Klei Aê Diê Blŭ: II Y-Timôthê 2:3-13
Êlan kliăng: “Tŭ bĕ klei knap mñai mbĭt hŏng kâo msĕ si sa čô kahan jăk Krist Yêsu” (II Y-Timôthê 2:3)
Klei êmuh ksiêm mĭn: Ya rup Khua ƀĭng kna Y-Pôl ba mdah čiăng bi hmô kơ klei tŭ knap mñai? Ya dua klei bi hmô ñu lač leh čiăng mđĭ ai Khua pô mtô hlăk ai Y-Timôthê leh anăn drei tŭ klei knap mñai kyua Klei Mrâo Mrang Jăk?
Lŏ bi hdơr klei jăk, ktang hiu hưn, leh anăn mprăp tŭ klei knap mñai kyua Klei Mrâo Mrang Jăk jing dŭm mta phŭn Khua ƀĭng kna Y-Pôl lač hlăm kdrêč 1. Hlăm kdrêč 2, Khua ƀĭng kna mtă kơ Y-Timôthê brei jing ktang, jhŏng, boh nik hlăm bruă mtô leh anăn tŭ klei knap mñai. Ñu yua tlâo klei bi hmô čiăng iêo jak phung ƀĭng kna hlăk ai hrăm mbĭt hŏng ñu “tŭ klei knap mñai” (êlan 3). Tal êlâo, ñu iêo jak anak hlăm klei đăo anăn tŭ klei knap mñai hlăm ai tiê sa čô kahan, sa ai tiê bi mơak kơ Aê Diê (êlan 4). Bruă “Amâo mâo ôh sa čô kahan bi lŭk bruă ñu hŏng bruă ƀuôn sang” tinei jing mbha klei hdĭp phung đăo kơ Krist jing dua kdrêč: klei hdĭp myang leh anăn lăn ala. Ƀiădah Khua ƀĭng kna Y-Pôl knŏng hưn êlâo brei răng đăm lui ôh ya mta klei, wăt đa đa bruă yap jing “myang”, ngă gun kpăk kơ drei mơ̆ng bruă phŭn jing bi mơak kơ Aê Diê, msĕ si ai tiê sa čô lĭng kahan bi mơak kơ pô iêô ñu. Hlăm klei mă bruă, brei drei ksiêm kơ pô čiăng thâo kơ hlei pô drei ngă čiăng bi mơak, jing khua pô mtô, phung khua kiă kriê, phung ayŏng adei hlăm Phung Sang Aê Diê, amâodah Khua Yang Pô?
Tal dua, mnuih mă bruă brei mâo ai tiê “tui si klei bhiăn”, msĕ si pô bi lông hluê ngă klei bhiăn bi lông (êlan 5). Anei jing ai tiê mprăp gưt asăp, sĭt êmĭt hluê ngă ya mta klei arăng mtô leh. Hŏng mnuih mă bruă Khua Yang, anei jing klei mtô mơ̆ng Klei Aê Diê Blŭ, amâo djŏ mơ̆ng anak mnuih amâodah mơ̆ng klei pô bi mĭn jing djŏ, jing jăk ôh. Mnuih bi lông knŏng tơdah ñu ngă djŏ klei bhiăn kơ klei bi lông kơh dưi mâo đuôn mtao; msĕ snăn mơh phung mă bruă brei diñu mă bruă tui si klei Khua Yang mtă kơh dưi mâo boh tŭ dưn.
Tal tlâo, mnuih mă bruă brei mâo klei thâo gĭr msĕ si mnuih ngă lŏ hma dôk guôn “boh mnga êlâo hĭn” (êlan 6). Khua ƀĭng kna Y-Pôl mđĭ ai mnuih mă bruă gĭr găn klei dleh dlan snăn srăng dưi hrui mă boh tŭ dưn kơ klei gĭr ktưn leh anăn klei gĭr dleh dlan pô.
Êlan 8-13, Khua ƀĭng kna Y-Pôl bi êdah dua klei bi hmô kơ ai tiê tŭ klei knap mñai: Khua Yang Yêsu leh anăn ñu pô. Hŏng dua klei bi hmô anei, ñu čiăng mtô kơ Khua pô mtô hlăk ai Y-Timôthê leh anăn drei hruê anei, čiăng dưi ngă bruă hŏng jih ai tiê leh anăn tŭ klei knap mñai, brei drei dlăng kơ Khua Yang Yêsu, Pô tŭ leh klei knap mñai kơ drei, leh anăn dlăng kơ Khua ƀĭng kna Phao-lô, pô mơak tŭ klei knap mñai kyua phung ruah leh. Leh anăn ñu mđĭ ai hŏng klei sĭt nik: “Tơdah drei djiê leh mbĭt hŏng ñu, drei srăng lŏ hdĭp mbĭt hŏng ñu msĕ mơh; tơdah drei gĭr, drei srăng kiă kriê mbĭt hŏng ñu msĕ mơh” (êlan 11-12). Akâo kơ Khua Yang brei kơ drei klei ktang srăng tŭ klei knap mñai kyua Anăn Khua Yang leh anăn kyua phung mngăt dôk rai luč.
Si ngă čiăng kơ drei hdĭp hŏng ai tiê tŭ klei knap mñai msĕ snăn hlăm klei mă bruă kơ Khua Yang?
Wah lač: Ơ Khua Yang, kâo bi mni kơ Khua Yang Yêsu kyua Ih jing klei bi hmô jăk klă kơ kâo kơ ai tiê tŭ klei knap mñai. Akâo kơ Ih đru kâo mă bruă hŏng klei kñăm bi mơak kơ Ih, leh anăn gưt hlue si klei Ih atăt gai. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 28
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
