1 Kauleethaus 15:58
Yog li ntawd cov kwvtij uas kuv hlub, nej yuav tsum muab siab rau ntseeg, tsis txhob ua ywjfab ywjfwj. Nej yuav tsum rau siab ntso ua tus Tswv tes haujlwm, rau qhov nej twb paub lawm hais tias tej haujlwm uas nej ua rau tus Tswv ntawd puavleej muaj nqis tsis muaj ib yam uas tsis muaj nqis li.
Nqi cim:
“Tus tswv hais tias, zoo heev, koj yog tus tubtxib uas zoo thiab ncaj ncees! Tej yam me me uas koj saib, koj ua ncaj, kuv yuav tsa koj ua tus saib yam uas loj. Koj cia li los nrog kuv nyob kaj siab lug!” (Mathais 25:21).
Lus nug rau sawvdaws xav:
- Timthawj Paulus ntuas cov ntseeg nyob hauv lub nroog Kauleethaus kom lawv yuav tsum muaj lub siab ua tus Tswv haujlwm li cas?
- Vim li cas nws ntuas lawv li ntawd?
- Yam uas txhawb tau tus uas sawv ruaj khov thiab rau siab ntso ua tus Tswv tes haujlwm yog dabtsi?
- Puas muaj ib zaug twg peb nkees thaum pom hais tias yus siv zog ua Vajtswv haujlwm los zoo li pheej tsis muaj qabhau?
- Koj yuav txiav txim siab ua ntxiv lossis cia li tso tseg?
Cia kom teb tau tej uas twb xub hais ua ntej hais tias txojkev tuag tsis yog xaus ntawm txhua yam haujlwm, tiamsis tom qab uas tuag sab nqaij tawv lawm, hnub uas Tswv Yexus rov qab los, peb yuav sawv rov los txais lub cev tshiab. Timthawj Paulus thiaj nqua hu cov ntseeg cia li sawv ruaj khov, tsis txhob ua ywjfab ywjfwj, tiamsis cia li siv lub peevxwm thiab sijhawm rau siab ntso ua Vajtswv tes haujlwm, los ntawm lo lus tab pov txhawb zog hais tias “tej haujlwm uas nej ua rau tus Tswv ntawd puavleej muaj nqis tsis muaj ib yam uas tsis muaj nqis li.”
Tej zaug cov ntseeg nyob hauv Kauleethaus kuj muaj qee tus poob siab thiab qaug zog thaum lawv tus kheej rau siab ua Vajtswv haujlwm tiamsis tsis pom tau dab tsi, li ntawd ua rau lawv ua ywjfab ywjfwj thiab xav tso tseg. Tiamsis Timthawj Paulus hais khov kho hais tias lub cev “uas txawj ploj txawj tuag” yuav hloov ua lub cev “tsis txawj ploj tsis txawj tuag” nyob hauv Vajtswv lub tebchaws (1 Kauleethaus 15:50-52). Qhov no yog lus tseeb, yog kev txhawb zog rau Vajtswv cov menyuam tas siab ua nws tes haujlwm, rau qhov thaum lub sijhawm kawg Vajtswv yuav muab nqi zog rau tus uas ua zoo thiab ua ncaj ncees rau tes haujlwm thaum tseem nyob hauv ntiajteb no (Mathais 25:21).
Peb tabtom tos ntsoov saib tej nqi zog ntawm tes haujlwm zoo thiab peb txojkev ua Vajtswv haujlwm, tiamsis peb yuav pom tsis tas tej nqi zog ntawd thaum tseem nyob hauv ntiajteb no, txawm yog li ntawd los, tsis tau txhais hais tias qhov uas peb ua tus Tswv tes haujlwm sis muaj qab hau. Zaj kawm hnub no qhia rau tus Tswv haivneeg nco ntsoov, qhov uas peb dim yog vim peb ntseeg xwb tsis yog tes haujlwm peb ua, tiamsis tom qab uas peb tau kev cawm dim lawm ces peb yuav tau ua yog sawv ruaj khov, siv sijhawm kom muaj nqis rau Vajtswv tes haujlwm. Txawm yog yuav tau nqi zog tamsim no thiab tsis tau los, peb yeej ntseeg hais tias txhua tes haujlwm uas peb ua Vajtswv yeej khaws cia, thiab yog peb pheej “rau siab ntso ua” ces peb yuav tau txais nqi zog hnub uas Tswv Yexus Khetos rov qab los.
Peb tabtom poob siab, qaug zog lossis yog tseem sawv ruaj khov, tsis ua ywjfab ywjfwj thaum ua tus Tswv tes haujlwm?
Thov Vajtswv:
Vajtswv tus uas ncaj ncees! Thov koj pab kom nyuam yaus tsis poob siab, tsis qaug zog thaum ua koj tes haujlwm tsis pom tau dab tsi, tiamsis thov koj pab nyuam yaus siv sijhawm thiab rau siab ntso ua koj tes haujlwm ntxiv, rau qhov nyuam yaus ntseeg hais tias tej haujlwm uas ua rau Vajtswv puavleej muaj nqis tsis muaj ib yam uas tsis muaj nqis li. Ameeg.
Email: kawmvajluskubtxhuahnub@gmail.com
Kênh Youtube BHKTHN:
