Tes Haujlwm 16:25-34
25 Thaum kwvlam ib tag hmo, Paulus thiab Xilas tabtom thov Vajtswv thiab hu nkauj qhuas Vajtswv. Cov neeg uas nrog nkawd nyob ua ke hauv tsev lojcuj, lawv sawvdaws mloog nkawd thov Vajtswv thiab hu nkauj. 26 Thaum nkawd tseem hu nkauj ua ciav av txawm qeeg nkaws ua rau lub tsev lojcuj ua zog koog. Ces tamsim ntawd lub tsev lojcuj tej qhovrooj txawm cia li qhib tagnrho thiab tej saw hlau uas khi cov neeg raug txim tej tes taw txawm plam tas huv tibsi. 27 Tus uas zov lub tsev lojcuj tsim dheev nruab dab ntub los, ua ciav tej qhov rooj twb qhib tas lawm. Thaum nws pom li ntawd, nws xav hais tias ntshai cov neeg raug txim khiav tas lawm. Ces nws txawm rho hlo nws rab ntaj los yuav rov tua nws. 28 Tiamsis Paulus hu nrov nrov hais tias, “Koj tsis txhob ua li ko rau koj, peb txhua tus puavleej tseem nyob txhij ntawm no.”
29 Tus uas zov lub tsev lojcuj kom ib tug coj teeb mus rau nws. Nws txawm khiav ceev nrooj mus rau hauv, nws txhos caug ntua ntawm Paulus thiab Xilas kotaw. Nws ntshai ua ibce tshee hnyo. 30 Nws coj Paulus nkawd tawm los, nws nug nkawd hais tias, “Ob tug tijlaug, kuv yuav ua li cas kuv thiaj dim kuv lub txim?”
31 Paulus nkawd teb hais tias, “Koj thiab koj tsevneeg cia li ntseeg tus Tswv Yexus, nej thiaj yuav dim lub txim.” 32 Nkawd qhia tus Tswv Txojlus rau tus uas zov lub tsev lojcuj thiab cov neeg uas nyob hauv tsev mloog. 33 Hmo ntawd nws coj nkawd mus ntxuav nkawd tej qhov txhab uas luag nplawm to. Thaum ntxuav tas, nws thiab nws tsev neeg txawm ua kevcai raus dej. 34 Thaum lawv ua kevcai raus dej tas, nws coj Paulus thiab Xilas rov mus pem nws tsev thiab ua mov rau nkawd noj. Nws thiab nws tsev neeg zoo siab kawg li, rau qhov lawv los ntseeg Vajtswv lawm.
Nqi cim:
“Yog koj lub qhov ncauj lees hais tias Yexus Khetos yog tus Tswv thiab koj lub siab ntseeg hais tias Vajtswv twb tsa Yexus Khetos sawv hauv qhov tuag rov qab los lawm, koj yuav dim.” (Loos 10:9).
Lus nug rau sawvdaws xav:
- Thaum tabtom ntxhov siab thiab txhawj ntshai, tus uas zov lub tsev lojcuj tau nug Paulus thiab Xilas txog yam dabtsi?
- Nkawd teb licas?
- Lo lus teb qhia pom qhov tseemceeb ntawm Txojmoo Zoo yog dabtsi?
- Zaj kawm txhawb peb lub zog licas rau tes haujlwm tshajtawm Txojmoo Zoo?
