Êsai 1:10-17
“Pơhrăm iŏk bĕ tơdrong ‘lơ̆ng, chă lu tơdrong tơpăt, tơiung lu bơngai đe pơjuă, dŏng tơgŭm lu bơngai mơti, pơma dŏng lu bơngai adro.” (Êsai 1:17)
Nơ̆r jet tơchĕng pơwao:
- Kră Yang đei hil mĭl kơ Lu kon pơlei pơla Sư tơdrong kiơ?
- Kră Yang bơtho Lu kon pơlei pơla Sư arih tơpăt lăm kon pơlei pơla tơdrong hơđăl dêh lăm tơdrong kiơ?
- Lu bơ̆n yua iŏk Nơ̆r bơtho âu thoi yơ?
Mă khan Chăl pah so wă khan chăl Khôi Juăt dah chăl tơdrong ‘mêm mơnat, ‘Bok Kei-Dei ling lang wă kơ lu kon Sư kăl kơ arih iơ̆m dim păng tơpăt, ưh kơ sĭ lăm khŭl bơngai lui đĕch ôh mă lei kăl kơ arih hăm kon pơlei pơla dơ̆ng. Mă lei lu adrĕch Juđa pah so sơ̆ đei tơdrong arih ưh kơ trŏ, tơdrong yoch, achăng lê̆ Kră Yang, phŏ kơnh đei tơdrong ưh kơ wă pơyom kơ Kră Yang (Êsai 1:4). Lu bơngai mă Kră Yang chrih noh jơ̆ tă kơ lu bơngai lăng gah ‘nguaih nhen kơ bơngai tơpăt kơkuh kơ ‘Bok Kei-Dei pơyơ̆r tơmam soi, bơwei khei năr nhen thoi phĕt khei ‘nao, năr sa’bat, hăm đei lơ phĕt nai păng krao khan đunh jơ. Kră Yang đei krao kơ dêh Juđa ‘nâu sơ̆ hơnăn kơ ‘bar tŏ pơlei mă kơnê̆ dêh noh jơ̆ Sô-đôm păng Gô-mô-rơ, wă tơ’bôh ăn kơ tơdrong arih lu sư kơnê̆ dêh tơpă păng hli krưp dêh (trong 10-15)! Rơđah hơđăl dêh, tơdrong tơ’bưh hăm Kră Yang kăl kơ đei tơdrong arih tơpăt năm hơdai. Lu kon pơlei Israel kơkuh kơ Kră Yang mă lei tơdrong arih lu sư pơm yoch, ưh kơ hơtŏ lăm tơdrong sek tơlang lăm kon pơlei pơla, na Kră Yang chrih hil tơpă trăp dêh. Nơ̆r âu tơ’blŏk ăn kơ bơ̆n ưh kơ hŭt lê̆ tơdrong arih tơpăt kơ plah kiơ̆ Kră Yang.
Nơ̆r Kră Yang lăm Êsai 1:4-7 tơbăt ăn kon pơlei Kră Yang arih lăm tơdrong ưh kơ trŏ păng yoch glăi tơpă, thoi noh ba ăn kơ tơdrong arih gah bơhngol lu sư đei rơka păng đei lơ tơdrong răm ‘băm nhen thoi kơ đei tơdrong jĭ hơbuh. Kơ̆l ‘ngok lu sư ‘bĕnh ‘bang kơ hyơ̆k bơngơ̆t, jơ-hngơ̆m lu sư pơchah. Đơ̆ng tơpang jơ̆ng truh tơ kơpal kơ̆l ưh kơ đei ‘bơ̆t yơ klaih ‘lơ̆ng, mă lei ‘bĕnh kơ rơka, jĭ pơhlâl kơ sech akar mă lei ưh kơ đei hơmet, ưh kơ đei tuh đak pơgang wă kơ dă biơ̆ kơ tơdrong jĭ. Tơdrong ataih đơ̆ng Kră Yang, lăng Nơ̆r Kră Yang ưh kơ gĭt thoi noh pơm ăn kơ dêh char lu sư rơhiŭng pă đei kon bơngai, đei lu ayăt blah pơđep. Kră Yang yua Ê-sai wă tơ’blŏk ăn kơ kon pơlei pơla kăl kơ arih lăm tơdrong tơpăt arih thoi noh ‘mơ̆i na Kră Yang gô sơng iŏk tơdrong lu sư kơ kuh kơ ‘Bok Kei-Dei păng mơ̆ng nơ̆r lu sư đei krao khan (trong 14-15). Wă kơ arih tơpăt lăm kon pơlei pơla kăl kơ hơdrol hloh ‘noh băt kơ tơdrong yoch bơ̆n kơdih, tơbral tơdrong yoch hăm Kră Yang păng tŭk lê̆ tơdrong yoch “athei ôp rơgoh, athei pơm mă rơgoh”, hơdrin “weh đơ̆ng dôm tơdrong kơnê̆”, wă khan ưh kơ pơm dôm tơdrong Kră Yang đei khă găn, ưh kơ pơm kơ nê̆ kơ bơngai nai. Mă lei, arih tơpăt iơ̆m dim lăm kon pơlei pơla noh jơ̆ tơdrong ưh kơ’bônh, thoi noh kăl kơ “pơhrăm lăm tơdrong pơ’lơ̆ng”. Kăl kơ chơ chă jơnăr wă pơm tơdrong tơpăt, tơgŭm lu bơngai mă đe pơgŏ pơđep, pĕng bơ̆ng lu bơngai ưh pă đei tơdrong gơnang, ưh kơ năm hơdai hăm bơngai wă pơgŏ pơđep bơngai nai dah wă pơrăm bơngai (trong 16-17).
Dang ei bơ̆n đei tơdrong pơhlŭ kơ kuh kơ Kră Yang gah ‘nguaih, mă lei pơm hăm bơngai nai ưh kơ tơpăt wă chă lơi yua kơ bơ̆n kơdih. ‘Bai pơhrăm tơ’blŏk ăn kơ bơ̆n ‘Bok Kei-Dei ưh kơ lăng gah ‘nguaih, mă lei Kră Yang lăng lu bơ̆n đơ̆ng tơdrong arih lu bơ̆n lăm khŭl bơngai lui, lăm hnam dơnŏ păng hăm kon pơlei pơla hăm tơdrong pơm jang mă tơpă. Athei arih tơpăt wă kơ lơ bơngai ‘bôh Kră Yang lăm chăl arih lu bơ̆n.
Ơ Kră Yang mă ‘lơ̆ng tơpăt, apinh bơtho păng tơgŭm ăn kơ inh arih tơpăt tơpă ưh kơ sĭ lăm Hnam akŭm đĕch mă lei lăm hnam dơnŏ kŭm hăm kon pơlei pơla wă kơ a-năn Kră Yang đe đei pơ ư pơ ang đơ̆ng chăl arih inh. Yua anăn Kră Yang Yêsu Krist, Amen.
Lu bơ̆n hăm oei arih tơpăt lăm kon pơlei pơla thoi yơ wă kơ a-năn Kră Yang đei ư-ang?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Jop 29
Kênh Youtube BHKTHN:
