I Kôrintô 7:1-9
“Kiơ̆ thoi inh wă kơ đĭ đăng bơngai pơm kiơ̆ thoi inh ưh kơ iŏk klo kăn. Mă-lei ‘Bok Kei-Dei ăn kơ rim ‘nu kon bơngai pha ra, mơ’nah Sư ăn ngôi hơdrô̆, mơ’nah Sư ăn iŏk klo kăn.” (I Kôrintô 7:8)
Nơ̆r jet tơchĕng pơwao:
– ‘Bok Pôl pơma tơdrong ayơ gah tơdrong arih hơdrô̆?
– Nơ̆r pơma jrŭ hloh lăm sơ̆p hla bơar ‘Bok Kei-Dei “Kon bơngai arih minh ‘nu minh drô̆ ưh kơ ‘lơ̆ng ôh” ‘noh kiơ?
– Chăl trong lăm sơ̆p hla bơar nơ̆r Kră Yang năr ‘nâu hơmet ming đe lăng glăi gah tơdrong arih hơdrô̆ lu bơ̆n thoi yơ?
Hăm tơdrong lăm khul bơngai lui tơ pơlei Kôrintô mă kơ băt tơdrong kiơ, ‘noh hăm trŏ “Drŏnglo ‘lơ̆ng hloh ‘nĕ iŏk akăn”. ‘Bok Pôl pơma kiơ kơ sư minh tơdrong rơđah păng lei lăi băl, khan “Kiơ̆ thoi inh wă kơ đĭ đăng bơngai pơm kiơ̆ thoi inh ưh kơ iŏk klo kăn” (trong7), păng “Inh wă khan kơ lu bơngai ưh kơ đei klo kăn, păng lu bơngai drŏ kăn adro thoi âu: Dah iĕm ngôi hơdrô̆ thoi inh ‘lơ̆ng mơ̆n”. Nơ̆r “’Lơ̆ng mơ̆n” wă khan “Dah iĕm ngôi hơdrô̆ ‘lơ̆ng mơ̆n”. (trong 8). Hăm ‘Bok Pôl, ngôi hơdrô̆ ưh kơ trŏ “Ưh kơ gan ‘lơ̆ng” mălei wă khan “’lơ̆ng” na sư pơma dơ̆ng: “Kiơ̆ thoi inh wă kơ đĭ đăng bơngai pơm kiơ̆ thoi inh ưh kơ iŏk klo kăn. Mă-lei ‘Bok Kei-Dei ăn kơ rim ‘nu kon bơngai pha ra, mơ’nah Sư ăn ngôi hơdrô̆, mơ’nah Sư ăn iŏk klo kăn.” (trong 7). Thoi noh mă khan arih hơdrô̆ dah pơjing hnam dơnŏ lei ‘noh đơ̆ng Kră Yang ăn kơ rim ‘nu bơngai. Mă khan‘Bok Pôl pơma tôch kơ pơ ‘lơ̆ng lăm tơdrong ‘nâu, tơplih kơ pơma ngôi hơdrô̆ kư̆m dai ‘lơ̆ng mơ̆n, sư yua lu nơ̆r pơma kiơ̆ kơdih sư. “Inh wă”, “Inh pơma” (trong 7-8). Mălei Tơ’ngla Kră Yang đei tơl ăn hơđăl kơ lu bơngai pơhrăm păng sư: “Bơ̆n băt kơ achăng lê̆ akăn ưh kơ gơh, dah lê̆ kơ iŏk akăn đĕch ‘lơ̆ng hloh.” wă khan, ưh kơ đei bu khan arih hơdrô̆ khan chơt hiôk pôm lu bơngai mă Kră Yang rơih iŏk đĕch (Mathiơ 19:9-12).
Lơ bơngai lui yua nơ̆r Kră Yang “Kon bơngai oei minh ‘nu minh drô̆ ưh kơ ‘lơ̆ng ôh” (Blŭng a 2:18) kiơ̆ kơ tơdrong đe pơma tơpă lăm ŭnh om, kơlih kơ thoi noh na lu sư khan Kră Yang bơtho thoi âu pơjing hnam dơnŏ ‘lơ̆ng hloh kơ ngô̆ thoi hơdrô̆. Nơ̆r Kră Yang âu trŏ thoi nơ̆r Kră Yang đei bơtho gah pơjing ŭnh om yua kơ đơ̆ng rŏng kơ ‘noh Kră Yang đei pơjing Drŏkăn blŭng a ‘noh yă Ewơ păng anhăk ba ăn jê̆ ‘bok Ađam. Mă khan lei ră, lăng lăng nơ̆r pơma jrŭ ‘biơ̆, trong lăm sơ̆p hla bơar nơ̆r Kră Yang ‘noh oei đei gĭt kăl pơma kon bơngai ‘lơ̆ng hloh kơplah arih tơ’bưh tơdưa kon bơngai, hăm tơdrong tơgŭm băl kư̆m lei lăi thoi bơ̆n mơ̆n. Bơngai ngôi arih hăm tơdrong tơ’bưh hnam dơnŏ, hăm Bơngai lui, hăm bôl juăt, hăm bơngai jum dăr kư̆m ưh kơ trŏ khan “Ngôi hơdrô̆” păng kư̆m ‘lơ̆ng mơ̆n.
Hlôh ưh kơ tôm mah gah ngôi hơdrô̆ phŏ đei pơm kơ lơ bơngai tơdrong tơtăm athei đei akăn dah klo kơplah tam mă iŏk klo dah akăn, gah bơ̆n tơtăm kơ kon hơ’lơ̆p dah hăm bơngai nai hăm nơ̆r pơma, nơ̆r jet “Rŏ lăng hiơ̆k bơngơ̆t” pơm kơ đe apinh rŭng răng.Apinh Kră Yang tơgŭm ăn kơ bơ̆n chu Kră Yang tơdrong Kră Yang chông anhăk păng tuh ăn pŭn hiôk lăm chăl arih bơ̆n.
Ơ Kră Yang, apinh Ih tơgŭm inh băt kơnăl Kră Yang ăn kơ inh, mă khan arih hơdrô̆ dah đei hnam dơnŏ, inh kư̆m arih băt hiơ̆k păng arih chơt hiôk đơ̆ng ih ăn. Apinh chăl arih inh đei Kră Yang chông anhăk kiơ̆ Ih. Krao khan yua anăn Yêsu Krist, Amen.
Kiơ̆ kơ lăm Sơ̆p hla bơar nơ̆r Kră Yang tơdrong ngôi hơdrô̆ lei lăi dah phara kiơ̆ akâu bơ̆n kơdih thoi yơ?
Đŏk Sơ̆p hla bơar ‘Bok Kei-Dei lăm pêng sơnăm: Hơriso 120-122
Kênh Youtube BHKTHN:
