj raws li tus Tswv txoj kevcai.” (Efexus 6:1). Peb txhua tus cheemtsum yuav tau mloog niamtxiv lus hauv tus Tswv, vim niamtxiv tej lus ntuas lossis qhia yog tej uas niamtxiv kawm tau ntawm tus Tswv, kev ua neej nrog tus Tswv, thiab ntawm txojkev hlub cov menyuam, xav kom menyuam ua tau neeg zoo haum tus Tswv siab. Tus cwjpwm uas ua tib zoo mloog tej lus qhia yuav pab kom peb paub mloog tej lus qhia, pab tau peb txawj ntse, hwm tus Tswv. Txawm yog niamtxiv ua yuam kev los menyuam yuav tsum nco ntsoov niamtxiv yeej hlub, txhawj menyuam heev. Tus Tswv Txojlus cog lus tseg hais tias yog peb ua lub neej hwm thiab mloog Nws lus, Nws yuav pub rau peb muaj txojsia nyob ntev thiab txaus siab, kaj siab hauv lub neej.
Thov Vajtswv,
Nyuam yaus tus Vajtswv, Koj pub rau nyuam yaus muaj niamtxiv hwm Koj, qhia nyuam yaus paub Koj tej kevcai. Thov Koj pub nyuam yaus ua lub siab mos muag, ua siab ntev mloog niamtxiv lus, kom nyuam yaus lub neej tau koob hmoov thiab tau txojsia ntev ibtxhis. Amees.
Peb muaj tus cwjpwm thiab ua li cas thaum mloog niamtxiv qhia tus Tswv tej lus?
Nyeem Vajluskub hauv peb lub xyoo: Hauxeyas 2:14-4:11
Kênh Youtube BHKTHN:
