Klei Aê Diê Blŭ: Klei Kbiă 29:19-25.
Êlan kliăng: “Brei ayŏng ih Y‑Arôn hriê kơ ih mbĭt hŏng phung anak êkei ñu mơ̆ng ti krah phung ƀuôn sang Israel, čiăng pioh diñu kơ bruă kâo jing phung khua ngă yang: Y‑Arôn leh anăn phung anak êkei ñu Y‑Nadap, Y‑Abihu, Y‑Êlêasar, leh anăn Y‑Ithamar.” (Klei Kbiă 28:1).
Klei êmuh ksiêm mĭn: Si klei myơr biăp tal dua hlăm knăm brei jing khua ngă yang? Ya jing klei yuôm bhăn mơ̆ng bruă mă êrah mia ti knga, kđiêng kngan, kđiêng jơ̆ng Y‑Arôn leh anăn phung anak êkei ñu? Ya klei mñă kơ drei brei ngă čiăng mă bruă kơ Khua Yang mâo boh tŭ dưn hĭn?
Leh ngă hdră pap brei klei soh leh anăn bi mni, Y‑Môis ngă klei hdră brei Y‑Arôn leh anăn phung anak êkei ñu jing khua ngă yang. Biăp knô tal dua dưi ba, Y‑Arôn leh anăn phung anak êkei gơ̆ ăt dưm kngan ti kŏ biăp anăn leh anăn arăng mdjiê gơ̆. Y‑Môis mă êrah biăp anăn mia ti gao knga hnuă Y‑Arôn leh anăn ti gao knga hnuă phung anak êkei ñu, ti kđiêng ana kngan hnuă diñu leh anăn ti kđiêng ana jơ̆ng hnuă diñu. Kdrăp čhiăm ao leh anăn asei mlei digơ̆ ăt dưi htrah êrah leh anăn êa ƀâo mngưi pioh trôč. “Sĭt nik tui si klei bhiăn păt čiăng jih jang mnơ̆ng arăng bi doh hŏng êrah, leh anăn tơdah amâo mâo ôh êrah tuh, amâo mâo klei pap brei kơ klei soh ôh” (Hêbrơ 9:22)
Klei bhiăn mđĭ jing khua ngă yang jing phung Aê Diê ruah ngă khua ngă yang, bi doh hlăm knăm bi doh, brei digơ̆ bi êdah ai tiê hdơr knga kơ Khua Yang hlăm knăm hdơr knga; leh anăn Aê Diê tiŏ nao digơ̆ hŏng klei pap leh anăn ai ktang Aê Diê brei hlăm bruă htrah êrah bi doh čiăng digơ̆ bi leh bruă yuôm bhăn dưi jao. Êlâo hĭn, knga diñu dưi bi doh čiăng mprăp mđing hmư̆ bi klă Klei Aê Diê Blŭ ăt msĕ mơh klei blŭ mơ̆ng phung ƀuôn sang Ñu hŏng klei kpă ênuah. Kngan dưi bi doh bi hmô kơ bruă ngă diñu brei doh, mngač, leh anăn hlue ngă klei bhiăn ngă yang Aê Diê mtrŭn leh. Diñu srăng bi hriăm, mtô lač leh anăn bi kjăp phung ƀuôn sang Aê Diê djŏ tui si klei doh jăk leh anăn klei khăp. Klei blŭ kpă ênuah, djŏ mông leh anăn djŏ hdră srăng đru kơ phung ƀuôn sang Aê Diê kmhal klei soh wĭt hŏng Aê Diê. Jơ̆ng diñu ăt dưi pioh hjăn čiăng êbat êdu êun, kjăp ktang, mđing tui hlue êlan Aê Diê ktrâo lač leh. Brei diñu thâo kral dŭm anôk pô čiăng truh leh anăn mâo ƀô̆ mta djŏ mông wăt tơdah găn ya klei dleh dlan.
Biăp hlăm klei bhiăn mđĭ ngă bruă anei dưi myơr msĕ si sa mnơ̆ng myơr čuh mâo mnâo ƀâo mngưi “leh anăn mă mơ̆ng bai kpŭng amâo mâo kpei dôk ti anăp Yêhôwa sa klŏ kpŭng, sa klŏ ƀêñ kpit hŏng êa boh ôliwơ, leh anăn sa klŏ ƀêñ êpih” (êlan 23). Dŭm mta mnơ̆ng myơr anei dưi dưm hlăm kngan Y‑Arôn leh anăn phung anak êkei ñu, leh anăn ngă yang ba ti anăp Yêhôwa čiăng bi êdah diñu dôk bi ala kơ jih jang phung ƀuôn sang Aê Diê myơr mnơ̆ng ngă yang kơ Aê Diê.
Hruê anei, Aê Diê ăt tiŏ nao grăp čô drei jing khua ngă yang sang mtao, drei brei bĕ Aê Diê bi doh čiăng kơ phung mkăn ƀuh Aê Diê hlăm phung drei.
Si ngă čiăng knga, jơ̆ng, kngan drei dưi bi doh?
Wah lač: Ơ Khua Yang, kâo bi mni lač jăk kơ Ih ruah leh, bi mtlaih leh anăn tiŏ nao kâo jing pô bi ala mâo rup Ih čiăng iêô jak leh anăn ba pô mkăn lŏ wĭt kkuh mpŭ kơ Ih. Akâo Khua Yang bi doh knga, ală, ƀăng êgei, jơ̆ng kngan kâo čiăng mơ̆ng anăn ya klei kâo blŭ, hmư̆ leh anăn ngă srăng đru kơ pô mkăn ƀuh Khua Yang hlăm kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y‑Êsra 1:1 – 2:42
Kênh Youtube BHKTHN:
