Lukas 2:25-33
25 Lub sijhawm ntawd muaj ib tug txivneej hu ua Xime-oos nyob hauv lub nroog Yeluxalees. Nws yog ib tug neeg ncaj ncees, nws hwm Vajtswv thiab niaj hnub tos lub sijhawm uas Vajtswv los cawm cov neeg Yixalayees. Vaj Ntsujplig tus dawbhuv nrog nraim Xime-oos, 26 Thiab qhia rau nws hais tias nws yuav tsis tuag ua ntej uas nws pom tus Mexiyas uas Vajtswv coglus tseg. 27 Hnub ntawd Vaj Ntsujplig coj Xime-oos mus rau hauv lub Tuamtsev. Thaum ntawd Yauxej thiab Malis coj nkawd tus metub Yexus tuaj ua kevcai hauv lub Tuamtsev raws li txoj kevcai qhia tseg, 28 Xime-oos muab tus metub los puag thiab ua Vajtswv tsaug hais tias, 29 Tus Tswv, nimno koj twb ua raws li koj coglus tseg lawm, thov koj coj kuv uas yog koj tus tubtxiv mus kaj siab lug, 30 Rau qhov kuv lub qhovmuag twb pom koj txojkev cawm dim. 31 Uas koj npaj rau txhua haivneeg lawm. 32 Nws yog lub teeb uas yuav ci mus rau lwm haivneeg pom kev, thiab yuav ua rau cov neeg Yixalayees uas yog koj haivneeg tau ntsejmuag. 33 Thaum Yexus niam thiab txiv hnov Xime-oos hais txog tus metub li ntawd, nkawd xav tsis thoob li.
Nqi cim:
“Kuv yuav pub lawv muaj sia ntev ua neej nyob; thiab kuv yuav cawm kom lawv dim” (Phau Ntawv Nkauj 91:16).
Lus nug rau sawvdaws xav:
- Vajluskub hais tias Xime-oos yog ib tug neeg zoo licas?
- Xime-oos thov Vajtswv licas?
- Tus Tswv ua dabtsi rau nws thiab nws hu nkauj qhuas Vajtswv licas? – Xime-oos lub siab qhuas Vajtswv txhawb tau peb lub zog licas?
Tau plaub caug hnub tom qab uas Tswv Yexus los yug lawm, Yauxej thiab Malis coj tus metub Yexus mus rau ntawm lub Tuamtsev hauv nroog Yeluxalees ua kevcai ntxuav kom Malis lub cev rov huv (Levis Kevcai 12:1-8) thiab ua kevcai muab tus tub hlob fij rau Vajtswv (Khiavdim 13:11-16). Nyob hauv nroog Yeluxalees muaj ib tug txivneej npe hu ua Xime-oos, nws yog ib tug neeg “ncaj ncees” uas txhais tau hais tias nws yog ib tug neeg ua neej raws li Vajtswv txojlus qhia, nws kuj yog tus neeg “niaj hnub tos lub sijhawm uas Vajtswv los cawm cov neeg Yixalayees”, nws tseem cia siab ntsoov rau tus Mexiyas uas yuav los cawm nws haivneeg. Vajtswv tau coglus rau Xime-oos hais tias nws yuav tsis tuag ua ntej uas nws pom tus Mexiyas uas cov neeg Yixalayees tabtom tos. Thaum Xime-oos pom tus metub Yexus hauv lub Tuamtsev thiab muab tus metub los puag, nws thiaj hu ib zaj nkauj txaus siab ua Vajtswv tsaug, thiab nws zoo siab hlo mus nrog tus Tswv nyob raws li Vajtswv pom zoo (nqi 29).
Nyob hauv zaj nkauj uas Xime-oos hu qhia tawm peb yam tseemceeb ntawm tus Mexiyas. Tim ib, tus Mexiyas pub tau txojkev cawm dim (nqi 30), tus Tswv Yexus los cawm tibneeg ntiajteb. Tim ob, tus Mexiyas tsis yog cov neeg Yudais tus Cawmseej xwb, tiamsis yog txhua haivneeg tus Cawmseej thiab (nqi 31), cov cev Vajtswv lus twb hais txog zaj no lawm (Yaxayas 49:6). Tim peb, tus Mexiyas yuav qhia tshwm qhov tseeb uas hais txog Vajtswv rau txhua tus tibneeg (nqi 32), “ci mus rau lwm haivneeg pom kev” yog qhia kom coob tus tibneeg paub qhov tseeb uas hais txog Vajtswv.
Qhov uas Tswv Yexus los yug yog coj txojkev nplig siab los rau txhua tus tibneeg, nimno peb tsis puag tus metub Yexus hauv xubntiag zoo ib yam li Ximeoos hnub thaud, tiamsis tus Tswv Yexus twb los nyob hauv peb cov ntseeg Yexus lub siab lawm. Peb paub txojkev cawm dim muaj nuj nqis rau peb thiab Vaj Ntsujplig qhia kom peb totaub Vajtswv txojlus. Yog li ntawd, peb lubneej yuav tsum qhia tawm txojkev zoo siab thiab kev txaus siab hauv txhua lub sijhawm, vim peb paub hais tias peb tabtom tau yam uas muaj nqis heev. Tej vajtswv hauv ntiajteb no xav ua kom peb lub qhovmuag siab dig peb thiaj tsis pom txojkev txaus siab, tej ntawd ua rau peb txhawj xeeb, tsis muaj kev kaj siab kom peb mus nrhiav tej kev txaus siab nyob ib vuag li nyiaj txiag, meejmom, hwjchim v.v… los ua peb tug. Peb cia li kawm xyaum Timthawj Paulus lub siab hauv phau ntawv Filipis 4:11b “txawm yog kuv yuav nyob li cas los kuv yeej nyob tau.” Ua tau li no, peb thiaj muaj kev txaus siab zoo ib yam li Xime-oos.
Peb puas niaj hnub hnov txaus siab rau peb lub neej?
Thov Vajtswv:
Tswv Yexus, koj twb los yug cawm nyuam yaus lawm, thov tus Tswv koj qhia kom nyuam yaus paub txais yuav txojkev cawm dim muaj nqis ntawm koj pub, thov koj qhia nyuam yaus niaj hnub txaus siab hauv txhua lub tsamthawj uas nyuam yaus nyob. Ameeg.
Email: kawmvajluskubtxhuahnub@gmail.com
Kênh Youtube BHKTHN:
