Ntawv Nkauj 9:1-14
Nqe cim:
“Tus TSWV yog lub chaw rau cov neeg uas raug luag tsimtxom nkaum, thiab yog lub chaw kaj siab thaum raug kev nyuaj siab” (Ntawv Nkauj 9:9)
Lus nug xav:
– Vajntxwv Daviv qhuas txog Vajtswv tus yamntxwv thiab txoj kev zoo twg?
– Thaum Vajntxwv Daviv tabtom ntsib kev phomsij thiab xav tau Vajtswv cawm tamsim ntawd, nws xub ua dabtsi?
– Peb kawm tau dabtsi ntawm Vajntxwv Daviv txoj kev cia siab rau Vajtswv?
Qhib thawj Phau Ntawv Nkauj 9, Vajntxwv Daviv ua Vajtswv tsaug kawg siab kawg ntsws thiab qhuas Nws, vim Vajtswv yog tus muaj hwjchim loj kawg nkaus, Nws ua tau tej txujci tseemceeb siab tshaj tej uas tibneeg muaj peevxwm ua tau thiab xav txog (nqe 1). Txuas ntxiv, Vajntxwv Daviv qhuas Vajtswv tej yamntxwv zoo. Vajtswv yog tus nyob mus ibtxhis thiab tswj kav txhua yam mus ibtxhis (nqe 7). Nws txiav txim ncaj ncees, tsis xaiv leejtwg ntsejmuag li, thiab siv kev ncajncees txiav txim rau txhua haiv neeg (nqe 8). Vajtswv muab nqi zog rau tus ua zoo thiab rau txim rau tus ua phem, Nws tiv thaiv cov neeg ncaj ncees, thiab yog chaw nkaum ruaj khov rau cov raug tsimtxom thiab hauv txoj kev txomnyem (nqe 4, 9). Nws rhuav tshem cov neeg phem thiab muab lawv lub npe tshem tawm mus ibtxhis (nqe 5–6). Vajtswv yog tus tsimnyog cia siab rau. Cov uas paub Nws lub npe yeej tso siab rau Nws, thiab Vajtswv yeej tsis tso cov uas nrhiav Nws tseg (nqe 10). Vajtswv puv npo kev hlub tshua, Nws paub txhua txoj kev txomnyem kev mob ntawm txhua tus tibneeg thiab yeej tsis hnov qab cov neeg txomnyem uas quaj hu Nws (nqe 12).
Thaum peb nyeem txog nqe 13, peb kuj xav tsis thoob vim paub vajntxwv Daviv tabtom nyob rau lub sijhawm muaj kev phomsij heev cheemtsum tau Vajtswv cawm tamsim ntawd tiamsis nws yeej tsis maj muab nws tej kev txomnyem ntawd los qhia rau Vajtswv, yam xub thawj uas nws ua yog qhia tawm hais tias nws ntseeg ruaj rau ntawm Vajtswv: “Tus TSWV, kuv yuav ua koj tsaug kawg kuv lub siab; kuv yuav qhia txog tej txujci tseemceeb uas koj ua pab kuv lawm. Kuv yuav hu nkauj zoo siab vim muaj koj, kuv yuav hu nkauj qhuas koj uas yog Vajtswv tus muaj hwjchim loj kawg nkaus.” (nqe 1–2). Vajntxwv Daviv qhuas Vajtswv tej yamntxwv thiab Nws txoj kev zoo. Nws rov hais txog tej uas nws tau saj Vajtswv lub hwjchim, txoj kev ncajncees thiab Vajtswv txoj kev hlub tshua yav tas los. Vim li ntawd, Daviv thiaj tso siab ruaj nrees rau Vajtswv yog nws lub qhov chaw nkaum ruaj khov.
Thaum peb kawm paub Vajtswv tus yamntxwv thiab Nws tej kev zoo, pab peb kev ntseeg yuav ruaj khov dua. Thaum peb nco ntsoov suav Vajtswv tej koob hmoov thiab tej kev pab cawm uas Nws tau ua rau peb yav dhau los, yuav ua rau peb muaj kev kaj siab hauv txhua lub tsamthawj uas muaj kev phomsij, thiab ua taus siab ntev tos Vajtswv txoj kev pab cawm raws li Nws lub sijhawm. Tus uas tso siab tiag tiag rau Vajtswv yeej yuav ntsia ntsoov rau Vajtswv uas yog Tus tuav tibneeg lub neej yav tom ntej, thiab nws yuav tsis cia tej xwmtxheej hauv txhua lub tsamthawj ua rau nws kev ntseeg ua yoj ua yees. Muaj qee lub sijhawm Vajtswv cia peb hla tej cua daj cua dub hauv lub neej kom peb txoj kev ntseeg loj hlob thiab saj tau Nws lub hwjchim, Nws txoj kev ncajncees, thiab Nws txoj kev hlub tshua. Txawm peb yog leejtwg, tabtom nyob rau tsamthawj twg, Vajtswv yeej tseem nqua hu peb los nkaum hauv Nws kom peb saj tau Nws txoj kev hlub tshua thiab lub hwjchim kev pab cawm.
Thov Vajtswv,
Vajtswv, Tus Muaj Hwjchim Loj Kawg Nkaus, Tus Ncaj Ncees thiab Muaj Kev Hlub Tshua! Nyuam yaus ua Koj tsaug, vim Koj ibtxwm yog nyuam yaus lub qhov chaw nkaum ruaj khov. Thaum ntsib tej kev txom nyem, Koj yeej mloog nyuam yaus tej lus thov thiab paub yam twg zoo tshaj rau nyuam yaus thiab pab cawm nyuam yaus raws li Koj lub sijhawm. Thov pab nyuam yaus ntseeg ruaj khov rau hauv Koj, kom muaj kev kaj siab thiab cia siab ruaj khov mus li, thiab pab nyuam yaus paub ua lub neej qhuas Koj thiab ua Koj tsaug mus li. Nyuam yaus tuav Tswv Yexus Khetos lub npe thov, Amees.
Peb saj tau Vajtswv txoj kev pab cawm hauv tej kev txomnyem li cas?
Nyeem Vajluskub hauv peb lub xyoos: Xakhaliyas1
Kênh Youtube BHKTHN:
