Pajlug 14:8-15
- Vim li cas tus neeg ntse thiaj ntse? Rau qhov nws paub yam uas nws yuav ua. Vim li cas tus neeg ruam thiaj li ruam? Rau qhov nws xav hais tias nws paub lawm.
- Cov neeg ruam ua txhaum los lawv yeej tsis quavntsej, tiamsis cov neeg ua zoo txawj thov kom Vajtswv zam txim.
- Koj tej kev zoo siab los yog koj koj tej kev iab siab los yeej yog koj Tsis muaj leejtwg nrog koj muaj feem.
- Tus neeg siab phem lub tsev raug puastsuaj, tiamsis tus neeg ncaj ncees lub tsev yuav nyob ruaj nrees cia.
- Muaj ib txojkev uas neeg xav hais tias yog txoj zoo, tiamsis txoj ntawd coj mus raug kev ploj kev tuag.
- Lub ncauj luag, tiamsis lub siab quaj ntsuag; thaum kev zoo siab dhau lawm, kev nyuaj siab nyob li qub.
- Cov neeg siab phem yuav tau txais tej uas lawv tau ua lawm. Cov neeg siab zoo yuav tau txais tej nqi zog zoo uas lawv ua.
- Tus neeg ruam ntseeg txhua yam, tiamsis cov neeg ntse ua tib zoo xav lawv mam li ua.
Nqi cim:
“Koj yuav tsum ceevfaj thiab xav zoo zoo, rau qhov koj lub neej mus raws li koj tej kev xav” (Pajlug 4:23).
Lus nug rau sawvdaws xav:
- Cov neeg phem lub siab zoo li cas?
- Lawv ua neej nrog txojkev phem li cas?
- Vim li cas peb yuav tsum ua tib zoo txuag yus lub siab?
Hauv Pajlug 14:8-15, yog Vajntxwv Xalumoos qhia rau nws cov menyuam yuav tsum ua tib zoo txuag lub siab thiab tswj kev ua neej kom ua tau tus neeg ntse. Xalumoos qhia paub tus neeg ruam, yog cov neeg haub ntxias, lawv rov dag lawv tus kheej (nqi 8). Tus neeg phem “tej kev zoo siab yog tej kev iab siab” uas muab zais hauv siab, tsis qhia rau lwm tus nyob sab nraud paub (nqi 10). Cov neeg siab phem txawm lawv lub ncauj luag los lub siab quaj ntsuag, thiab thaum tej kev zoo siab dhau mus kev nyuaj siab nyob li qub (nqi 13). Vajntxwv Xalumoos xaus lus li no: “Cov neeg siab phem yuav tau txais tej uas lawv tau ua lawm. Cov neeg siab zoo yuav tau txais tej nqi zog zoo uas lawv ua” (nqi 14).
Ntau leej vim xav tau koob npe zoo, lawv ua neeg dag, neeg ntxeev siab rau tej phoojywg, tsis mloog raws li lub siab tseeb qhia. Tus neeg siab phem niaj hnub siv tej yamntxwv tsis zoo, lus hais haub ntxias lossis nqis tes ua haujlwm zais lawv tej kev xav tsis zoo rau nruab siab. Txheej laus thaum ub hais tias: “Dej tob hiav dav yeej ntsuas tau, tiamsis tsis muaj tug yuav ntsuas tau neeg siab.” Txawm yog lawv dag ntxias tau lwm tus los hauv lawv lub siab yeej ris rhawv kev nyuaj siab, vim yuav raug txim. Txawm yog lawv dag ntxias tau ntau leej los yeej zais tsis tau lawv tej kev txhaum ntawd mus li. Txawm yog dag ntxias tau tibneeg los lawv yuav khiav tsis dim Vajtswv txojkev txiav txim li, rau qhov Vajtswv hais tias“kuv tsis saib neeg li noobneej saib. Neeg saib lub cev ntaj ntsug, tiamsis kuv saib neeg lub siab” (1Xamuyees 16:7). Txawm yog cov neeg siab phem ntawd ua neej npluanuj los lawv tsis muaj kev kaj siab thiab kev zoo siab li. Lawv yuav siv zog nrhiav kom kaj siab sab nraud los hauv lawv lub siab yog kev iab siab, kev txhawj xeeb mus li xwb.
Vajluskub qhia hais tias: “Leejtwg thiaj paub tau neeg lub siab? Tsis muaj ib yam dabtsi uas txawj dag ntxias li neeg lub siab; lub siab ntawd mob loj thiab kho tsis zoo li. Kuv yog tus Tswv uas paub neeg txojkev xav thiab sim neeg lub siab. Kuv pub rau txhua tus raws li nws lub neej thiab raws li tes haujlwm uas nws ua” (Yelemis 17:9-10), thiab txhua tus tes haujlwm puavleej yuav raug txiav txim huv tibsi. Yog li ntawd, lub siab ua ncaj ncees yog qhov tseemceeb uas Vajtswv cov menyuam yuav tsum tau muaj. Kev ua neeg ncaj ncees qhia tshwm Vajtswv tus uas dawbhuv, ua ncaj ncees rau lwm tus kuj qhia tshwm peb txojkev ntseeg Vajtswv. Vajntxwv Xalumoos qhia nws cov menyuam thiab kuj yog qhia rau peb txhua tus hais tias, “Koj yuav tsum ceevfaj thiab xav zoo zoo, rau qhov koj lub neej mus raws li koj tej kev xav” (Pajlug 4:23). Thov Vajtswv pab kom peb paub ua tib zoo txuag peb lub siab, thov Vajtswv zam yus tej kev txhaum kom tau txais txojsia ntev dhawv mus ibtxhis. Tsis muaj ib yam kev txhaum twg me uas tsis tsimnyog thov Vajtswv zam txim, thiab kuj tsis muaj ib yam kev txhaum twg loj dhau uas Vajtswv yuav zam tsis tau txim rau.
Puas tshuav yam kev txhaum twg peb tseem zais cia hauv siab uas tsis tau lees rau Vajtswv?
Thov Vajtswv:
Vajtswv, nyuam yaus ua koj tsaug vim koj txojlus qhia nyuam yaus paub txuag lub siab. Thov Vaj Ntsujpig qhia tej uas nyuam yaus tau ua yuam kev, kom nyuam yaus muaj lub siab dawbhuv pub rau tus Tswv thiab ua neeg ncaj ncees rau lwm tus. Ameeg.
Email: kawmvajluskubtxhuahnub@gmail.com
Kênh Youtube BHKTHN:
