Klei Aê Diê Blŭ: Y-Luk 10:25-37
Êlan kliăng: “Đăm đuôm nư arăng ôh, knŏng bi đuôm klei khăp hdơ̆ng diih; kyuadah hlei pô khăp kơ pô riêng gah ñu bi sĭt leh klei bhiăn.” (Rôm 13:8)
Klei êmuh ksiêm mĭn: Boh phŭn klei êmuh leh anăn wĭt lač ti krah Khua Yang leh anăn khua klei bhiăn brei ƀuh si ñu thâo săng kơ klei bhiăn? Si klei čiăng mtô brei khăp kơ phung riêng gah Khua Yang yua hlăm klei yăl dliê kơ sa čô êkei Samari jăk? Ya jing boh mơ̆ng klei hdĭp thâo khăp?
Sa čô khua mtô klei bhiăn êmuh Khua Yang Yêsu: “Ơ Nai, ya kâo srăng ngă čiăng dưn klei hdĭp hlŏng lar?” Khua Yang lŏ wĭt êmuh ñu leh anăn ñu lŏ wĭt lač leh snei, khăp kơ Khua Yang Aê Diê hŏng jih ai itê leh anăn khăp kơ pô riêng gah msĕ si kơ drei pô. Khua Yang lač: “Klei ih lŏ wĭt lač djŏ leh; ngă snăn leh anăn ih srăng hdĭp” (êlan 25-28). Snăn čiăng dưi dưn klei hdĭp hlŏng lar knŏng djă pioh dua mta klei bhiăn anei đuč yơh hĕ? Amâo ênưih msĕ snăn ôh! Khua mtô klei bhiăn anei hriê êmuh Khua Yang kyua čiăng lông dlăng Khua Yang, snăn bi êdah ñu amâo jing mnuih kpă ôh. Ñu êmuh Khua Yang, hlei jing pô riêng gah ñu, brei ƀuh klei ñu čiăng bi kdriêl knhal klei khăp, bi hrŏ ƀiă hĕ phung mnuih tui si klei bhiăn čoh čuăn: khăp kơ pô riêng gah ih msĕ si kơ ih pô. Ñu mâo klei thâo săng klei bhiăn ƀiădah amâo hdĭp hŏng klei khăp sĭt ôh. Khua Yang mtô lač, thâo săng msĕ snăn jing ka djăp ênŭm ôh.
Khua Yang yăl dliê kơ sa čô êkei Samari jăk, čiăng brei thâo si jing klei khăp kơ pô riêng gah tui si klei Aê Diê čiăng. Êlâo hĭn, phung Samari jing mnuih phung Israel bi êmut, ƀiădah gơ̆ ăt đru mơh pô dôk găn klei truh jing sa čô Israel. Klei khăp sĭt amâo bi kdriêl ôh kyua djuê ana, klei đăo, anôk bruă amâodah tui si klei čuăn mĭn. Klei khăp sĭt amâo tĭng yap; amâo êmuh hlei pô anei jing? Năng đru mơ̆? Ya klei tŭ dưn ba kơ drei? Klei khăp sĭt thiê brei amâo čoh čuăn, amâo čang guôn lŏ bi wĭt ôh. Khua Yang Yêsu mtô: “Ƀiădah khăp bĕ kơ phung roh diih. Ngă jăk leh anăn brei arăng čan, amâo lŏ čang hmăng kơ klei bi wĭt ôh.” (Y-Luk 6:35). Tal dua, êkei Samari anei đru pô dôk găn klei knap mñai amâo djŏ kyua bruă klam gơ̆ ôh, amâodah ngă tŭ kơ leh ôh, ƀiădah ƀuh mnuih anăn gơ̆ mâo klei pap sĭt, “Tơdah ñu ƀuh gơ̆, ñu mâo klei pap” (êlan 33). Gơ̆ amâo thiê brei msĕ si klei arăng khăng brei pap ôh, kyua čiăng mâo klei hing ang ôh, amâo ngă kyua huĭ arăng blŭ jhat, amâodah ngă kyua mâo klei tŭ dưn kơ pô ôh! Tal tlâo, klei khăp bi êdah hŏng bruă ngă sĭt êmĭt leh anăn hŏng ai tiê sĭt: nao giăm, păn anôk êka, brei đĭ aseh gơ̆ pô, atăt ba kơ sang jưh, tla jih ênoh bi liê, ngă djăp ênŭm jih bruă răng kriê kơ pô găn klei truh. Êkei Samari lui hruê mmông, ai tiê, prăk kăk, brei ƀuh klei khăp sĭt mâo klei tla ênoh nanao, amâo guôn mmông găl ôh đru. Pô riêng gah Khua Yang mtô, amâo bi kdriêl knhal hĕ msĕ si khua mtô klei bhiăn bi mĭn ôh. Jih jang mnuih dôk čiăng mâo klei đru jing pô riêng gah kâo sơăi, leh anăn kâo kăp bi êdah ai tiê pap kơ digơ̆ hŏng ai tiê khăp amâo tĭng yap Khua Yang brei leh kơ kâo.
Wăt tơdah hlăm Phung Sang Aê Diê amâodah hlăm ala ƀuôn, hdĭp khăp sĭt jing ngă kluôm ênŭm klei bhiăn Khua Yang (Rôm 13:8), leh anăn bi mơak kơ Khua Yang (Hêbrơ 13:16). Khua Yang čiăng kơ drei amâo knŏng hdĭp kơ drei pô ôh, ƀiădah dôk hdĭp hưn bi sĭt kơ Khua Yang ti krah lăn ala klei jăk kpă hroh trŭn. Tơdah drei hdĭp thâo khăp ti krah ala ƀuôn, wăt tơdah bruă ngă điêt dưn ăt srăng bi mguôp mkŏ mdơ̆ng sa ala ƀuôn mâo klei khăp leh anăn mtrang mngač Klei Mrâo Mrang Jăk Khua Yang kơ lu mnuih.
Si drei bi êdah klei khăp hŏng mnuih mkăn?
Wah lač: Ơ Ama kâo khăp! Akâo Ih thiăm brei kơ kâo klei khăp Khua Yang čiăng kơ kâo khăp kơ Khua Yang leh anăn khăp kơ pô riêng gah msĕ si Khua Yang khăp kơ kâo leh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 30
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
