2 Timautes 2:3-13
Nqe cim:
“Koj yuav tsum nyiaj kev txomnyem, rau qhov koj yog Yexus Khetos tus tubrog uas ncaj ncees” (2 Timautes 2:3)
Lus nug xav:
– Tus duab twg tau timthawj Paulus muab los ua piv txwv txog kev tiv txomnyem?
– Nws tau muab tawm ob tug qauv twg los txhawb kom Xibhwb hluas Timautes thiab peb sawvdaws tiv kev txomnyem vim Txojmoo Zoo?
Tig saib tej uas Vajtswv pub, sawv khov kho tshaj tawm, thiab tiv kev txomnyem vim Txojmoo Zoo yog cov npe loj uas timthawj Paulus hais txog hauv tshooj 1. Hla mus rau tshooj 2, Timthawj Paulus tau ntuas Timautes kom sawv khov kho thiab ua siab tawv, tshwjxeeb yog hauv txoj kev tshaj qhia Moo Zoo thiab tiv kev txomnyem. Paulus siv peb tus duab los nqua hu tus tub hluas Timaustes los nrog nws tiv kev txomnyem (nqe 3).
Tim ib, nws nqua hu nws tus tub sab ntsujplig kom yuavtsum muaj tus cwj pwm tiv kev txomnyem li ib tug tubrog, tas siab tas zog ua kom Vajtswv txaus siab (nqe 4). Qhov uas hais tias “nws yuav tsis mus ua liaj ua teb thiab ua lag ua luam ib zaug li” ntawm no tsis yog txhais hais tias peb yuav tsum faib tus ntseeg lub neej ua ob feem, feem sab ntsujplig thiab feem ntiajteb. Tiamsis timthawj Paulus tabtom ceebtoom kom tsis txhob cia ib yam dabtsi, kiag tej haujlwm sab ntsuj plig uas suav hais tias tseemceeb, thaiv peb feem xyuam tseem ceeb uas yog ua haum Vajtswv siab, ib yam li ib tug tubrog xav ua kom haum tus uas xaiv nws siab. Hauv kev ua Vajtswv tes haujlwm, peb yuav tsum tshuaj xyuas peb tus kheej hais tias tus uas peb tabtom xav ua kom txaus siab ntawd yog leej twg? yog xibhwb, yog thawjcoj, yog cov kwvtij ntseeg, lossis yog Vajtswv.
Tim ob, tus uas ua Vajtswv tes haujlwm sab ntsujplig “sib tw raws li kev cai”, ib yam li ib tug neeg sib tw ua raws li txoj cai ntawm kev sib tw (nqe 5). No yog tus cwj pwm npaj txhij mloog lus, xyuam xim ua raws li tej uas twb tau taw qhia lawm. Ntawm tus uas ua Vajtswv tes haujlwm, no yog Vajtswv kev taw qhia, tsis yog los ntawm tibneeg lossis los ntawm yam uas yus xav hais tias yog, zoo. Ib tug neeg sib tw tsuas tau txais nqi zog thaum nws sib tw raws li txoj cai xwb; ib yam li ntawd, tus uas ua Vajtswv tes haujlwm yuav tsum ua raws li Vajtswv txoj kev qhia, nws thiaj yuav tau sau nqi zog. thiab pom tau nws tes haujlwm cov txiaj ntsig.
Tim peb, tus uas ua haujlwm rau Vajtswv yuav tsum muaj kev ua siab ntev ib yam li ib tug neeg ua teb “uas rau siab ntso ua, nws yuav xub tau noj tej qoobloo uas nws sau tau” (nqe 6). Timthawj Paulus txhawb tus uas ua Vajtswv tes haujlwm kom mob siab ua haujlwm thiab tiv kev txomnyem, vim thaum txog sijhawm nws yuav tau sau cov txiv hmab txiv ntoo qab zib uas nws siv zog khwv thiab tiv kev txomnyem.
Nqe 8-13, timthawj Paulus muab ob tug qauv uas ciaj sia los qhia txog kev tiv kev txomnyem: Ntawd yog tus Tswv Yexus thiab nws. Los ntawm ob tug qauv no, nws xav qhia Xibhwb hluas Timautes thiab peb niaj hnub no hais tias, yog peb xav ua Vajtswv tes haujlwm kawg siab kawg ntsws thiab npaj siab tiv kev txomnyem, peb yuav tsum ntsia ntsoov rau tus Tswv Yexus, tus uas tau raug txomnyem vim yog peb, thiab saib timthawj Paulus tus qauv uas zoo siab hlo raug txomnyem vim yog cov neeg uas Vajtswv tau xaiv tseg. Thiab txhawb peb zog los ntawm ib lo lus uas muaj tseeb: “Yog peb nrog nws tuag lawm, peb yuav tau nrog nws sawv hauv qhov tuag rov qab los. Yog peb ua taus siab ntev, peb yuav tau nrog nws kav. Yog peb tso nws tseg, nws yeej yuav tso peb tseg thiab” (nqe 11-12). Thov Vajtswv pab kom peb npaj txhij tiv kev txomnyem vim yog Tus Tswv lub Npe thiab cov ntsujplig uas tabtom yuav raug kev puastsuaj.
Thov Vajtswv,
Tus Tswv, nyuam yaus ua Koj tsaug, vim Tswv Yexus yog tus qauv zoo kawg nkaus rau nyuam yaus txog kev tiv taus kev txom nyem. Thov Koj pab kom nyuam yaus ua haujlwm los ntawm lub homphiaj ua rau Koj txaus siab, thiab mloog lus ua raws li Koj Txojlus qhia. Nyuam yaus tuav Tswv Yexus Khetos lub npe thov, Amees.
Yuav ua li cas kom peb muaj lub siab tiv kev txomnyem ua Vajtswv haujlwm?
Nyeem Vajluskub hauv peb lub xyoos: Yauj 28
Kênh Youtube BHKTHN:
