Lukas 10:25-37
Nqe cim:
“Nej tsis txhob tshuav leejtwg nqi, tib qho uas nej tshuav luag nqis ces yog ib leeg yuav tsum hlub ib leeg; tus uas hlub lwm tus thiaj yog nws ua raws li txoj kevcai qhia.” (Loos 13:8)
Lus nug xav:
– Tej lus nug thiab lus teb ntawm Tswv Yexus thiab xibhwb qhia Vajtswv txoj Kevcai qhia pom nws totaub txoj kevcai zoo li cas?
– Tus Tswv siv zaj lus pivtxwv hais txog tus neeg Xamalis siab zoo los qhia kom yuav tsum hlub lwm tus li cas?
– Qhov txiaj ntsig ntawm lub neej sib hlub yog dabtsi?
Muaj ib tug xibhwb qhia Vajtswv txoj Kevcai tuaj nug Tswv Yexus hais tias: “Xibhwb, kuv yuav ua li cas, kuv thiaj tau txojsia ntev dhawv mus ibtxhis tsis kawg?” Tswv Yexus nug nws rov, thiab tus xibhwb ntawd teb hais tias yuav tsum hlub tus Tswv kawg siab kawg ntsws thiab hlub yus tej kwvtij zej zog ib yam li yus hlub yus lubcev. Tus Tswv hais tias: “Yog li koj hais lawm; koj cia li ua li ntawd koj thiaj yuav tau txojsia” (nqe 25-28). Yog li, puas yog xav tau txojsia ib txhis ces tsuas yog ua raws ob txoj kevcai ntawd xwb? Tsis yooj yim li ntawd! Tus xibhwb qhia Vajtswv txoj Kevcai no tuaj nug yog xav sim tus Tswv, qhia pom tias nws tsis muaj lub siab ncaj. Nws nug tus Tswv hais tias leejtwg yog nws tej kwvtij zej zog, qhia tias nws xav xov ciam rau txojkev hlub, xav muab cov neeg uas txojcai yuam kom hlub li yus lubcev txo qis kom tsawg. Nws paub txoj kevcai zoo, tiamsis nws tsis ua neej raws li txojkev hlub tiag. Tus Tswv qhia rau nws paub hais tias tsuas paub li ntawd xwb tseem tsis txaus.
Tswv Yexus hais zaj lus pivtxwv hais txog tus neeg Xamalis siab zoo los qhia kom peb paub tias yuav tsum hlub txhua tus raws li Vajtswv lub siab nyiam yog li cas. Qhov xubthawj, tus neeg Xamalis yeej yog haivneeg uas cov Yudais ntxub, tiamsis nws tseem pab tus neeg raug tubsab ntaus uas yog ib tug neeg Yudais. Txojkev hlub tseeb tsis raug xov ciam raws haivneeg, kev ntseeg, meej mom lossis kev xaiv ntsejmuag. Txojkev hlub tseeb tsis xam rau yam ub yam no; tsis nug tias tus no yog leejtwg? Puas tsimnyog kuv pab? Puas muaj nqis zoo rau kuv? Txojkev hlub tseeb yog muab yam uas yus muaj pub rau lwm tus tsis tos luag pauj rov qab. Tswv Yexus qhia hais tias: “Tiamsis nej yuav tsum hlub nej cov yeebncuab thiab ua zoo rau lawv; nej cia li qiv rau lawv tsis txhob cia siab hais tias yuav tau puv ntoob li qub rov qab” (Lukas 6:35). Qhov ob, tus neeg Xamalis tsis pab tus neeg raug tub sab ntaus vim feemxyuam lossis pab kom tas xwb, tiamsis nws pab vim nws muaj lub siab hlub tiag tiag, “thaum nws pom tus uas tubsab ntaus, nws hlub tus ntawd heev” (nqe 33). Nws tsis yog pab kom tau luag nco txog lossis tau koob meej, tsis yog pab vim ntshai txajmuag lossis ntshai lwm tus thuam; kuj tsis yog pab kom tau txiaj ntsig rau tus kheej! Qhov peb, txojkev hlub yuav tsum qhia tawm los ntawm tej haujlwm ua tshwm thiab lub siab dawb: nws txav zog mus xyuas, muab ntaub qhwv tej qhov txhab, muab tsaws caij saum tus nees luav, coj mus pw hauv lub tsev so, them tej nqi nyiaj thiab tu tus raug tubsab ntaus ntawd. Tus neeg Xamalis tau poob nws lub sijhawm, lub zog thiab tej nyiaj txiag, qhov no qhia tias txojkev hlub tseeb yuav tsum raug them nqi; tsis yog tos kom txog thaum yooj yim mam li pab. Tej kwvtij zej zog uas Tswv Yexus qhia tsis xov ciam li tus xibhwb qhia Vajtswv txoj Kevcai kev xav. Txhua tus uas cheemtsum kev pab, puavleej yog kuv tej kwvtij zej zog, thiab kuv txaus siab qhia tshwm kuv txojkev hlub rau lawv los ntawm nplooj siab hlub dawbpaug uas tus Tswv tau pub rau kuv.
Txawm yog nyob hauv Pawg Ntseeg los yog nyob nrog neeg ntiajteb, thaum ua neej muaj kev hlub tseeb ces yog peb ua tiav Vajtswv txoj Kevcai (Loos 13:8), ntawd yog yam uas Vajtswv txaus siab (Henplais 13:16). Tus Tswv tsis xav kom peb ua neej rau tus kheej xwb, tiamsis xav kom peb ua timkhawv txog Nws rau neeg ntiajteb uas tsuas tsis muaj kev ua zoo. Thaum peb ua neej muaj kev hlub, txawm tsuas yog ib qho haujlwm me me xwb los yeej pab txhim kho tau kom lub zej zos muaj kev hlub thiab ua rau tus Tswv Txojmoo Zoo ci mus rau coob leej pom.
Thov Vajtswv,
Leej Txiv uas muaj kev hlub! Thov Koj pub Koj kev hlub ntxiv rau nyuam yaus, kom nyuam yaus hlub Koj thiab hlub lwm tus ib yam li Koj tau hlub nyuam yaus. Nyuam yaus tuav Tswv Yexus Khetos lub npe thov, Amees.
Peb qhia tshwm txojkev hlub rau lwm tus li cas lawm?
Nyeem Vajluskub hauv peb lub xyoos: Yauj 30
Kênh Youtube BHKTHN:
