2 Timautes 2:1-2
Nqe cim:
“Koj yuav tsum muab tej lus uas koj thiab muaj ntau leej hnov kuv qhia lawm qhia rau cov neeg uas koj cia siab tau hais tias lawv yuav txawj qhia tej ntawd rau lwm tus” (2 Timautes 2:2)
Lus nug xav:
– Timthawj Paulus nqua hu xibhwb hluas Timautes yam dabtsi?
– Nws qhia haukev cob qhia neeg los ua Tswv Yexus thwjtim li cas?
– Txhua tus ntseeg muaj feem xyuam pab cob qhia cov neeg uas nws muaj feem saib xyuas li cas?
Tom qab uas timthawj Paulus txhawb kom Timautes muaj siab tawv ua tim khawv rau tus Tswv (2 Timautes 1:8), Timthawj Paulus rov nqua hu xibhwb hluas Timautes hais tias “koj yuav tsum cia siab rau Vajtswv txoj koob hmoov uas Vajtswv pub rau peb cov uas nrog Yexus Khetos sib raug zoo” (nqe 1). Timautes tseem hluas, nws tsis tau muaj kev paub ntau thiab tsis tau nkag siab tob txog tej yam ntawm sab ntsujplig li leej txiv hauv txoj kev ntseeg. Tiamsis timthawj Paulus ntuas Timautes yuav tsum sawv khov kho, tuav kev ntseeg kom ruaj, thiab ua kom tiav tes haujlwm uas tus Tswv tau muab tso rau nws saib xyuas hauv Efexus.
Nqe 2 qhia peb meej txog txoj kev uas peb yuav cob qhia thwjtim kom lawv muaj kev ntseeg ruaj khov rau tus Tswv. Tim ib, kev qhia Vajtswv Txojlus thiab kev cob qhia neeg kom ua thwjtim yog ib txoj haujlwm uas yuav tsum ua txuas ntxiv mus, dhau ib tiam mus rau ib tiam. Hauv no muaj plaub tiam uas tau hais txog: tiam “kuv” yog timthawj Paulus; tiam “koj” yog Timautes; tiam Timautes cob qhia “ cov neeg uas koj cia siab”; thiab tiam kawg “lwm tus”. Qhov no qhia pom hais tias txoj haujlwm “qhia txhua haivneeg kom los ua thwjtim” raws li Yexus tau samhwm hauv Mathais 28:19, tsis yog ib txoj haujlwm uas yuav muab nres rau ntawm cov neeg uas muaj kev ntseeg ruaj khov, paub ntau, tiamsis yuav tsum yog txhua tus ntseeg tes haujlwm thiab ncaj ncees ua mus li.
Tim ob, txoj haukev uas timthawj Paulus qhia yeej muaj peevxwm ua tau: “qhia” rau lwm tus tej uas koj“hnov kuv qhia lawm” (nqe 2). Yam twg peb tau kawm thiab totaub lawm, peb yuav tsum muab yam ntawd qhia rau lwm tus. Qhov tseeb tiag, tus neeg uas kawm tau ntau tshaj yog tus uas muab yam uas nws tau to taub lawm qhia rau lwm tus. Peb tsis tsimnyog qhia yam uas peb tseem tsis tau kawm thiab tsis tau paub, tiamsis kuj tsis tsimnyog tos kom txog thaum peb paub txaus lawm mam li pib qhia. Vim thaum peb kawm ntau zuj zus, peb yuav pom hais tias peb txoj kev paub tseem me zuj zus heev ntxiv. Kev kawm yog ib txoj kev mus tas sim neej. Yog li ntawd, peb yuav tsum tsis txhob tso tseg kev kawm ntawm cov neeg uas ua ntej peb. Thiab peb kuj yuav tsum npaj siab qhia lwm tus txog tej yam uas peb tau kawm lawm.
Tim peb, tus cai xaiv tus neeg los cob qhia yog yuav tsum “ncaj ncees” lossis “muab siab npuab”. Lo lus no hais txog tus cwj pwm uas ncajncees, thiab kuj hais txog tej koob hmoov uas Vajtswv pub. Sob lus “txawj qhia tej ntawd rau lwm tus” txhais tias “kom lawv muaj peev xwm cob qhia lwm tus ntxiv” (nqe 2). Yog li ntawd, xibhwb hluas Timautes yuav tsum nrhiav cov neeg uas ncajncees thiab cob qhia lawv kom dhau los ua cov neeg uas muaj peevxwm cob qhia lwm tus ntxiv.
Txojmoo Zoo tau raug muab tshaj tawm thiab khaws cia los ntawm kev qhia ib tiam dhau ib tiam. Yog li ntawd, Pawg Ntseeg yeej ib txwm xav tau cov neeg ncaj ncees thiab muaj peevxwm los qhia Vajtswv Txojlus hauv tej pab kawm Vajluskub txhua athiv thiab cov kawm txhua pab. Cov niam txiv kuj yuav tsum kawm thiab npaj kom txawj qhia lawv cov menyuam kom ua neej raws li tus Tswv txojkev. Txhua tus ntseeg puavleej muaj feem xyuam los qhia cov neeg uas Vajtswv tso rau yus saib xyuas, kom thiaj txhim tsa tau Pawg Ntseeg loj hlob thiab ruaj khov.
Thov Vajtswv,
Tus Tswv, nyuam yaus ua Koj tsaug vim nyuam yaus tau txais kev cob qhia los ntawm cov neeg uas rau siab ntso qhia Koj Txojlus. Thov Koj pab kom nyuam yaus kuj ua tus ncajncees, muab tej uas nyuam yaus tau hnov thiab tau kawm los cob qhia rau lwm tus thiab. Nyuam yaus tuav Tswv Yexus Khetos lub npe thov, Amees.
Leejtwg yog tus ua ncaj ncees uas peb yuav tau cob qhia tej uas peb tau kawm lawd rau lawv?
Nyeem Vajluskub hauv peb lub xyoos: Yauj 27
Kênh Youtube BHKTHN:
