Pajlug 19:3
“3 Muaj ibtxhia raug kev puastsuaj vim lawv tej haujlwm ruam thiab lawv liam txim rau tus Tswv.”( Pajlug 19:3)
Lus nug rau sawvdaws xav:
- Vajntxwv Xalumoos qhia paub kev puastsuaj los qhovtwg los?
- Tus cwjpwm ua thaum raug kev puastsuaj ntawm yus yog dabtsi?
- Vim li cas ua li ntawd yog ruam?
- Peb cheemtsum muaj tus cwjpwm twg thaum yus raug puastsuaj?
Nqe Pajlug no qhia meej “kev” lossis ntu neej ntawm tus neeg raug “puastsuaj” yog vim “nws tej haujlwm ruam”. “Ruam” qhia tawm rau sab nraud yog qhia tawm qhov kev “ruam” sab hauv, txawv li qhov kev ntse, paub ntawm Vajtswv. Thaum ib tug neeg ua raws li nws xav heev dua li uas mloog Vajtswv lus ces tus neeg ntawd “txojkev ruam ua rau nws raug puastsuaj”. Hais ua lwm seem lus, tus neeg ruam xwbtim tua nws txhais taw, xwbtim rhuav nws lub neej.
Tiamsis twb tsimnyog zeem paub nws tej kev txhaum, los cov neeg ruam uas tsis hwm tus Tswv pheej liam txim rau lwm tus thiab Vajtswv thaum lawv “liam txim rau tus Tswv”. “Liam txim” txhais tau hais tias npautaws, chim rau hauv lub siab. Tus neeg ruam zoo li ntawd tsis zeem paub nws txojkev ruam tsis paub mloog qhia kom paub hloov, tiamsis tsuas npautaws thiab liam txim rau Vajtswv xwb. Twb yog vim lawv tsis pom qhov vimchiv ua txhaum yog yus tus kheej, yog li lawv thiaj tsis hloov lawv lub neej.
Txojkev khavtheeb thiab muab yus tus kheej saib tseemceeb ua rau tibneeg ua txhaum thiab kuj yog qhov vimchiv ua rau neeg dig muag, tsis kam lees txhaum thiaj li yim hnub yim ua txhaum ntxiv, rhuav tshem yus lub neej thiab tej neeg nyob ibncig. Ka-ees ua txhaum tua nws tus kwv Anpees, tiamsis Ka-ees tsis kam lees txhaum thiab pom hais tias Vajtswv ua tsis ncaj (Chivkeeb 4:3-12). Ka-ees “liam txim rau tus Tswv” yog li nws ntsaws pobntseg tsis mloog tus Tswv tej lus qhia thiab ua rau nws “raug kev puastsuaj.”
Ntau leej pheej npautaws thaum pom hais tias Vajtswv thiab lwm tus ua tsis ncaj rau lawv, thiab thaum npautaws ces lawv liam txim rau Vajtswv, rau lwm tus thiab Pawg Ntseeg. Cov neeg zoo li no “ua tsis taus siab ntev” (nqe 2b) – txhais tau hais tias maj hais tej lus mob siab, lus chim, rhuav kev sib raug zoo hauv Pawg Ntseeg, tso haujlwm tseg, khiav tawm Pawg Ntseeg… – thiab vim qhov ntawd ua rau nws “ua txhaum”, lossis xwbtim ua txhaum, thiab poob lub homphiaj tus Tswv muab.
Leejtwg los yeej muaj qhov txhaum, tiamsis tus neeg uas paub npaj rau lub neej ntseeg Yexus raws li Vajtswv Txojlus qhia ces yuav paub txo hwjchim mloog kev ntuas, tsis maj npautaws, zeem paub feem xyuam thiab tej kev txhaum nws tau ua, paub lees txim rau tus Tswv, thiab paub hloov tso kev txhaum tseg (I Yauhas 1:9).
Thov Vajtswv,
Vajtswv, thov Koj pub rau nyuam yaus muaj txojkev txawj ntse thiab lub siab txo hwjchim thaum ntsib tej kev tsis zoo hauv lub neej, kom nyuam yaus paub qhov uas Koj qhia, paub lees txim, thiab cia tus Tswv hloov. Amees.
Peb puas liam txim rau Vajtswv thaum raug kev puastsuaj thiab?
Nyeem Vajluskub hauv peb lub xyoo: Daniyees 9:20-11:4
Kênh Youtube BHKTHN:
