Tlă Anăp Hŏng Klei Dluh Lĕ – 8/3/2023

1369

 

Klei Aê Diê Blŭ: Klei Bi Hriêng 19:3

Êlan kliăng: “Klei mluk sa čô mnuih bi rai klei hdĭp ñu, ƀiădah lĕ ai tiê ñu ngêñ kơ Yêhôwa” (Klei Bi Hriêng 19:3)

Klei êmuh ksiêm mĭn: Mtao Salômôn hưn mơ̆ng kbiă hriê klei dluh lĕ kơ sa čô mnuih? Ya klei mnuih khăng wĭt ngă tơdah tlă anăp hŏng klei dluh lĕ ñu pô? Ya ngă klei wĭt ngă msĕ snăn jing klei mluk? Si knhuah brei drei mâo hŏng klei dluh lĕ drei pô?

Êlan Klei Bi Hriêng ktrâo klă “êlan” amâodah knhuang klei hdĭp sa čô mnuih “bi rai” kyua mơ̆ng “klei mluk sa čô mnuih” ñu pô yơh. “Klei mluk” bi êdah ti êngao jing klei bi ktlă mơ̆ng “klei mluk” hlăm lam, bi mklăk hŏng klei thâo mĭn, klei thâo săng mơ̆ng Aê Diê. Tơdah sa čô mnuih êbat tui si êlan ñu pô hĭn kơ klei đup gưt kơ Aê Diê snăn mnuih anăn “bi rai klei hdĭp ñu”. Blŭ mdê, mnuih mluk mnah ti jơ̆ng ñu pô, bi rai klei hdĭp ñu pô.

Ƀiădah hrô kơ klei thâo kral klei soh ñu pô, phung mluk amâo huĭ mpŭ kơ Aê Diê ôh ƀiădah bi lĕ klei soh ñu kơ pô mkăn, leh anăn wăt kơ Aê Diê pô mơh tơdah diñu “ngêñ kơ Yêhôwa”. “Ngêñ” čiăng lač ăl, krêñ, čuih klei phĭ hlăm ai tiê. Sa čô mnuih mluk msĕ snăn amâo lŏ thâo kral klei mluk ñu pô ôh, amâo thâo mđing hmư̆ ksiêm hriăm čiăng bi mlih ôh ƀiădah lŏ ăl krêñ leh anăn ngêñ kơ Aê Diê hĭn êjai lĕ. Kyua klei ñu amâo ƀuh ôh phŭn knhal ngă klei soh jing mơ̆ng ñu pô, snăn yơh ñu amâo dưi bi mlih ôh klei hdĭp ñu.

Klei mgao leh anăn mdưm pô jing ti krah kơ jih jang yơh jing phŭn knhal ngă kơ anak mnuih ngă soh leh anăn wăt jing phŭn knhal ngă bi mmăt ală, amâo čiăng tŭ ôh klei soh pô snăn ƀrư̆ hruê kdlŭt êlam hĭn hlăm klei soh, bi rai klei hdĭp pô leh anăn phung riêng gah. Y‑Kain ngă soh bi mdjiê Y‑Abel, ƀiădah ñu amâo ƀuh ôh klei soh ñu ngă leh anăn ñu bi ƀuh kơ Aê Diê yơh amâo mâo mtăp mđơr (Klei Mphŭn Dơ̆ng 4:3‑12). Y‑Kain “ngêñ kơ Yêhôwa” kyuanăn ñu kăt ƀăng knga kơ klei Aê Diê hưn êlâo brei ñu răng leh anăn atăt kơ klei “bi rai klei hdĭp ñu” .

Lu mnuih ăt khăng ăl tơdah ñu bi ƀuh kơ Aê Diê leh anăn pô mkăn amâo hdĭp mtăp mđơr hŏng ñu, leh anăn êjai hlăk dôk ăl diñu ngêñ kơ Aê Diê, kơ mnuih mkăn leh anăn kơ Phung Sang Aê Diê. Phung anei “ruăt nao” (êlan 2b) – čiăng lač ruăt blŭ klei phĭ klei jhat kyua mĭn đei kơ diñu pô, ruăt juă lin, bi kruh klei bi mguôp hlăm Phung Sang Aê Diê, ruăt phưi lui bruă dôk ngă leh anăn klei iêô mthưr, ruăt đuĕ kbưi mơ̆ng Phung Sang Aê Diê… – leh anăn kyuanăn yơh diñu “wơr êlan”, djŏ hĭn jing bi wơr êlan diñu pô, leh anăn bi luč anôk bi kčah Khua Yang pioh leh kơ diñu.

Jih jang mnuih ăt tuôm soh sơăi, ƀiădah hlei pô thâo duh kơ knhuah hdĭp phung đăo thâo mĭn tui si Klei Aê Diê Blŭ mtô, srăng thâo luă gŭ mđing hmư̆ klei ƀuah mkra, amâo ruăt wĭt ngă tui si klei bi djhưng ai ăl ngêñ pô ôh, thâo tŭ bruă klam kyua klei soh pô ngă, thâo kmhal hưn klei soh hŏng Khua Yang, leh anăn thâo bi mlih êlan klei mluk pô dôk tui tiŏ (I Y‑Yôhan 1:9).

Si ngă drei ngêñ kơ Aê Diê mơ̆ tơdah tuôm hŏng klei dluh lĕ?

Wah lač: Ơ Khua Yang, brei kâo mâo sa klei mĭn thâo săng mngač leh anăn sa ai tiê luă gŭ hlăk tlă anăp hŏng klei dluh lĕ hlăm klei hdĭp, čiăng thâo kral klei ƀuah mkra mơ̆ng Khua Yang, thâo kmhal kơ klei soh leh anăn bi knal klei lŏ bi mrâo mơ̆ng Khua Yang.

Dlăng Klei Aê Diê Blŭ hlăm tlâo thŭn: Y‑Đaniel 9:20‑11:4

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm

Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com

Kênh Youtube BHKTHN:

https://www.youtube.com/c/bhkthn

Bài trướcRaug Kev Puastsuaj – 8/3/2023
Bài tiếp theoĐối Diện Với Những Thất Bại – 8/3/2023