Êphêsô 6:1-4
“Ơ lu bơngai ‘lơ̆p ‘lŏ drŏ-nglo drŏ-kăn,iĕm athei băt chu yom kơ lu mĕ ‘bă iĕm, lăm tôm tơdrong yua kơ iĕm lui bơih kơ Krã Yang Yêsu Krist. ‘Bok Kei-Dei Sư lăp đon thoi noh. Ơ lu bơngai đei kon hơ’lơ̆p, iĕm ‘nĕ kơ hil hơwĕng kơ lu kon iĕm, hli kơ lu sư rai ơh sơ’ngon rai dêh” ( Kôlôssê 3:20-21)
Nơ̆r jet tơchĕng pơwao:
– ‘Bok Pôl bơtho lu kon hơ’lơ̆p păng mĕ ‘bă athei arih sa dih băl thoi yơ?
– Thoi yơ khan minh pôm hnam dơnŏ lui yom lăm Kră Yang?
– Lu bơ̆n kăl kơ tơiung hnam dơnŏ kơpal hơnă hơyơ?
Đơ̆ng rŏng kơ bơtho tơdrong tơ’bưh bre klo kăn (Êphêsô 5:22-33), ‘Bok Pôl pơtrơp bơtho tơpă tơdrong tơ’bưh mĕ ‘bă păng kon hơ’lơ̆p. ‘Nâu kư̆m jơ̆ tơ’bưh tơgŭm dih băl: kon hơ’lơ̆p chu yom mĕ ‘bă păng mĕ ‘bă ‘nĕ kơ hil hơwĕng kơ kon hơ’lơ̆p.
“Ơ lu bơngai ‘lơ̆p ‘lŏ drŏ-nglo drŏ-kăn, iĕm athei băt chu yom kơ lu mĕ ‘băk iĕm” (trong 1a). “Lăm Kră Yang” wă khan gah Kră Yang, Kră Yang lăp đon (Kôlôssê 3:20) “Tơ̆ng iĕm pơm thoi noh trŏ tơpă” (trong 1b) wă khan noh tơdrong trŏ, tơdrong mă kăl kơ pơm, chư “athei.” Lăm nơ̆r tơm noh “trŏ ‘blep, ‘lơ̆ng tơpăt”. Tơdrong chu yom ưh kơ sĭ chă pơm gah ‘nguaih, mălei noh đơ̆ng jơhngơ̆m pơyom lĕch đơ̆ng jơhngơ̆m hli yom kơ Kră Yang, ‘noh jơ̆ tơdrong ‘mêm mơnat mă Kră Yang ‘Bok Kei-Dei đei pơjing. Kon hơ’lơ̆p gô hŏk pơhrăm hlôh băt chu yom Kră Yang kơplah băt mơ̆ng păng băt lui yom kơ mĕ ‘bă. Khôi juăt: “Athei băt lui yom kơ mĕ ‘bă” năm hơdai hăm nơ̆r pơkă pŭn hiôk noh “đei pŭn hiôk păng arih sot tơ ala teh” (trong 3). Kơplah kon hơ’lơ̆p băt chu yom kiơ̆ kơ mĕ ‘bă bơtho tơ’bôh, lu sư gơh đei bơwei huay kơ yak năm trong glăi păng wơ̆ ‘lŏ lăm tơdrong pŭn hiôk.
“Ơ lu bơngai đei kon hơ’lơ̆p, iĕm ‘nĕ hil kơ kon iĕm dêh” (trong 4a). Tơdrong gơh pơm mĕ ‘bă ưh kơsĭ khan gơh pơgơ̆r wei-lăng mă noh chu pŭ iŏk tơdrong ‘mêm mơnat. Tơdrong ‘lơ̆ng tơpăt lăm hnam dơnŏ ưh kơ oei oei khŏm khŏm tơdah tơdrong bơtho ưh kơ kĕ chơ̆n, kơ’bah kơ mơnat dah pơm dêh hnang. Mĕ ‘bă đei râu krao “iĕm athei bơtho akhan kơ lu sư kiơ̆ tơdrong Kră Yang pơkă” (trong 4b). Wă khan tơdrong bơtho tơ’bôh athei tơ’bôh tơm sư đơ̆ng lăm jơhngơ̆m Kră Yang ‘Bok Kei-Dei, kư̆m đei trŏ sĭt kư̆m đei tơdrong mơnat ăn đĕch. Bơngai hơ’lơ̆p ưh kơ kăl kơ bơtho hil hnang, mă noh kăl kơ bơtho tơ’bôh hăm tơdrong ‘mêm păng kơmĭl ‘lơ̆ng. Kon hơ’lơ̆p ngăl pơhrăm iŏk đon lui ưh kơ đơ̆ng ‘bai bơtho đunh, mă noh đơ̆ng mĕ ‘bă krao khan, huay kơ jô̆ yo păng ‘mêm mơnat dih băl rim năr.
Hnam dơnŏ lui yom ưh kơsĭ khan hnam dơnŏ ‘lơ̆ng tôm bơih ôh, mă-lei noh đơ̆ng mĕ ‘bă păng kon hơ’lơ̆p kư̆m yak năm kiơ̆ Kra Yang chông anhăk. Đơ̆ng tơdrong arih mĕ ‘bă păng kon hơ’lơ̆p lăm hnam dơnŏ kiơ̆ Nơ̆r Kră Yang bơtho pơm tơ’bôh tơdrong ‘lơ̆ng tơpăt păng ‘mêm mơnat đơ̆ng Kră Yang ‘Bok Kei-Dei. Kon hơ’lơ̆p iŏk tơdrong pơyom păng chu yom; mĕ ‘bă pơhrăm iŏk tơdrong chông anhăk kon hơ’lơ̆p hăm tơdrong ‘mêm, hiôk rơgơp păng bơtho kiơ̆ kơ Nơ̆r Kra Yang. Dang ei, kơplah tơdrong gĭt găl lăm hnam dơnŏ rai pă gĭt na tơdrong tơ’bưh sơlam mĕ ‘bă păng kon hơ’lơ̆p đĭ rai pơgăn rai hloh. Lu bơ̆n athei rôp kơjăp tơdrong juăt lăm Nơ̆r Kră Yang wă tơiung lăm hnam dơnŏ kiơ̆ lăm hơnă tơdrong ‘lơ̆ng tơpăt păng tơdrong ‘mêm mơnat , kon hơ’lơ̆p gơh wei rong lăm tơdrong bơtho tơ’bôh lăm Kră Yang, păng mĕ ‘bă bơtho kon hơ’lơ̆p hă jơhngơ̆m đon thoi ‘Bok Krist.
Ơ Kră Yang, apinh bơtho inh băt chu yom, băt bơtho tơ’bôh păng ‘mêm mơnat dih băl rok kiơ̆ Ih. Apinh ăn pŭn hiôk kơ inh tơpă jơ̆ minh pôm hnam dơnŏ lui yom păng jing anih ư-ang anăn Ih đe ư-ang đe ư-ang rim năr. Yua anăn Kră Yang Yêsu Krist, Amen.
Hnam dơnŏ lu bơ̆n kơplah oei pơm kiơ̆ tơdrong tơ’bưh sơlam mĕ ‘bă păng kon hơ’lơ̆p thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Sachari 7
Kênh Youtube BHKTHN:
