Klei Aê Diê Blŭ: I Y-Yôhan 3:2-11
Êlan kliăng: “Čiăng kơ diih thâo sĭt ya jing jăk hĭn, tơl dưi jing êngeh leh anăn amâo mâo klei ƀuah ôh ti Hruê Krist, bŏ hŏng boh klei kpă ênô kbiă hriê mơ̆ng Yêsu Krist, pioh kơ klei guh kơang leh anăn klei bi mni kơ Aê Diê.” (Philip 1:10-11)
Klei êmuh ksiêm mĭn: Ya ngă brei hdĭp kpă ênô leh anăn doh jăk? Si drei ngă čiăng dôk hdĭp kpă ênô? Ya jing boh tŭ dưn mơ̆ng knhuah hdĭp kpă ênô?
Phung Sang Aê Diê hlăk mrâo mkŏ mjing dôk tŭ klei phung khua pô mtô soh bi kdơ̆ng. Diñu mtô kơ Khua Yang Yêsu amâo hriê hlăm asei mlei kđeh ôh (I Y-Yôhan 4:2-3) kyuadah kđeh jing soh amâo dưi bi hlai mbĭt hŏng asei mlei myang doh jăk ôh. Thiăm hlăm anăn, diñu lŏ mtô snei, ngă soh hŏng asei mlei kđeh amâo bi hmăi truh kơ mngăt ôh, msĕ si mmia lŭ lăn kơ boh tâo yuôm; lŭ lăn knŏng đuôm ti êngao, bi hlăm lam boh tâo yuôm ăt dôk jăk siam kluôm dhuôm. Boh jhat jing diñu ƀơ̆ng huă êgao hnơ̆ng, ngă klei knhông hdĭp mtŭk mtŭl, ngă djăp mta klei soh jhat tui si čiăng, kyua diñu lačdah klei anăn knŏng jing klei bi mguôp mnơ̆ng hlăm kđeh hdơ̆ng mnơ̆ng hlăm kđeh! Khua ƀĭng kna Y-Yôhan bi kdơ̆ng hŏng klei mĭn anăn leh anăn mtô snei, hlăk drei đăo kơ Khua Yang Yêsu “drei jing anak Aê Diê” leh anăn “Hlei pô Aê Diê kkiêng leh amâo ngă klei soh ôh; kyuadah mjeh Aê Diê dôk hlăm ñu, … hlei pô amâo ngă klei kpă amâo kbiă hriê mơ̆ng Aê Diê ôh, kăn rei pô amâo khăp kơ ayŏng adei ñu.” (êlan 9-10). Phung đăo kơ Krist brei dôk hdĭp kpă ênô, tui tiŏ klei doh jăk kyuadah jing leh anak Aê Diê. Mâo knuih Aê Diê dôk hlăm drei.
Klei mtrŭt đru phung anak ƀuôn sang Aê Diê hlăm Phung Sang Aê Diê tui tiŏ klei doh jăk jing klei čang hmăng prŏng prĭn srăng bi tuôm hŏng Khua Yang, “drei srăng jing msĕ si Ñu”. Hŏng klei čang hmăng anăn hlăm ai tiê snăn drei “bi doh ñu pô msĕ si Krist pô jing doh” (êlan 2-3). Brei drei knang kơ Yang Mngăt Jăk čiăng dưi dôk hdĭp kpă ênô năng hŏng anôk jing anak Aê Diê. Khua Yang brei leh ao klei kpă ênô kô̆ bhung doh mngač, bruă klam drei brei răng kriê ao anăn amâo bi čhŏ hŏng klei soh lăn ala ôh. Khua ƀĭng kna Y-Yôhan bi klă klei hdĭp kđeh mâo klei bi mguôp hŏng klei jing leh anăn anôk jing klei hdĭp myang: “Hlei pô dôk hlăm Ñu amâo ngă soh ôh; hlei pô ngă soh amâo tuôm ƀuh Ñu ôh, kăn thâo kral Ñu rei” leh anăn “hlei pô amâo ngă klei kpă amâo kbiă hriê mơ̆ng Aê Diê ôh, kăn rei pô amâo khăp kơ ayŏng adei ñu” (êlan 6, 10)! Pruê̆ blŭ “amâo ngă soh ôh” mblang jing “amâo dưi lŏ dôk hdĭp hlăm klei soh ôh”. Tui si khua ƀĭng kna Y-Yôhan, dôk hdĭp kpă ênô amâodah “ngă klei kpă” amâo knŏng amâo lŏ čiăng dôk hlăm klei ngă soh ôh, ƀiădah wăt lŏ brei “bi khăp hdơ̆ng drei pô” (êlan 11).
Khua ƀĭng kna Y-Yôhan kač sa pŏk rup kơ knhuah hdĭp kpă ênô leh anăn thâo bi khăp klă kluôm. Phung Sang Aê Diê Khua Yang mâo leh knuih Aê Diê hlăm ai tiê, snăn brei grăp čô đăo kơ Krist dôk hdĭp leh anăn bi êdah knuih Khua Yang kơ jih jang mnuih hŏng knhuah dôk hdĭp kpă ênô leh anăn bi khăp hdơ̆ng pô tui si klei Khua Yang mtô, čiăng kơ lăn ala dưi thâo kral Khua Yang găn hŏng phung anak Ñu.
Si ngă phung riêng gah ƀuh mơ̆ knhuah dôk hdĭp kpă ênô leh anăn thâo bi khăp hdơ̆ng ayŏng adei drei?
Wah lač: Ơ Ama Doh jăk, kpă ênô leh anăn klei khăp! Bi mni lač jăk kơ Ama pap brei leh klei soh kâo leh anăn đru kâo dôk hdĭp doh jăk msĕ si Khua Yang Yêsu. Brei Yang Mngăt Jăk Aê Diê bi mjing kâo doh jăk leh anăn dôk hdĭp thâo khăp kơ ayŏng adei grăp hruê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
