Klei Aê Diê Blŭ: Bruă Ƀĭng Kna 16:25-34
Êlan kliăng: “Kyuadah tơdah ih hưn hŏng ƀăng kƀông ih kơ Yêsu jing Khua Yang, leh anăn đăo hlăm ai tiê ih kơ Aê Diê bi kbiă lŏ hdĭp Ñu leh mơ̆ng phung djiê, ih srăng tlaih yơh.” (Rôm 10:9).
Klei êmuh ksiêm mĭn: Êjai hlăk dôk ktư̆ yơ̆ng asei mlei huĭ hyưt, ya klei khua mnă êmuh Y‑Pôl leh anăn Y‑Silas? Si diñu dua lŏ wĭt lač? Klei lŏ wĭt lač brei ƀuh ya jing phŭn yuôm hĭn mơ̆ng Klei Mrâo Mrang Jăk? Si klei hriăm anei bi mđĭ ai drei hlăm bruă hiu hưn Klei Mrâo Mrang Jăk?
Khua Yang Yêsu jing Pô bi hmô tloh ênoh kơ klei mtô hưn klei đăo. Hlăk bi tuôm hŏng mniê Samari, Ñu lač kơ kbăng êa; hlăk mtô kơ phung lu, Ñu yua rup ana boh kriăk ƀâo, êđai biăp juăt mưng hŏng diñu… Khua Yang mtô klă êlưih ƀiădah êlam lĭn leh anăn mâo boh tŭ dưn mdê êdimima tơl jih jang mnuih, djăp êpul mnuih khăp sơăi hmư̆ Ñu. Khua ƀĭng kna Y‑Pôl tui ngă msĕ si klei bi hmô mơ̆ng Nai Mtô Prŏng Prĭn ñu hlăk ñu hiu hưn Klei Mrâo Mrang Jăk. Khădah ñu jing sa čô hriăm lu thâo knhâo, čih mkra hră thâo tloh ênoh kơ klei hriăm kơ Aê Diê msĕ si hră ñu čih mơĭt kơ phung đăo ti ƀuôn Rôm, ƀiădah hlăk êjai khua mnă dôk ktư̆ yơ̆ng huĭ êmuh: “Ơ phung khua, ya kâo srăng ngă čiăng mâo klei bi mtlaih?” (êlan 30), klei wĭt lač klă êlưih êdimima, “Đăo bĕ kơ Khua Yang Yêsu, ih leh anăn phung hlăm sang ih srăng tlaih” (câu 31). Wăt tơdah êdei anăn Y‑Pôl leh anăn Y-Silas lŏ mblang thiăm Klei Mrâo Mrang Jăk kơ phung hlăm gŏ sang khua mnă (êlan 32), ƀiădah êjai mmông jêč ruăt hlăk êlâo anăn, diñu dua knŏng klah čŭn Klei Mrâo Mrang Jăk hŏng sa pruĕ blŭ đŭt khuăt klă ƀiădah bŏ ênŭm. Klei wĭt lač anei brei ƀuh phŭn yuôm kơ Klei Mrâo Mrang Jăk jing Khua Yang Yêsu, bi mta klei mkăn knŏng lŏ bi mŭt thiăm. Rôm 10:9 brei thâo klei đăo mâo klei bi mtlaih jing đăo kơ Khua Yang Yêsu jing Aê Diê bi êdah hŏng klei Ñu kbiă lŏ hdĭp, knŏng hjăn Ñu jing Pô Bi Mtlaih Lăn Ala djiê leh kyua klei soh mnuih. Anăn yơh jing Klei Mrâo Mrang Jăk brei drei hưn kơ phung ka thâo Khua Yang.
Klei yuôm kơ sa čô mtô hưn Klei Mrâo Mrang Jăk amâo djŏ ôh kyua klei thâo blŭ amâo dah klei thâo săng kơ Aê Diê jing, ƀiădah lĕ lač klă sĭt kơ arăng klei drei tuôm ƀuh leh, tuôm thâo kral leh klei khăp Khua Yang brei kơ pô hŏng klei Ñu djiê leh anăn kbiă lŏ hdĭp leh. Brei msĕ hŏng khua ƀĭng kna Y‑Pôl: “Kyuadah kâo čuăn amâo čiăng thâo klei mkăn ôh ti krah diih, knŏng Yêsu Krist leh anăn klei arăng pơ̆ng Ñu ti kyâo bi kal.” (I Kôrantô 2:2).
Mta klei Aê Diê čoh čuăn kơ drei amâo djŏ ênoh lu mnuih đăo ôh, ƀiădah klei drei sĭt suôr hŏng bruă Ñu jao (Y‑Mathiơ 28:18-20). Bruă sa čô mnuih hmư̆ klei drei mtô hưn leh anăn čuăn đăo jum Khua Yang Yêsu jing bruă Yang Mngăt Jăk. Kwưh akâo bĕ kơ Yang Mngăt Jăk ktrâo atăt drei truh kơ sa čô mnuih, akâo kơ Ñu mprăp ai tiê digơ̆, leh anăn brei drei jhŏng nao kah mbha Klei Mrâo Mrang Jăk, Khua Yang Yêsu kơ pô anăn hŏng klei klă êlưih, jih ai tiê, leh anăn dlăng kơ bruă Yang Mngăt Jăk bi leh mơ̆ng drei.
Si ngă drei ƀuh dleh mơ̆ hưn kơ arăng Klei Mrâo Mrang Jăk kyuadah huĭ amâo thâo ya klei srăng blŭ? Ya bruă ih ngă leh čiăng dưi găn hgao klei huĭ anăn?
Wah lač: Ơ Khua Yang, akâo kơ Ih brei kâo mâo klei jhŏng leh anăn sĭt suôr hiu hưn Klei Mrâo Mrang Jăk Ih kơ phung găp djuê leh anăn mah jiăng kâo hŏng klei klă êlưih leh anăn jih ai tiê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Bruă Mtao 3:1 – 4:7
Kênh Youtube BHKTHN:
