Klei Aê Diê Blŭ: I Kôrantô 7:1-9
Êlan kliăng: “Kâo lač kơ phung ka bi dôk ung mô̆ ôh leh anăn kơ phung mniê djiê ung, jing jăk kơ diñu ăt dôk hliê msĕ si kâo. ” (I Kôrantô 7:8)
Klei Êmuh ksiêm mĭn: Ya klei Khua ƀĭng kna Y-Pôl kơ klei hdĭp dôk hjăn? Ya jing klei mblang êlam hĭn êlan Klei Aê Diê Blŭ “Amâo jăk ôh êkei anăn dôk hjăn”? Si trăn Klei Aê Diê Blŭ hruê anei lŏ mkra wĭt klei drei ƀuh soh čhuai kơ klei hdĭp dôk hjăn ?
Hŏng bruă mâo sa êpul phung đăo ti Kôrantô êmuh, anăn jing djŏ mơ̆ “phung êkei amâo dôk mô̆ jing jăk hĭn”, Khua ƀĭng kna Y-Pôl hưn klei mĭn ñu hŏng klei klă mngač snăk leh anăn mtăp mđơr, jing “Kâo čiăng kơ jih jang mnuih jing msĕ si kâo” (êlan 7), leh anăn “Kâo lač kơ phung ka bi dôk ung mô̆ ôh leh anăn kơ phung mniê djiê ung, jing jăk kơ diñu ăt dôk hliê msĕ si kâo”. Boh blŭ “jing jăk” jing “tơdah ăt dôk hliê msĕ si kâo jing jăk” (êlan 8). Hŏng Khua ƀĭng kna Y-Pôl, dôk hliê amâo djŏ jing “ƀiă jăk hĭn ôh” ƀiădah ăt jing klei “jăk”. Ñu lŏ lač “grăp čô mâo klei Aê Diê brei mdê mdê, sa čô snei, sa čô mkăn snăn” (êlan 7), snăn wăt tơdah hdĭp dôk hliê amâodah dôk ung mô̆ snăn anăn ăt jing klei Aê Diê brei hjăn kơ grăp čô.
Wăt tơdah Khua ƀĭng kna Y-Pôl ăt răng snăk hlăm klei lač kơ bruă anei, hrô kơ lač dôk hliê ăt jing jăk siam, ñu yua boh blŭ lač kơ klei mĭn pô, “kâo čiăng”, “kâo lač” (êlan 7-8), ƀiădah Khua Yang Yêsu pô ăt tuôm wĭt lač leh mơh kơ klei blŭ phung khua ƀĭng kna “Tơdah mâo klei snăn (lač kơ klei tlĕ piu) sa čô êkei hŏng mô̆ ñu, jăk hĭn ñu amâo dôk mô̆ ôh” jing, amâo djŏ ôh grăp čô mơak sơăi hŏng klei hdĭp dôk hliê, knŏng êngao kơ phung mâo Aê Diê brei đuč (Y-Mathiơ 19:9-12).
Lu phung đăo knŏng yua êlan Klei Aê Diê Blŭ “Amâo jăk ôh êkei anăn dôk hjăn” (Klei Mphŭn Dơ̆ng: 2:18) hlue si klei mblang êkoh kơ klei bi dôk ung mô̆ đuč, kyua anăn diñu lač Aê Diê mtô bi dôk ung mô̆ snăn jing jăk hĭn kơ hdĭp dôk hliê. Êlan Klei Aê Diê Blŭ anei jing djŏ kơ Klei Aê Diê Blŭ mtô kơ klei bi dôk ung mô̆ kyua êdei anăn Aê Diê hrih mjing leh mniê jing H’Êwơ leh anăn ba gơ̆ kơ Y-Ađam. Khădah snăn, ksiêm mblang êlam hĭn, êlan Klei Aê Diê Blŭ anăn lŏ jing anak mnuih srăng jăk hĭn tơdah hdĭp hlăm klei bi mguôp hŏng phung mkăn, hŏng klei phung mkăn đru ăt jing phung msĕ si pô. Mnuih dôk hliê hdĭp hlăm klei bi mguôp djŏ hŏng gŏ sang, hŏng Phung Sang Aê Diê, hŏng ƀĭng găp, hŏng phung riêng gah ăt jing mnuih amâo “dôk hjăn ôh”, leh anăn ăt jăk mơh.
Thâo săng ka ênŭm kơ bruă hdĭp dôk hliê tăp năng ngă kơ lu mnuih ƀuh ktrŏ snăk brei dôk ung dôk mô̆ hlăk êjai ka mprăp srăng mŭt hlăm klei jing ung mô̆, amâodah drei mjing klei ktrŏ kơ anak čô amâodah pô mkăn hŏng klei blŭ, klei êmuh “msĕ si pô mđing uêñ” ngă pô hmư̆ klei êmuh rŭng răng. Akâo kơ Aê Diê đru drei gưt asăp Aê Diê kluôm ênŭm čiăng kơ Khua Yang atăt gai leh anăn brei klei hơêč hmưi hlăm klei hdĭp.
Si klei mĭn dôk hliê hlăm Klei Aê Diê Blŭ msĕ amâodah mdê hŏng klei mĭn drei?
Wah lač: Ơ Khua Yang, akâo kơ Ih đru kâo thâo kral klei pap Khua Yang brei leh kơ kâo, čiăng kơ wăt tơdah dôk hliê amâodah mâo gŏ sang, kâo ăt mâo bruă klam leh anăn hơ̆k mơak hŏng klei hdĭp Aê Diê brei. Akâo kơ jih klei hdĭp kâo mâo Khua Yang atăt gai hlue si Ih čiăng. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 120-122
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
