II.Xwmtxheej Vajntxwv 12:7-16
Nqe cim:
“Kuv ua koj tes haujlwm kom zoo kawg kuv lub siab lub ntsws; thov pab kom kuv txhob tawv dhau koj tej lus samhwm. Kuv khaws koj tej lus rau hauv kuv lub siab, kuv thiaj tsis ua txhaum rau koj” (Phau Ntawv Nkauj 119:10-11).
Lus nug rau sawvdaws xav:
– Vajntxwv Iziv nqa yam dabtsi hauv lub Tuamtsev mus?
– Vajntxwv Lehaunpau-as ua licas thaum raug tej ntawd?
– Lehaunpau-as raug ntaus nqi hais tias yog ib tug neeg muaj kev sib raug zoo nrog tus Tswv licas?
– Txojkev sib raug zoo ntawm peb thiab tus Tswv tamsim no zoo licas?
Thaum Vajntxwv Lehaunpau-as thiab cov Yudas tej thawjcoj txo hwjchim lees txim ces Vajtswv pub lub tebchaws tsis raug kev puastsuaj tiamsis yuav tsum tau ris tej nqi zog ntawm txojkev txhaum. Lawv yuav tsum ua qhev rau vajntxwv Iziv, thiab tej khoom tseemceeb hauv lub Tuamtsev, tagnrho tej thaiv hniav ntaj kub uas Vajntxwv Xalumoos ua kuj raug coj mus huvtibsi. Vim tebchaws Yudas tsis npluanuj zoo li thaum ub lawm yog li Vajntxwv Lehaunpau-as thiaj muab tooj los ua dua ib cov thaiv hniav ntaj hloov. Tebchaws Yudas yog ib lub tebchaws npluanuj, vammeej tiamsis thaum tso tus Tswv txoj kevcai tseg, lawv tsis tau koob hmoov lawm. Cov thaiv hniav ntaj tooj hloov cov thaiv hniav ntaj kub chaw qhia paub txojkev sib raug zoo ntawm vajntxwv thiab tej pejxeem nrog tus Tswv tsis zoo li thaum thawj, nws yog txojkev sib raug zoo tu ncab tu ncua, tsis zoo li thaum ub lawm.
Vajntxwv Lehaunpau-as tsis nrhiav tswvyim yuav ua licas kom mus nqa tau cov thaiv hniav ntaj kub rov los, nws cia li txaus siab rau cov thaiv hniav ntaj tooj uas tsis muaj nqis. Lehaunpau-as twb muaj sijhawm txhim kho txojkev sib raug zoo nrog tus Tswv, mloog lus thiab taug Nws txojkev tiamsis nws tsis kam. Txawm yog nws tseem tau ua vajntxwv kav tebchaws ntxiv kaum ob xyoos los nws raug ntaus nqi hais tias “Lehaunpau-as ua kev phem kev qias, rau qhov nws tsis muab siab rau nrhiav tus Tswv” (nqe 14). Vajntxwv tsis muaj kev hloov lub neej sab ntsujplig thiab kev sib raug zoo nrog tus Tswv, nws cia li txaus siab rau lub neej uas tsis muaj nqis xwb.
Thaum tsis nrhiav tus Tswv kawg siab kawg ntsws, cia Nws ua tus Tswv hauv yus lub neej, ces neeg yoojyim ua raws li tus yamntxwv nqaij tawv. Tus neeg nrhiav tus Tswv kawg siab kawg ntsws yog tus uas tsis hla dhau Nws tej lus samhwm vim nws khaws tus Tswv tej lus rau hauv siab kom thiaj tsis ua txhaum rau Nws (Phau Ntawv Nkauj 119:10-11). Txawv li Vajntxwv Xalumoos, Vajntxwv Lehaunpau-as tsis nrhiav tus Tswv kom tau Nws txojkev txawj ntse. Thawj peb lub xyoos ua vajntxwv kav tebchaws zoo, tiamsis tom qab ntawd nws coj tus Tswv haivneeg mus ua txhaum pemlom. Vajntxwv Lehaunpau-as tsis muaj txojkev sib raug zoo nrog tus Tswv yog li thiaj tsis ua raws li Nws tej lus samhwm.
Ntsia rau cov ntseeg Yexus lub neej thiab tej uas lawv nrhiav, peb yuav paub tau txojkev sib raug ntawm tus neeg ntawd nrog tus Tswv. Yog pheej niaj hnub “khaws koj tej lus rau hauv kuv lub siab” ces yuav tsis ua txhaum rau tus Tswv. Tiamsis yog peb tsuas muaj lub npe hu ua tus ntseeg mus pehawm, rau siab ua tej haujlwm hauv Pawg Ntseeg… tsis muaj lub siab npuab nrhiav tus Tswv thiab Nws Txojlus kawg siab kawg ntsws, tsis muaj lub siab mloog tus Tswv lus los ntawm yus kev ua neej dawbhuv ces peb yuav tsis tau tej nqi zog muaj nqis uas tus Tswv pub li.
Koj puas tabtom nrhiav tus Tswv kawg siab kawg ntsws lossis yog lub siab tsuas nrhiav tej uas tsis muaj nqis xwb?
Thov Vajtswv,
Tus Tswv, thov Koj zam txim rau nyuam yaus lub neej uas pheej nrhiav tej yam uas tsis muaj nqis zoo li cov neeg thaum ub. Thov Koj pub kom nyuam yaus muaj lub neej ntseeg zoo, nrhiav tus Tswv kawg siab kawg ntsws, thiab ua raws li Koj tej lus samhwm. Amees.
Nyeem Vajluskub hauv peb lub xyoo: Phau Ntawv Nkauj 97:1-98:9
Kênh Youtube BHKTHN:
