Klei Aê Diê Blŭ: Klei Bi Hriêng 19:16‑23
Êlan kliăng: “Ơ phung anak, gưt bĕ kơ amĭ ama hlăm Khua Yang, kyuadah klei anăn jing djŏ” (Êphêsô 6:1)
Klei êmuh ksiêm mĭn: Si ngă mtao Y‑Salômôn mtô kơ klei gưt kơ amĭ ama hlăm Khua Yang? Ya boh tŭ dưn mâo tơdah gưt kơ amĭ ama hlăm Khua Yang? Mâo mơ̆ klei drei čiăng bi mlih hĕ hlăm klei mĭn leh anăn klei ngă tơdah hmư̆ klei amĭ ama mtô lač hlăm Khua Yang?
Mtao Y‑Salômôn mtă kơ anak brei gưt sĭt êmĭt kơ amĭ ama pô hlăm Khua Yang. Ñu yua boh blŭ “djă pioh” lŏ mblang jing “gưt” čiăng kñăm boh yuôm kơ klei gưt tui si klei amĭ ama bi hriăm kơ klei Aê Diê mtă: “Hlei pô djă pioh klei Yêhôwa mtă srăng hdĭp sui” (êlan 16a). Bi mklăk wĭt, bi phung kƀah klei thâo răng, amâo gưt ôh klei amĭ ama mtô, bi êmut kơ êlan Khua Yang sĭt srăng djiê(êlan 16b). Mđrĭng hŏng klei gưt asăp sĭt kơ amĭ ama, brei anak hriăm mơh kơ klei thâo kpĭ mjuăt, leh anăn tŭ kơ klei amĭ ama mkra mjuăt hŏng klei khăp. Knŏng hmư̆ mă klei mtô lač ka djăp ôh, ƀiădah brei mă tŭ mơh klei kčĕ, snăn kơh anak dưi mâo klei thâo mĭn mơ̆ng Aê Diê (êlan 20). Pruê̆ blư̆ “mơ̆ng anei kơ anăp” kñăm kơ boh tŭ dưn êdei anăp. Kyuadah êjai ară anei hin năng ai anak ƀuh jih jang klei amĭ ama bi hriăm tui si klei Aê Diê čiăng ngă kơ ñu amâo hmao phung ƀĭng găp ôh, ƀiădah tơdah gưt asăp, ñu srăng ƀuh ti knhal tuč jih jang klei anăn mâo klei tŭ dưn kơ ñu, klei thâo mĭn srăng tui hlue ñu jih klei hdĭp.
Bi ruê̆ kơ trăn anei, mtao Y‑Salômôn bi êdah klă hĭn boh tŭ dưn yuôm mơ̆ng klei huĭ mpŭ kơ Aê Diê: “Klei huĭ mpŭ kơ Yêhôwa atăt kơ klei hdĭp, hlei pô mâo klei anăn srăng mơak, klei rŭng răng amâo srăng truh kơ ñu ôh.” (êlan 23). Amâo djŏ klei huĭ mpŭ kơ Aê Diê knŏng brei klei hdĭp hlŏng lar ôh, ƀiădah brei wăt klei hơ̆k mơak hlăm klei hdĭp anei msĕ mơh. Wăt tơdah jih jang klei knap mñai bhiâo ti lăn ala srăng truh dưn, amâo dưi gang ôh drei nao truh ti anôk bi kčah leh ktuê êlan êbat myang.
Khua ƀĭng kna Y‑Pôl lŏ mñă klei Khua Yang mtă leh kơ grăp čô phung đăo snei: “Ơ phung anak, gưt bĕ kơ amĭ ama hlăm Khua Yang, kyuadah klei anăn jing djŏ.” (Êphêsô 6:1). Brei grăp čô drei gưt kơ amĭ ama drei hlăm Khua Yang kyuadah jih jang klei amĭ ama bi hriăm amâodah kčĕ kbiă hriê mơ̆ng klei digơ̆ hriăm leh mơ̆ng Khua Yang, hdĭp hŏng Khua Yang leh anăn mơ̆ng klei khăp kơ anak, čiăng kơ anak jing sa čô mnuih hdĭp thâo bi mơak kơ Khua Yang. Tơdah hmư̆ klei kčĕ hŏng klei sĭt êmĭt srăng đru drei mă tŭ djăp klei bi hriăm mơ̆ng amĭ ama, đru drei hdĭp hŏng klei thâo mĭn, huĭ mpŭ kơ Aê Diê, wăt tơdah amĭ ama mâo klei soh čhuai, ƀiădah brei phung anak hdơr amĭ ama ăt khăp, uêñ mĭn nanao kơ anak cô. Klei Aê Diê Blŭ ƀuăn tơdah drei huĭ mpŭ kơ Aê Diê leh anăn gưt asăp Ñu, Ñu srăng brei kơ drei klei hdĭp hlŏng lar leh anăn klei hơ̆k mơak, klei êđăp ênang hlăm klei hdĭp.
Si knuih leh anăn klei ngă drei mâo tơdah hmư̆ amĭ ama bi hriăm Klei Aê Diê Blŭ?
Wah lač: Ơ Khua Yang, kâo bi mni kơ Ih brei leh kơ kâo mâo ama leh anăn amĭ thâo huĭ mpŭ kơ Ih bi hriăm kâo hdĭp gưt kơ klei Ih mtă. Ơ Khua Yang brei bĕ kơ kâo mâo klei êdu êun, thâo gĭr mđing hmư̆ leh anăn gưt asăp čiăng kâo dưi mă tŭ klei jăk jĭn hlăm klei hdĭp anei wăt klei hdĭp hlŏng lar hlăm ênuk êdei msĕ mơh.
Dlăng Klei Aê Diê Blŭ hlăm tlâo thŭn: Y‑Ôsê 2:14‑4:11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
