Klei Aê Diê Blŭ: Klei Mmuñ Hđăp 9:1-14
Êlan kliăng: “Yêhôwa jing anôk đuĕ dăp kơ pô arăng ktư̆ juă, anôk kđap hlăm hruê rŭng răng” (Klei Mmuñ Hđăp 9:9)
Klei Êmuh ksiêm mĭn: Mtao Đawit bi mni kơ ya knuih leh anăn klei jăk siam Aê Diê? Hlăk dôk hlăm boh klei dleh dlan, čiăng klei đru mjêč, ƀiădah ya klei Mtao Đawit ngă leh êlâo hĭn? Ya klei hriăm drei mâo mơ̆ng klei hdĭp Mtao Đawit knang kơ Aê Diê?
Mphŭn kčưm Klei Mmuñ Hđăp mrô 9, Mtao Đawit jih ai tiê bi mni leh anăn mpŭ kơ Aê Diê kyua Ñu jing Pô myang hĭn, ngă jih jang bruă myang kdlưn hĭn kơ klei thâo leh anăn klei mĭn anak mnuih (êlan 1). Lŏ čuê anăn jing klei hơêč hmưi bi mni kơ klei jăk Aê Diê. Aê Diê jing Pô dôk nanao. Ñu kiă kriê nanao hlŏng lar (êlan 7). Ñu jing Pô phat kđi kpă ênô, amâo dlăng kơ sa tĭng; yua klei kpă ênô phat kđi dŭm djuê ana (êlan 8). Ñu bi mni ƀuah mkra klă mngač; mgang klei dưi kơ mnuih kpă ênô; jing anôk kđap kơ phung arăng ktư̆ juă leh anăn hlăk êjai rŭng răng (êlan 4, 9), Ñu bi rai leh phung ƀai leh anăn lăm hĕ anăn diñu leh nanao hlŏng lar (êlan 5-6). Aê Diê năng đăo knang, hlei pô thâo kral Anăn Ñu srăng dưm ai tiê đăo knang kơ Ñu leh anăn Aê Diê amâo lui hlei pô tui duah Ñu ôh (êlan 10). Aê Diê bŏ hŏng klei pap, mđing uêñ kơ klei ênguôt hnĭng phung knap mñai leh anăn amâo wơr bĭt ôh klei digơ̆ ur krao(êlan 12).
Tơdah dlăng truh êlan 13, drei bi kngăr kyua thâo Mtao Đawit dôk hlăm boh klei rŭng răng, čiăng mjêč klei bi mtlaih ƀiădah ñu amâo ruăt hưn ôh klei rŭng răng pô kơ Aê Diê ƀiădah lŏ mđing bi mklă klei đăo knang pô hlăm Ñu: “Ơ Yêhôwa, kâo srăng bi mni kơ ih hŏng jih ai tiê kâo; kâo srăng yăl dliê jih jang bruă yuôm bhăn ih. Kâo srăng hơ̆k leh anăn mơak hlăm ih, kâo srăng mmuñ bi mni kơ anăn ih, Ơ Pô Ti Dlông Hĭn” (êlan 1-2). Mtao Đawit jih ai tiê bi mni kơ knuih leh anăn klei jăk Aê Diê. Ñu lŏ yăl dliê kơ klei thâo leh anăn klei myang, klei kpă ênô leh anăn klei thâo pap Aê Diê hlăm ênuk leh êgao, leh anăn ñu đăo knang kơ Aê Diê jing Pô anôk kđap ti dlông hĭn. Hriăm kơ knuih leh anăn klei jăk Aê Diê đru kơ klei đăo drei kjăp hĭn. Yap nanao klei jăk leh anăn klei Aê Diê bi mtlaih hlăm ênuk leh êgao đru kơ drei êđăp ênang hlăm klei rŭng răng, êđăp ênang dôk guôn klei bi mtlaih hlăm wưng Aê Diê. Pô dưm klei đăo sĭt hlăm Aê Diê srăng kƀĭn nanao hlăm Aê Diê jing Pô kiă kriê êdei anăp, amâo brei klei rŭng răng bi mgei klei đăo pô. Mâo mmông Aê Diê brei drei găn klei rŭng răng čiăng mâo klei đăo klă sĭt leh anăn thâo kơ klei myang, klei kpă ênô leh anăn klei pap Aê Diê. Wăt tơdah hlei drei jing, dôk hlăm ya boh klei, Aê Diê ăt dôk iêô drei kđap hlăm Aê Diê čiăng thâo kơ klei pap leh anăn klei myang bi mtlaih Ñu.
Drei tuôm thâo leh si klei Aê Diê bi mtlaih hlăm klei rŭng răng?
Wah lač: Ơ Khua Yang jing Pô myang hĭn, kpă ênô leh anăn bŏ hŏng klei khăp! Kâo bi mni kơ Ih kyua Ih jing anôk kđap êđăp ênang kơ kâo hlăm klei rŭng răng. Ih mđing hmư̆ nanao klei kâo kwưh akâo leh anăn thâo ya klei jăk hĭn kơ kâo. Akâo kơ Ama khăp hơiêng đru kâo đăo knang hlăm Khua Yang, thâo kơ klei êđăp ênang, klei čang hmăng. Akâo kơ jih klei hdĭp kâo amâo mâo kƀah ôh klei hơêč hmưi leh anăn bi mni kơ Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Sakari 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
