Klei Aê Diê Blŭ: Êphêsô 6:1-4
Êlan kliăng: “Ơ phung anak, gưt bĕ kơ amĭ ama diih hlăm jih jang klei, kyuadah klei anăn bi mơak kơ Khua Yang. Ơ phung ama, đăm mngal phung anak diih ôh, huĭdah diñu êdu ai.” (Kôlôs 3:20-21)
Klei êmuh ksiêm mĭn: Si klei Khua ƀĭng kna Y-Pôl mtă mtăn kơ phung anak leh anăn amĭ ama bi dôk hdĭp hdơ̆ng pô? Si jing klei hdĭp sa boh gŏ sang mâo klei mpŭ hlăm Khua Yang? Ya atur brei drei mkŏ mdơ̆ng gŏ sang?
Leh klei mtô kơ klei dôk hdĭp hdơ̆ng ung mô̆ (Êphêsô 5:22-33), Khua ƀĭng kna Y-Pôl lŏ kñăm kơ klei bi mguôp ti krah amĭ ama hŏng phung anak. Anei ăt jing klei bi mguôp mơ̆ng jih dua nah tĭng mơh: phung anak brei gưt asăp kơ amĭ ama leh anăn amĭ ama đăm mngal phung anak ôh.
“Ơ phung anak, gưt bĕ kơ amĭ ama hlăm Khua Yang” (êlan 1a). “Hlăm Khua Yang” mblang jing dŏ Khua Yang, bi mơak kơ Khua Yang (Kôlôs 3:20). “Kyuadah klei anăn jing djŏ” (êlan 1b) mblang jing klei djŏ, mta klei brei ngă, boh blŭ “djŏ” hlăm klei blŭ phŭn jing “djŏ hŏng klei sĭt nik, klei kpă ênô”. Klei gưt asăp amâo djŏ knŏng jing bruă ngă bi êdah ti êngao ôh, ƀiădah jing knuih mpŭ kbiă hriê mơ̆ng ai tiê huĭ mpŭ kơ Aê Diê, anăn jing pruê̆ êlan klei khăp Khua Yang mkŏ mjing. Phung anak srăng hriăm đup gưt kơ Khua Yang tơdah thâo dôk hmư̆ leh anăn mpŭ kơ amĭ ama. Klei bhiăn: “Mpŭ bĕ kơ amĭ ama ih” nao mbĭt hŏng klei ƀuăn jăk mơak jing “čiăng kơ diih dưi mâo klei jăk jĭn leh anăn dưi dôk hdĭp sui ti lăn ala.” (êlan 3). Tơdah phung anak thâo mpŭ kơ klei amĭ ama atăt gai, diñu mâo klei răng mgang dưi tlaih mơ̆ng lu mta klei čuăn ruah soh čhuai leh anăn đĭ hriê kơ prŏng hlăm klei jăk mơak.
“Ơ phung ama, đăm mngal anak diih tơl krêñ ôh” (êlan 4a). Klei dưi jing amĭ ama amâo djŏ ôh jing klei dưi ksiêm dlăng ƀiădah jing bruă klam klei khăp. Klei kpă ênô hlăm gŏ sang amâo dưi djă pioh ôh tơdah klei mtô lač kƀah klei gĭr, kƀah klei thâo săng brei amâodah ngă khăng ktang đei. Amĭ ama mâo klei iêô mthưr brei “čiêm rông digơ̆ hŏng klei mkra mjuăt leh anăn klei bi hriăm tui si klei Khua Yang čiăng” (êlan 4b). Mblang jing klei mtô lač brei bi êdah ai tiê Aê Diê pô, mâo mbĭt klei sĭt nik mbĭt hŏng klei pap. Phung hđeh brei mâo klei kpĭ mjuăt wăt klei atăt gai hŏng klei khăp leh anăn klei bi hmô jăk. Phung anak khăng hriăm klei đăo amâo djŏ mơ̆ng klei mtô mblang dlông dlĭn ôh, ƀiădah mơ̆ng klei amĭ ama wah lač, thâo pap brei, leh anăn thâo bi khăp grăp hruê.
Gŏ sang mpŭ kơ Aê Diê mâo djŏ jing gŏ sang jăk klă ôh, ƀiădah jing anôk amĭ ama leh anăn phung anak hrăm mbĭt êbat ti gŭ klei atăt gai mơ̆ng Khua Yang. Klei dôk dơ̆ng ƀơ̆ng huă amĭ ama leh anăn phung anak gưt hlue Klei Aê Diê Blŭ mtô yơh, srăng bi êdah klei kpă ênô leh anăn klei khăp Aê Diê. Phung anak hriăm mpŭ leh anăn gưt asăp; amĭ ama hriăm atăt gai anak hŏng klei khăp, êdu êun, leh anăn kpĭ mjuăt tui hlue Klei Aê Diê Blŭ. Hruê anei, tơdah arăng dlăng kơ ênoh yuôm gŏ sang ƀrư̆ hruê jing hơăi mang hĭn êjai, snăn klei bi mguôp ti krah amĭ ama leh anăn phung anak ƀrư̆ kđang mčah lu hĭn mơh. Brei drei djă păn kjăp klei bhiăn mơ̆ng Klei Aê Diê Blŭ čiăng mkŏ mjing gŏ sang ti dlông atur klei kpă ênô leh anăn klei khăp, čiêm rông phung anak hlăm klei mtô mtă mơ̆ng Khua Yang, leh anăn amĭ ama bi hriăm anak hŏng ai tiê msĕ si Yang Krist.
Si gŏ sang drei dôk ngă bruă klam ti krah amĭ ama leh anăn phung anak?
Wah lač: Ơ Khua Yang, akâo Ih bi hriăm kâo thâo đup gưt, thâo atăt gai leh anăn thâo bi khăp tui si klei Khua Yang bi hmô. Brei gŏ sang kâo jing sa gŏ sang mpŭ kơ Aê Diê leh anăn jing anôk Anăn Khua Yang mâo klei mpŭ mni grăp hruê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Sakari 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
