Klei Aê Diê Blŭ: II Kôrantô 1:1-7
Êlan kliăng: “Pô bi juh hmei hlăm jih jang klei knap mñai hmei, čiăng kơ hmei dưi bi juh phung dôk hlăm klei knap mñai, hŏng klei bi juh Aê Diê bi juh leh hmei pô.” (II Kôrantô 1:4).
Klei êmuh ksiêm mĭn: Hlei pô čih hră II Kôrantô leh anăn kơ ñu mơĭt? Ya ngă mphŭn pŏk hră anei Khua ƀĭng kna Y‑Pôl lač kơ klei Aê Diê bi juh? Si klei tŭ dưn mơ̆ng klei bi juh Khua ƀĭng kna Y‑Pôl mâo mơ̆ng Aê Diê? Si drei thâo leh klei anei?
Ơ ƀĭng dôk hmư̆! Wăt tơdah hưn mthâo leh hlăm hră tal sa mơĭt kơ Sang Aê Diê Kôrantô, ƀiădah hlăm hră tal dua anei, Khua ƀĭng kna Y‑Pôl sa blư̆ dơ̆ng hưn mthâo kơ phung dlăng hră ñu thâo bruă ñu dôk ngă khua ƀĭng kna jing “tui si klei Aê Diê čiăng” amâo djŏ klei čiăng anak mnuih amâodah klei ñu čiăng ôh, leh anăn ñu “jing khua ƀĭng kna Khua Yang Yêsu Krist” kyua Khua Yang ruah leh, bi hriăm leh anăn tiŏ nao ñu hlăk ti ktuê êlan nao ti ƀuôn Damas (Bruă Phung Khua Ƀĭng Kna 22:6-10). Wưng čih hră anei, Y‑Timôthê dôk hŏng Khua ƀĭng kna Y‑Pôl anăn ñu čih anăn jih dua čô mơĭt kơ phung đăo ti Sang Aê Diê Kôrantô leh anăn jih jang phung đaŏ hlăm kluôm krĭng Akai.
Khua ƀĭng kna Y‑Pôl brei thâo hlăm jih thŭn mlan hŏng phung ayŏng adei ngă bruă hiu hưn Klei Mrâo Mrang Jăk, ñu tuôm leh hŏng lu klei truh, ñu lač anei jing “klei knap mñai Krist” (êlan 5), khădah snăn leh klei knap mñai anei mâo hlăm klei hdĭp ñu mă bruă hŏng phung ƀĭng kna snăn hlăk anăn “msĕ snăn mơh hlăm Krist hmei mâo lu kdrêč klei bi juh”. Klei bi juh diñu mâo anăn jing klei ktang prŏng prĭn čiăng kơ diñu dưi lŏ dơ̆ng ngă bruă hiu hưn Klei Mrâo Mrang Jăk, mbĭt anăn “klei anăn pioh bi juh leh anăn bi mtlaih diih” (êlan 6), jing ba klei tŭ dưn kơ phung đăo Kôrantô kyua diñu dưi hmư̆ Klei Mrâo Mrang Jăk, dưi bi mtlaih leh anăn jing anak Aê Diê. Êngao anăn, hlăk găn klei dleh dlan leh anăn mâo klei bi jih mơ̆ng Aê Diê, snăn Khua ƀĭng kna Y‑Pôl leh anăn phung ayŏng adei yua leh klei diñu tuôm găn leh čiăng bi juh phung ayŏng adei mkăn ăt dôk hlăm klei dleh dlan kyua hiu hưn Klei Mrâo Mrang Jăk.
Khua Yang Yêsu hlăk dôk ti lăn ala, Ñu ăt tuôm tlă anăp hŏng klei bi kdơ̆ng, arăng mưč mač, boh nik arăng ngă hdră čiăng bi mdjiê. Leh anăn Ñu brei thâo phung ƀĭng kna Ñu ăt tuôm hŏng ya klei Ñu găn leh mơh (Y‑Yôhan 15:18-20). Hiu hưn Klei Mrâo Mrang Jăk amâo dưi tlaih ôh kơ klei dleh dlan, arăng ngă jhat. Ƀiădah bi mni lač jăk kơ Aê Diê kyua klei thâo kơ klei Aê Diê bi jih leh anăn kăp đru, drei ăt dưi bi juh hdơ̆ng pô hlăm klei dleh dlan sĭt mă bruă kơ Khua Yang, Pô brei djăp klei bi juh čiăng kơ drei bi juh hdơ̆ng pô.
Drei mâo mơ̆ klei Aê Diê bi juh čiăng êbat hlăm klei rŭng răng leh anăn mđing bi juh hdơ̆ng phung drei?
Wah lač: Ơ Aê Diê, Ama Khua Yang Yêsu Krist, Pô brei kơ djăp klei bi juh kơ phung ƀuôn sang Ih, akâo kơ Ih đru kâo thâo kơ klei Ih bi juh čiăng lŏ dơ̆ng kjăp ai tiê hlăm bruă Ih jao leh anăn dưi bi juh phung ayŏng adei mkăn hlăm gŏ sang klei đaŏ.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: H’Êsther 1
Kênh Youtube BHKTHN:
