Klei Aê Diê Blŭ: Klei Mmuñ Hđăp 8:1-9
Êlan kliăng: “Ơ Yêhôwa, Khua Yang hmei, anăn ih kdrăm kơah hlăm jih lăn ala! Ih mdưm klei guh kơang ih ti dlông hĭn kơ jih phung adiê.” (Klei Mmuñ Hđăp 8:1)
Klei êmuh ksiêm mĭn: Klei Mmuñ Hđăp 8 brei ƀuh si klei Khua Yang jing kdrăm kơah leh anăn guh kơang? Anak mnuih dưi hrih mjing hŏng ya klei pap leh anăn ya bruă klam? Si klei hriăm đru drei hdĭp hlăm klei bi mguôp hŏng Khua Yang, hŏng pô mkăn leh anăn hŏng jih jang mnơ̆ng riêng gah?
Klei guh kơang Yêhôwa dưi bi êdah hlăm tar lăn adiê. Kyua Khua Yang hrih mjing leh dŭm tal adiê hŏng “kđiêng kngan Ñu”; mlan, phung mtŭ hŏng jih jang mnơ̆ng dhơ̆ng dưi hrih mjing hŏng Klei Ñu blŭ. Wăt tơdah drei amâo dưi ƀuh ôh Khua Yang kyua amâo êdah ôh, ƀiădah tơdah dlăng kơ čư̆ dliê êa leh anăn jih jang mnơ̆ng jăk siam snăk, drei thâo ƀuh Aê Diê myang snăk, kdrăm kơah leh anăn guh kơang snăk!
Mtao Đawit bi kngăr leh kyua klei pap Aê Diê brei leh kơ anak mnuih êgao kơ klei mnuih dưi bi mĭn. “Ih mjing ñu ƀiă ti gŭ Aê Diê, leh anăn ih mđua ñu klei guh kơang leh anăn klei mpŭ” (êlan 5). Anak mnuih dưi hrih mjing hlue si rup Aê Diê, mâo klei thâo, klei mbruă, klei thâo săng knhuah hdĭp, leh anăn boh nik mâo mngăt čiăng mguôp hŏng Ñu. Anak mnuih mâo Aê Diê brei klei dưi kriê dlăng jih jang mnơ̆ng (êlan 6; Klei Mphŭn Dơ̆ng 1:26-27). Wăt tơdah anak mnuih ngă soh leh “amâo tơl mâo klei guh kơang Aê Diê ôh” (Rôm 3:23), ƀiădah drei ăt jing phung Aê Diê khăp, hdơr leh anăn čuă čhưn (êlan 4).
Mơ̆ng ƀăng êgei hđeh điêt leh anăn phung hđeh dôk mam, Aê Diê dưi ngă “brei pô roh leh anăn pô rŭ ênua dôk ñăt” (êlan 2). Klei anei mñă klă klei myang Aê Diê amâo knang kơ ai ktang amâodah klei thâo mĭn anak mnuih ôh. Aê Diê ruah phung êdu awăt ƀiădah luă gŭ leh anăn bi ti gŭ pô čiăng bi êdah klei myang Ñu. Mphŭn pŏk leh anăn mjưh ruĕ Klei Mmuñ Hđăp 8 jing klei kkuh mpŭ leh anăn klei hơêč hmưi Anăn Khua Yang guh kơang kluôm lăn ala! Klei bi mni kơ Anăn Khua Yang jing klei bi êdah kơ sa čô mnuih thâo săng djŏ kơ ênoh yuôm pô.
Anak mnuih khăng knang hlăm klei dưi, anôk bruă, prăk mah čiăng dlăng hơăi mang amâodah amâo mtăp mđơr hŏng pô mkă. Phung đăo kơ Khua Yang brei thâo săng klei yuôm bhăn Aê Diê brei jing klei pap čiăng hđĭp mâo bruă klam hŏng Khua Yang, hŏng pô mkăn leh anăn hŏng wăl anôk Aê Diê hrih mjing. Drei srăng thiăm klei khăp kơ Khua Yang, hdĭp hdơr knga kơ Ñu, kkuh mpŭ leh anăn mpŭ mni Anăn Ñu nanao. Drei thâo mpŭ kơ pô leh anăn khăp kơ drei pô hŏng klei djŏ; ƀuh Khua Yang hlăm grăp čô mnuih čiăng blŭ tlao bi djŏ leh anăn bi mpŭ hdơ̆ng pô; hdĭp thâo khăp, đru mgang leh anăn đru kơ phung dôk hjăn păn, êdu awăt. Drei ăt thâo săng răng mgang wăl anôk Aê Diê hrih mjing leh čiăng răng wăl hdĭp Aê Diê brei.
Drei hdĭp djŏ hŏng klei jing yuôm bhăn Aê Diê brei leh mơ̆? Mâo ya klei brei drei bi mlih?
Wah lač: Ơ Khua Yang jing Aê Diê kâo! Klei guh kơang leh anăn klei kdrăm kơah Ih mngač tar lăn adiê. Bi mni kơ Ih hrih mjing leh kâo yuôm bhăn snăk, brei kâo đua klei guh kơang leh anăn brei kâo dưi bi mguôp hŏng Ih. Akâo kơ Ih đru kâo huĭ mpŭ kơ Khua Yang hĭn leh anăn jing msĕ si Khua Yang hĭn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Markôs 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