Tswv Yexus yog ib tug qauv zoo heev rau kev ua tim khawv txog txojkev ntseeg. Thaum ntsib tus pojniam Xamalis, Nws hais txog cov dej hauv lub qhovtshij; thaum qhia cov neeg coob coob, Nws siv tsob txiv hmab, tus yaj yog tej uas lawv ibtxwm paub v.v… Tus Tswv qhia yooj yim tiamsis mus deb mus dav thiab muaj fwjchim ua rau txhua tus, txhua hom neeg puavleej xav mloog Nws qhia. Timthawj Paulus tau ua raws li nws Tus Xibfwb uas loj thaum tshajtawm Txojmoo Zoo. Txawm tias Paulus yog ib tug txawjntse pom deb paub dav, sau tau ntau phau ntawv zoo heev txog kev ntseeg zoo li tsab ntawv Loos, los thaum tus uas zov lub tsev lojcuj txhawj ntshai thiab nug hais tias: “Ob tug tijlaug, kuv yuav ua li cas kuv thiaj dim kuv lub txim?” (nqi 30), ces thaum ntawd Paulus lo lus teb yooj yim kawg li, hais tias: “Koj thiab koj tsevneeg cia li ntseeg tus Tswv Yexus, nej thiaj yuav dim lub txim” (nqi 31). Txawm hais tias tomqab ntawd Paulus thiab Xilas kuj piav txog lub ntsiab ntawm Txojmoo Zoo rau tus uas zov lub tsev lojcuj tsev neeg (nqi 32), los ua ntej ntawd, nkawd tsuas hais sau zog Txojmoo Zoo rau tib nqe lus uas luv luv tiamsis yeej txhij txhua. Lo lus teb no qhia pom txog qhov tseemceeb ntawm Txojmoo Zoo yog Tswv Yexus, lwm yam tsuas yog txhab ntxhiv rau. Loos 10:9 qhia hais tias txojkev ntseeg cawm dim yog txojkev ntseeg hais tias Tswv Yexus yog Vajtswv dhau los ntawm Nws kev sawv hauv qhov tuag rov qab los, thiab Nws tibleeg thiaj yog tus Cawmseej uas tuag vim tibneeg tej kev txhaum. Ntawd yog Txojmoo Zoo uas peb yuav tsum qhia rau cov neeg tsis tau paub Vajtswv.
Qhov tseemceeb ntawm tus ua timkhawv txog Txojmoo Zoo tsis yog txawj hais lus lossis paub Vajluskub, tiamsis qhov tseemceeb yog qhia tseeb rau lwm tus txog tej uas yus tau pom, tau paub txog Tswv Yexus txojkev hlub pub rau yus tus kheej dhau los ntawm Nws txojkev tuag thiab kev sawv rov qab los. Cia li hais ib yam li Timthawj Paulus hais tias: “Rau qhov kuv npaj siab hais tias thaum kuv tuaj txog tim nej, kuv yuav tsis qhia lwm zaj rau nej li, kuv tsuas qhia kom nej paub Yexus
Khetos thiab qhov uas Yexus tuag saum tus ntoo khaublig rau nej xwb.” (I Kauleethaus 2:2).
Yam uas Vajtswv xav ntawm peb tsis yog muaj neeg los ntseeg coob lossis tsawg, tiamsis yog qhov uas peb ncajncees rau lub luag haujlwm uas Nws tau muab cob rau peb ua (Mathais 28:18-20). Qhov uas ib tug neeg mloog peb ua timkhawv thiab txiavtxim siab ntseeg Tswv Yexus yog Vaj Ntsujplig tes haujlwm. Cia li thov Vaj Ntsujplig coj peb mus cuag ib tug neeg twg, thov Nws npaj lawv lub siab, thiab cia li ua siab tawv mus qhia txog Txoj Moozoo thiab Tswv Yexus rau tus ntawd kom yooj yim, hais tas siab tas ntsws, thiab tos saib tes haujlwm uas Vaj Ntsujplig ua tiav dhau los ntawm peb.
Peb puas hnov nyuaj thaum ua timkhawv txog Txojmoo Zoo, vim txhawj ntshai qhov uas tsis paub yuav hais lus licas? Peb tau ua dabtsi kom hla dhau tej kev txhawj ntawd?
Thov Vajtswv:
Tus Tswv, thov pub rau nyuamyaus muaj lub siab tawv thiab ncajncees tshajtawm Koj Txojmoo Zoo rau cov txheeb ze nyuamyaus thiab rau nyuamyaus tej phoojywg kom yooj yim thiab tas siab tas ntsws. Ameeg.
Kênh Youtube BHKTHN:
