II Kauleethaus 1:1-7
Nqe cim:
“Nws txhawb peb lub zog thaum peb raug txhua yam kev nyuaj siab, kom peb thiaj txhawb tau lwm tus lub zog thaum lawv raug tej kev nyuaj siab; peb txhawb lwm tus lub zog ib yam li Vajtswv twb txhawb peb lub zog lawm” (II Kauleethaus 1:4).
Lus nug rau sawvdaws xav:
- Tus sau phau II Kauleethaus yog leejtwg thiab sau xa mus rau leejtwg?
- Vim licas cov lus qhib thawj tus sau tsab ntawv hais txog Vajtswv txojkev txhawb zog?
- Kev txhawb zog uas Timthawj Paulus txais ntawm tus Tswv muaj qab hau licas?
- Peb tau saj yam ntawd zoo licas hauv lub neej?
Ib tsoom cov mloog txhua tus,
Txawm yog twb qhia ua ntej hauv thawj tsab ntawv uas xa mus rau Pawg Ntseeg hauv Kauleethaus lawm, tiamsis hauv tsab ntawv tim ob no Timthawj Paulus rov qab hais txog nws ib zaug ntxiv rau cov nyeem tsab ntawv paub hais tias nws yog “Yexus Khetos ib tug timthawj” uas tabtom ua haujlwm “raws li Vajtswv lub siab nyiam” tsis yog ua raws li neeg lub siab nyiam lossis nws lub siab nyiam, vim tus Tswv yog tus xaiv, hu thiab txib Paulus thaum nws tamtom mus rau pem lub nroog Damaxes (Tes Haujlwm 22:6-10). Lub sijhawm xa tsab ntawv no, Timautes tabtom nrog Timthawj Paulus nyob ua ke yog li nws thiaj hais txog Timautes lub npe hauv nws tsab ntawv no xa mus rau cov ntseeg Vajtswv nyob hauv Pawg Ntseeg Kauleethaus thiab cov ntseeg txhua tus uas nyob thoob plaws hauv lub xeev Akhayas.
Timthawj Paulus qhia paub cov sijhawm uas nws nrog tej phoojywg mus qhia Txojmoo Zoo, nws ntsib ntau yam kev txomnyem thiab muab tej ntawd hu ua “raug kev txomnyem ib yam li Yexus raug” (nqe 5), tiamsis thaum tej kev txomnyem los raug Paulus thiab nws cov phoojywg lub neej thaum ua Vajtswv haujlwm ces “Vajtswv yuav pab peb ib yam li Vajtswv tau pab Yexus lawm”. Vim muaj qhov kev txhawb zog li ntawd ua rau lawv muaj zog ua tes haujlwm mus qhia Txojmoo Zoo tsis qaug zog. Tsis yog li ntawd xwb, tej ntawd tseem “txhawb tau nej lub zog, thiab pab kom nej dim” (nqe 6), txhais tau hais tias, Paulus lawv tiv kev txomnyem muaj qab hau rau cov ntseeg Vajtswv nyob hauv lub nroog Kauleethaus, vim lawv tau hnov Txojmoo Zoo, tau dim txim thiab tau los ua Vajtswv cov menyuam. Hais mus rau lwm seem ces, thaum tiv dhau tej kev txomnyem thiab tau txais Vajtswv txojkev txhawb zog, Timthawj Paulus thiab nws cov phoojywg siv tej uas lawv raug ntawd mus txhawb cov uas raug txomnyem vim Txojmoo Zoo lub zog.
Thaum Tswv Yexus tseem nyob hauv ntiajteb no, Nws kuj ntsib txojkev tawmtsam mus txog qib uas tej yeebncuab tuav tswvyim tua Nws povtseg. Thiab Nws qhia ua ntej hais tias, Nws cov thwjtim kuj yuav ntsib tej uas Nws raug (Yauhas 15:18-20). Mus qhia Txojmoo Zoo yeej khiav tsis dhau tej kev txomnyem thiab kev tsimtxom li, tiamsis ua tus Tswv tsaug vim muaj Nws pab thiab txhawb zog, peb cov ua Vajtswv haujlwm, ib leeg kuj txhawb tau ib leeg lub zog thaum ntsib tej kev txomnyem nyuaj siab. Thiab tus Tswv yeej txhawb peb lub zog kom peb ib leeg paub txhawb ib leeg lub zog.
Thov Vajtswv,
Vajtswv tus uas yog Tswv Yexus Khetos Leej Txiv, Koj yog tus uas pab thiab txhawb Koj haivneeg lub zog. Thov Koj pub kom nyuam yaus tau txais kev txhawb zog ntawm Koj, nyuam yaus thiaj sawv tau ruaj khov ua tau Koj tes haujlwm thiab txhawb tau lwm tus lub zog. Amees.
Ib tsoom cov mloog uas hmov thiab tshua,
Peb puas tau txais tus Tswv txojkev kev txhawb zog thaum ntsib tej kev txomnyem thiab peb ib leeg puas paub txhawb ib leeg lub zog?
Nyeem Vajluskub hauv peb lub xyoo: Exethaws 1
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
