Klei Aê Diê Blŭ: I Kôrantô 15:58.
Êlan kliăng: “Khua ñu lač kơ ñu, Jăk leh, Ơ dĭng buăl jăk leh anăn sĭt suôr. Ih dôk sĭt suôr hlăm bruă điêt, kâo srăng brei ih kiă kriê lu. Mŭt bĕ leh anăn mâo klei hơ̆k mơak mbĭt hŏng khua ih.” (Y‑Mathiơ 25:21).
Klei êmuh ksiêm mĭn: Si ai tiê mă bruă kơ Khua Yang, Khua ƀĭng kna Y‑Pôl mtă kơ phung đaŏ ti Sang Aê Diê Kôrantô brei mâo? Ya ngă ñu mtă snăn? Ya klei mđĭ ai kơ phung kjăp ktang leh anăn jih ai tiê mă bruă kơ Aê Diê? Drei tuôm êdu ai mơ̆ sĭt msĕ si djăp klei drei gĭr mă bruă kơ Aê Diê jing hơaĭ mang? Ya klei diih bi mklă srăng lŏ dơ̆ng ngă amâodah mdei?
Čiăng klah čŭn dŭm klei lač leh êlâo anăn klei djiê amâo djŏ mjưh ruê̆ djăp mta bruă ôh, ƀiădah leh klei djiê hlăm kđeh srăng lŏ mâo klei hdĭp asei mlei hŏng sa asei mlei dưi bi mlih hlăm hruê Khua Yang Yêsu Krist lŏ hriê, Khua ƀĭng kna Y‑Pôl iêu mthưr phung đaŏ brei kjăp ktang, đăm kpư̆ mgei, ƀiădah brei jih ai tiê mă bruă kơ Khua Yang hlăm klei dưi leh anăn klei găl Khua Yang brei ti lăn ala anei, hŏng sa klei rơ̆ng mđĭ ai snăk snei “bruă diih mă hlăm Khua Yang amâo jing hơăi mang ôh.”
Năng ai ti krah phung đaŏ Kôrantô ăt mâo đa đa mnuih tuôm êdu ai leh anăn mgei ai tiê sĭt ka ƀuh klei tŭ mơ̆ng klei mă bruă kơ Khua Yang pô săn leh asei, mơ̆ng anăn klei đaŏ ênưih bi mlih leh anăn lăm lui bruă ngă. Ƀiădah Khua ƀĭng kna Y‑Pôl bi mklă srăng mâo klei bi mlih asei mlei “brŭ rai” jing “amâo brŭ rai” čiăng dưi dưn Ƀuôn Ala Mtao Aê Diê (I Kôrantô 15:50-52). Anei jing sa klei blŭ klă sĭt, jing klei mđĭ ai phung ƀuôn sang Aê Diê lŏ dơ̆ng mă bruă kơ Khua Yang jăk hĭn, êbeh dlai hĭn, kyua thâo klă hlăm hruê knhal tuč, Aê Diê srăng pah mni kơ hlei pô sĭt suôr bi leh bruă pô ti lăn ala (Y‑Mathiơ 15:21).
Drei ăt čang hmang dưi ƀuh klei tŭ mơ̆ng dŭm bruă ngă jăk amâodah mă bruă kơ Aê Diê, ƀiădah klă sĭt drei srăng amâo ƀuh jih ôh jih jang dŭm bruă ngă anăn hlăm dŭm hruê mlan dôk hdĭp ti lăn ala, ƀiădah amâo djŏ snăn ôh dŭm klei tŭ dưn mơ̆ng klei drei mă bruă kơ Aê Diê jing hơaĭ mang. Klei hriăm hruê anei mñă kơ phung ƀuôn sang Aê Diê hdơr, drei dưi bi mtlaih kyua klei đaŏ amâo djŏ kyua bruă ngă ôh, ƀiădah leh drei dưi tlaih snăn bruă klam brei drei ngă jing brei kjăp ktang, ba yua jih mmông găl čiăng gĭr mă bruă kơ Aê Diê. Wăt tơdah klei tŭ drei mă bruă dưi ƀuh hlăk ară anei amâodah hơaĭ, ƀiădah klă sĭt djăp bruă drei mă Aê Diê ƀuh leh sơaĭ, leh anăn tơdah drei “mă bruă êbeh hĭn nanao kơ Khua Yang” snăn drei srăng mơak dưi ƀuh klei tŭ anăn hlăm hruê Khua Yang Yêsu lŏ hriê.
Drei dôk êdu ai, rŭng răng mơ̆ amâodah ăt kjăp ktang, amâo mgei ôh hlăm klei mă bruă kơ Khua Yang?
Wah lač: Ơ Aê Diê pô sĭt suôr! Akâo kơ Ih đru kâo amâo êdu ai, amâo rŭng răng tơdah ka ƀuh ôh klei tŭ dưn mơ̆ng klei drei mă bruă kơ Khua Yang, ƀiădah brei kâo thâo ba yua jih klei găl leh anăn gĭr ktưn mă bruă kơ Khua Yang hĭn kyua đaŏ kjăp klei dleh dlan hlăm bruă ngă kâo amâo srăng jing hơaĭ mang ôh.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Bruă Mtao 15:1-31
Kênh Youtube BHKTHN:
