Phau Ntawv Nkauj 10:1-18
Nqe cim:
“Tiamsis koj yeej muaj qhovmuag pom, koj yeej mob siab txog tej teebmeem thiab kev txomnyem ntawd, koj yeej npaj nroos yuav pab. Cov neeg uas tsis muaj leejtwg pab yuav los cuag koj, koj yeej ibtxwm pab cov neeg uas raug txomnyem” (Phau Ntawv Nkauj 10:14)
Lus nug xav:
– Tus sau tshooj ntawv nkauj no tau quaj thov Vajtswv li cas txog cov neeg phem?
– Thaum ntsib tej xwmtxheej zoo li ntawd, tus sau tshooj ntawv nkauj tig nws lub siab mus rau Vajtswv thiab qhia nws txoj kev ntseeg li cas?
– Yuav ua li cas kom peb ntseeg ruaj hais tias Vajtswv tseem tswj rawv txhua yam txawm txoj kev txiav txim yuav los lig los xij?
Phau Ntawv Nkauj tshooj 10 yog ib qho kev quaj ntsuag ntawm tus neeg uas ntseeg Vajtswv, thaum nws pom hais tias txoj kev zoo yuav raug txoj kev phem caij tsuj los zoo li Vajtswv tseem nyob ntsiagto, nws thiaj quaj hais tias: “Tus TSWV, vim li cas koj yuav nyob deb ua luaj li? Vim li cas koj khiav nkaum thaum peb raug kev txomnyem?”. Qhov no qhia txog tus neeg ntseeg txoj kev ntxhov siab heev thaum nws pom cov neeg uas tsis lees paub thiab saib tsis taus Vajtswv tabtom ua phem tsis ntshai leejtwg, khav theeb, quab yuam lwm tus, ntshaw nyiaj txiag, dag ntxias, tsimtxom lwm tus, nrhiav kev ua phem thiab txeeb cov neeg ncajncees tug. Lawv xav hauv lawv lub siab hais tias tsis muaj Vajtswv, thiab yog muaj Vajtswv los, Nws yeej tsis pom tej uas lawv ua thiab yuav tsis muaj peevxwm ua dabtsi rau lawv. Vim li ntawd, lawv thiaj tseem ua neej ywjpheej ua phem raws li lawv lub siab nyiam! Lawv hais tias “Vajtswv yeej tsis quavntsej peb. Nws twb qi qhovmuag lawm, nws yeej tsis pom peb li!” (nqe 11).
Tom qab uas qhia tawm lub tsamthawj ntawd lawm, tus sau tshooj ntawv nkauj no tig nws lub siab mus cuag Vajtswv. Nws qhia meej hais tias cov neeg phem txoj kev xav yuam kev. Vajtswv yog tus ncaj ncees thiab muaj hwjchim, Nws tseem kav txhua yam. Nws txoj kev tshuaj xyuas txhua tus siab dhau, cov neeg phem thiaj tsis pom xwb (nqe 5–6, 11). Tus sau tseem ua siab ntev thiab kub siab thov Vajtswv kom Vajtswv nqis tes los ceev txoj kev ncaj ncees (nqe 12–15). Nws qhia meej hais tias Vajtswv yog Vajntxwv kav mus ib txhis. Nws yog tus tuav txoj kev txiav txim ncaj ncees, Vajtswv pom txhua yam, Nws saib xyuas cov neeg uas tsis muaj leej twg pab thiab cov neeg raug tsimtxom. Nws cawm cov neeg uas xav tau kev pab thiab rau txim rau cov neeg uas ua txhaum raws li lawv tej kev txhaum. Cov neeg phem tej zaum yuav vammeej ib ntus, tiamsis Vajtswv txoj kev kav nyob mus ib txhis thiab coj kev ncaj ncees ib txhis.
Paub Vajtswv li cas ces ib tug neeg yuav txiav txim siab ua neej li ntawd rau Vajtswv. Thaum peb ntseeg hais tias Vajtswv paub txhua yam, pom txhua yam, hnov peb tej lus thov thiab cawm cov neeg uas raug tsimtxom, peb yuav muaj kev kaj siab txawm peb pom cov neeg phem tsimtxom lwm tus los xij. Peb tseem yuav ua neej ncaj ncees thiab pab tiv thaiv cov neeg uas tsis muaj zog, ib yam li peb Leej Txiv saum ntuj (nqe 17–18). Thaum peb raug tsimtxom, Vajtswv Txojlus yuav nplig peb lub siab. Peb paub hais tias Vajtswv yeej tsis qeeb siab rau Nws txoj kev txiav txim li. Yog li ntawd, peb yuav tsum ua siab ntev: “Lub ntuj nyob siab lub ntiajteb no li cas, tej uas kuv ua thiab kuv xav nyob siab tshaj tej uas nej ua thiab nej xav npaum li ntawd.” (Yaxayas 55:9).
Vajntxwv Daviv qhia tej uas nws tau saj lawm hais tias: “Tsis txhob nyuaj siab rau tej uas cov neeg siab phem ua, tsis txhob khib rau cov neeg uas ua kev txhaum. Lawv yuav ntsws sai ib yam li tej nyom, lawv yuav tuag sai ib yam li tej nroj tsuag. Cia siab rau tus TSWV thiab ua zoo, yog nej ua li ntawd, nej yuav nyob hauv lub tebchaws tso siab lug” (Thi Thiên 37:1-3).
Thov Vajtswv,
Tus Tswv, muaj qee lub sijhawm nyuam yaus xav hais tias Koj nyob deb heev ntawm nyuam yaus! Txawm li ntawd los, Koj Txojlus ceebtoom nyuam yaus kom nco ntsoov hais tias Koj yog tus Vajtswv uas paub txhua yam. Koj pom txhua lub kuamuag thiab Koj hnov txhua lub suab quaj thov ntawm cov neeg uas raug tsimtxom. Koj yuav nqis tes ua raws li Koj lub sijhawm. Nyuam yaus tuav Tswv Yexus Khetos lub npe thov, Amees.
Peb yuav ua li cas thaum cov neeg phem caij tsuj cov neeg ncaj ncees?
Nyeem Vajluskub hauv peb lub xyoos: Yauj 25
Kênh Youtube BHKTHN:
