1 Kauleethaus 7:1-9
Nqe cim:
“Nimno, kuv hais rau nej cov uas tseem tsis tau sib yuav thiab cov pojntsuam hais tias, yog nej nyob ib yam li kuv tsis txhob sib yuav ntshai yuav zoo dua” (1 Kauleethaus 7:8)
Lus nug xav:
– Timthawj Paulus hais txog nws txoj kev xav twg txog lub neej nyob ib leeg?
– Lub ntsiab dav uas Vajluskub hais tias “Tsis tsimnyog cia tus txivneej no nyob ib leeg” yog dabtsi?
– Nqe Vajluskub hnub no pab kho peb txoj kev xav yuam kev txog kev nyob ib leeg li cas?
Qhov teebmeem uas ib pab cov ntseeg hauv Kauleethaus tsis to taub, thiab nug txog “Puas yog txivneej tsis yuav pojniam yuav zoo dua?” Timthawj Paulus tau teb meej tseeb raws nws kev xav hais tias “kuv xav kom nej ua lub neej ib yam li kuv” (nqe 7), thiab kuv hais rau nej cov uas tseem tsis tau sib yuav thiab cov pojntsuam hais tias, yog nej nyob ib yam li kuv tsis txhob sib yuav ntshai yuav zoo dua” (nqe 8). Lo lus “zoo dua” txhais hais tias “yog nej nyob ib yam li kuv tsis txhob sib yuav ntshai yuav zoo dua” (nqe 8). Ntawm Paulus kev nyob ib leeg “tsis yog tsis zoo” tiamsis kuj yog qhov “zoo”. Timthawj Paulus hais ntxiv hais tias: “Vajtswv pub nyias muaj nyias siab, ib leeg nyiam lawm ib yam” (nqe 7). Yog li ntawd, txawm yog nyob ib leeg lossis yog yuav txij nkawm ces ntawd puavleej yog txoj koob hmoov uas Vajtswv pub tshwjxeeb rau txhua tus.
Timthawj Paulus ua tib zoo piav qhia qhov teebmeem no rau lawv, nws tsis kom txhua tus yuav tsum nyob ib leeg thiaj yog qhov zoo, tiamsis nws tsuas siv lo lus hais txog nws txoj kev xav xwb xws li, “Kuv xav…”, “Kuv hais…” (nqe 7–8), thiab Tswv Yexus kuj tau teb Nws cov thwjtim txog lo lus no “Yog yuav pojniam yuav txiv zoo li ntawd, ces tsis txhob yuav kuj zoo dua?”. Tiamsis Tswv Yexus hais tias tsis yog txhua tus yuav ua tau li ntawd. Tsuas yog cov uas Vajtswv pub txoj koob hmoov rau lawv nyob ib leeg thiaj tau nyob li ntawd xwb (Mathais 19:9–12).
Ntau tus ntseeg siv nqe Vajluskub “Tsis tsimnyog cia tus txivneej no nyob ib leeg” (Chivkeeb 2:18 )raws li lub ntsiab nqaim hauv kev sib yuav, vim li ntawd lawv thiaj xav hais tias Vajtswv qhia kom txhua tus yuav txij nkawm zoo dua nyob ib leeg. Tseeb tiag nqe Vajlugkub no yeej yog Vajtswv tej lus qhia txog kev sib yuav, vim tom qab ntawd Vajtswv tau tsim Evas thiab coj nws los rau Adas. Tiamsis, yog saib mus rau lub ntsiab uas dav dua, nqe Vajluskub no kuj qhia hais tias yog muaj sib txuas sib raug zoo nrog rau ntawm tibneeg txhua tus, yog muaj txoj kev sib pab los ntawm tus neeg uas zoo li yus yuav zoo dua. Yog li ntawd tus uas tsis yuav txij nkawm tiamsis nws nyob sib raug zoo nrog tsev neeg, pawg ntseeg, phoojywg, thiab cov neeg nyob puagncig nws, ces nws kuj tsis yog “nyob ib leeg” thiab ntawd kuj zoo.
Yog peb to taub tsis txaus txog kev ua neej nyob ib leeg ntau zaus yuav ua rau peb muaj kev ntxov siab, nyuaj siab vim yuav tsum tau muaj txij muaj nkawm thaum uas tsis tau npaj txhij yuav hla mus yuav txij nkawm, qee zaus peb kuj ua rau peb cov menyuam lossis lwm tus ntxhov siab, nyuaj siab thiab, vim peb pheej nug lossis hais tej lo lus zoo li hmov tshua lawv, xws li, “Thaum twg mam yuav pojniam?” lossis “Thaum twg mam yuav txiv?” cov lus nug no ua rau tus uas raug nug txajmuag thiab ntxhov siab. Thov Vajtswv pab kom peb txawj mloog Nws lus kawg siab kawg ntsws thiab cia Nws coj peb kev thiab foom koob hmoov rau peb kev ua neej.
Thov Vajtswv,
Tus Tswv, thov pab kom nyuam yaus paub tej koob hmoov uas Koj pub rau nyuam yaus. Txawm nyuam yaus ua neej tsis muaj txij nkawm los yog muaj txij muaj nkawm lawm los, thov pab kom nyuam yaus muaj feem xyuas rau lub neej ntawd thiab zoo siab rau lub neej uas Koj pub. Thov Koj coj nyuam yaus lub neej kom mus raws li Koj lub siab nyiam. Nyuam yaus tuav Tswv Yexus Khetos lub npe thov, Amees.
Vajluskub hais txog kev nyob ib leeg thooj thiab txawv peb txoj kev xav li cas?
Nyeem Vajluskub hauv peb lub xyoos: Phau Ntawv Nkauj 120-122
Kênh Youtube BHKTHN:
