Klei Aê Diê Blŭ: Y-Êsai 53:1-4
Êlan kliăng: “Sĭt nik Ñu klam leh klei ruă duam drei, Ñu gui leh klei ênguôt hnĭng drei, ƀiădah drei yap Ñu msĕ si pô Aê Diê bi kmhal, pô Aê Diê čăm leh anăn bi knap.” (Y-Êsai 53:4).
Klei êmuh ksiêm mĭn: Si klei khua pô hưn êlâo Y-Êsai hưn mdah klei phung mnuih ênuk anăn dlăng kơ Khua Yang Yêsu? Ya klei Khua Yang gĭr tŭ kyua drei? Si drei thâo săng kơ klei khăp Khua Yang pioh kơ drei?
Klei bhiăn mơ̆ng đưm phung Israel đăo kơ Yang Mêsi jing Mtao bŏ hŏng klei ktang myang leh anăn bruă jao kơ Ñu jing bi rai phung čar Rôm. Ƀiădah hlăm Y-Êsai 53, hưn yăl kơ Yang Mêsi jing pô luă gŭ snăk, bŏ hŏng klei ênguôt leh anăn arăng bi êmut. Phung Israel amâo đăo ôh klei khua pô hưn êlâo hưn kơ Yang Mêsi msĕ si klei khua pô hưn êlâo Y-Êsai lač: “Hlei pô đăo leh kơ klei hmei hưn…”, Khua pô hưn êlâo Y-Êsai ăt hưn êlâo wăt kơ klei phung Israel dlăng kơ Khua Yang Yêsu “… Ñu amâo mâo klei kƀăt amâodah klei kdrăm ôh tơl brei drei čiăng dlăng kơ Ñu, leh anăn amâo mâo klei siam ôh tơl drei khăp kơ Ñu”. Y-Natanel pô ăt lač klei anei mơh hlăk arăng hưn Khua Yang Yêsu kơ ñu (Y-Yôhan 1:46).
Hlăm yan bi hdơr kơ Klei Khua Yang Tŭ Klei Knap Mñai leh anăn Klei Kbiă Lŏ Hdĭp, brei drei bi êmuh drei pô si ngă drei dôk dlăng kơ Khua Yang Yêsu msĕ si hơăi mang mơ̆? Čiăng lač drei dôk khăp kơ Khua Yang leh anăn gưt asăp Ñu, drei dôk mpŭ kơ Khua Yang jing Khua Yang, jing Khua kơ klei hdĭp drei, drei dôk jhŏng kah mbha klei pap mă tŭ klei bi mtlaih kơ pô mkăn mơ̆? Năng ai phung ka đăo dôk dlăng hơăi mang kơ Khua Yang ƀiădah bi drei, jing phung mă tŭ leh klei bi mtlaih ƀiădah ăt hdĭp dlăng hơăi mang klei bhiăn Khua Yang leh anăn klei bi mtlaih drei mă tŭ leh, snăn drei dôk bi ênguôt Khua Yang yơh. Leh anăn brei drei hdơr klei khua pô hưn êlâo Y-Êsai lač leh hlăm êlan 4, êjai Khua Yang Yêsu klam klei ruă duam leh anăn gui klei ênguôt hnĭng hrô kơ klei soh drei, “ƀiădah drei yap Ñu msĕ si pô Aê Diê bi kmhal, pô Aê Diê čăm leh anăn bi knap”. Khua Yang Yêsu yơh pô klam brei kơ drei, kơ mnuih soh năng rai luč (êlan 5). Đăm mâo pô čhuai ôh mĭndah drei mâo klei năng mâo klei bi mtlaih, ƀiădah brei thâo hdơr knga bi mni kơ Khua Yang, Pô tŭ leh klei knap mñai kyua drei, brei klei bi mtlaih kơ drei. Brei drei jhŏng kah mbha klei Khua Yang Yêsu Tŭ Klei Knap Mñai kơ phung ka mă tŭ klei bi mtlaih.
Si ngă drei hdơr knga bi mni kơ Khua Yang tŭ klei arăng bi êmut leh anăn hngah kyua drei mơ̆? Drei jhŏng kah mbha Klei Khua Yang Tŭ Klei Knap Mñai, Kbiă Lŏ Hdĭp kơ pô mkăn leh mơ̆?
Wah lač: Ơ Khua Yang Yêsu, bi mni lač jăk kơ Khua Yang, kyua klei soh kâo Ih tŭ leh klei Aê Diê čăm leh anăn bi knap, akâo kơ Khua Yang brei kâo ktur čih hdơr knga kơ klei pap Khua Yang nanao, čiăng kơ klei hdĭp kâo bi mơak kơ Ih.
Dlăng Klei Aê Diê Blŭ hlăm tlâo thŭn: Y-Yôp 19:21-29; 20:1-29
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
