I Yôhan 3:2-11
“Thoi noh na iĕm jing bơngai ‘lơ̆ng tơpăt, huay kơ đei tơdrong yoch kơplah Yêsu Krist jur ning-mônh. 11 Yua kơ iĕm pơm tôm tơdrong ‘lơ̆ng tơpăt păng gơnang kơ Yêsu Krist đơ̆ng dang ei, na đĭ đăng bơngai gô ư-ang kơ ‘Bok Kei-Dei tơpă.” (Philip 1:10-11)
Nơ̆r jet tơchĕng pơwao:
– Yua kơ kiơ athei arih ‘lơ̆ng tơpăt, ‘lơ̆ng rơgoh?
– Pơm thoi yơ wă kơ arih ‘lơ̆ng tơpăt?
– Đei yua đơ̆ng tơdrong arih ‘lơ̆ng tơpăt noh kiơ?
Khul Bơngai Lui ‘nao wă pơtơm na đei lu bơngai bơtho hơlĕnh mơ̆t wă pơrăm. Lu sư bơtho khan Kră Yang jur ưh kơ jing bơngai tơpă (I Yôhan 4:2-3). Yua kơ kon bơngai noh yoch ưh kơ gơh pơgơ̆p lăm akâu ‘lơ̆ng rơgoh Sư, na pơthim lăm noh, lu sư bơtho khan pơm yoch hăm akâu ưh kơ đei ‘bơm kiơ gah bơhngol, nhen thoi pik trôk tơ lăm tơpei tơmo hlăng oei ‘lơ̆ng. Lĕch đơ̆ng tơdrong noh lu sư sa et hloh kơ ai, pơm pơyô kư̆ kă, păng pơm dôm tơdrong yoch nai yua kơ lu sư tơchĕng khan noh tơdrong ‘bơm lăm tơmam hăm tơduă tơmam đĕch! Yôhan pơma kơ tơdrong noh păng bơtho khan kơplah lui sơng iŏk Kră Yang Yêsu “Bơngai bu kon ‘Bok Kei-Dei, bơngai ‘noh sư ưh pă pơm yoch khŏm khŏm dơ̆ng ôh kơlih kơ sư tơpŭ ming ‘nao jing kon ‘Bok Kei-Dei boih. Sư kon ‘Bok Kei-Dei na sư ưh kơ gơh pơm yoch kư̆m thoi ‘Bă sư ‘Bok Kei-Dei ưh kơ pơm yoch. Bơ̆n gơh kơnăl tơduă bơngai bơ̆n, bơngai bu kon ‘Bok Kei-Dei, bơngai bu kon yang Satan sư pha ra thoi âu: Bơngai bu ưh kơ pơm ‘lơ̆ng tơpăt păng ưh kơ ‘mêm kơ ‘nhŏng oh sư, bơngai ‘noh ưh kơ sĭ kon ‘Bok Kei-Dei ôh.” (trong 9-10). Bơngai lui athei arih ‘lơ̆ng rơgoh, druh kiơ̆ tơdrong ‘lơ̆ng rơgoh yua kơ bơ̆n kon Kră Yang ‘Bok Kei-Dei bơih. Tơdrong arih ‘Bok Kei-Dei oei lăm bơ̆n.
Tơdrong tơgŭm pơtrŭt kơ kon pơlei Kră Yang lăm Khul Bơngai Lui druh kiơ̆ tơdrong ‘lơ̆ng rơgoh noh tơdrong hơmĕng tih gô gơh tơ’bơ̆p Kră Yang, “Bơ̆n gô jing thoi Sư”. Hăm tơdrong hơmĕng noh lăm jơhngơ̆m lei bơ̆n “Bơngai noh pơm dôm tơdrong ‘lơ̆ng tơpăt ngăl, kư̆m thoi Yêsu pơm ‘lơ̆ng tơpăt mơ̆n” (trong 2-3). Bơ̆n athei gơnang kơ Yang Bơhngol ‘Lơ̆ng wă arih ‘lơ̆ng tơpăt wă kơ jing trŏ thoi kon ‘Bok Kei-Dei. Kră Yang đei ăn ao kok rơgoh ‘lơ̆ng tơpăt, tơdrong bơ̆n hiơ̆k pŭ iŏk noh wei ao noh wă kơ huay trôk yua kơ đơ̆ng tơdrong yoch lăm teh đak âu. Yôhan khan hơđăl tơdrong arih mŭk tơmam đei ‘bơm hăm tơdrong gah akâu păng gah bơhngol: “Bơngai bu pôm đon păng Yêsu Krist, bơngai ‘noh ưh pă đei pơm yoch dơ̆ng ôh. Bơngai bu oei pơm yoch khŏm khŏm, bơngai ‘noh sư ưh kơ lah băt kơ Yêsu.” păng “Bơ̆n gơh kơnăl tơduă bơngai bơ̆n, bơngai bu kon ‘Bok Kei-Dei, bơngai bu kon yang Satan sư pha ra thoi âu: Bơngai bu ưh kơ pơm ‘lơ̆ng tơpăt păng ưh kơ ‘mêm kơ ‘nhŏng oh sư, bơngai ‘noh ưh kơ sĭ kon ‘Bok Kei-Dei ôh.” (trong 6, 10)! Nơ̆r “Ưh pă pơm yoch” wă khan “arih ưh pă pơm yoch dơ̆ng”. Kiơ̆ kơ Yôhan arih ‘lơ̆ng tơpăt dah “Pơm tơdrong ‘lơ̆ng tơpăt” ưh kơ sĭ khan lăp arih ưh pă pơm tơdrong yoch đĕch na kư̆m athei “’Mêm mơnat dih băl” (trong 11).
Yôhan chhơ̆ minh pôm rup pơma gah tơdrong ‘lơ̆ng tơpăt păng ‘mêm mơnat tôm tơdrong. Khul Bơngai Lui đei Kră Yang ‘Bok Kei-Dei lăm jơhngơ̆m, lei na rim ‘nu bơngai Lui athei arih păng tơ’bôh tơdrong Kră Yang kơ bơngai nai đơ̆ng tơdrong arih ‘lơ̆ng tơpăt păng ‘mêm mơnat dih băl kiơ̆ kơ nơ̆r Kră Yang bơtho, wă kơ teh đak băt kơ Kră Yang đơ̆ng lu kon Sư.
Ơ Kră Yang rơgoh, ‘lơ̆ng tơpăt păng ‘mêm mơnat! Inh bơnê kơ Ih đei mơnat ăn tơdrong yoch inh păng tơgŭm inh arih ‘lơ̆ng rơgoh thoi Kră Yang Yêsu. Krao khan yua anăn Kră Yang Yêsu Krist, Amen.
Lu bơngai jum dăr hăm ‘bôh tơdrong arih ‘lơ̆ng tơpăt păng tơdrong ‘mêm kơ ‘nhŏng oh bơ̆n ưh?
Đŏk Sơ̆p Hla bơar ‘Bok Kei-Dei lăm pêng sơnăm: Jop 4
Kênh Youtube BHKTHN:
