Hơriso 8:1-9
“Ơ Kră Yang, Ih boih Kră Yang lu nhôn, Anăn Ih ‘lơ̆ng rŏ jơ̆p kơ lăm teh đak; Tơdrong ư-ang rang mơnhal Ih jơ̆p tơ kơpal plĕnh!” (Hơriso 8:1)
Nơ̆r jet tơchĕng pơwao:
– Hơriso 8 tơ’bôh Kră Yang tih tin păng ư-ang thoi yơ?
– Kon bơngai đei pơjing hăm dôm tơdrong pŭn hiôk păng pŭ iŏk kiơ?
– ‘Bai pơhrăm âu tơgŭm lu bơ̆n arih thoi yơ lăm tơdrong tơ’bưh hăm Kră Yang, hăm kon bơngai păng hăm dôm tơmam jum dăr?
Tơdrong ư-ang kơ Kră Yang Yêhôwa đei tơ’bôh tơ jơ̆p kơpal plĕnh. Yua kơ Kră Yang đei pơjing lu tăl plĕnh hăm “hơnglŏu ti Sư”; măt khei, lu sơnglŏng păng dôm tơdrong tơmam đei pơjing hăm Nơ̆r Kră Yang akhan.
Mă khan lu bơ̆n ưh kơ ‘bôh Kră Yang yua kơ Sư ưh kơ tơ’bôh kơ lu bơ̆n, mă-lei tơdah bơ̆n lăng tơ dôm tơdrong tơmam tơ kơpal plĕnh ‘lơ̆ng rŏ păng tih krưp, lu bơ̆n gơh băt kơnăl kơ Kră Yang mơsêh hlĭch chrơp, rŏ sor păng ‘lơ̆ng rŏ pă băt dang yơ!
Pơtao Đawĭt lăng hlĭch yua kơ tơdrong pŭn hiôk Kră Yang ăn kơ kon bơngai hloh kơ tơdrong tơchĕng. “Kră Yang pơjing kon bơngai hơtuch ‘biơ̆ kơ Sư, pơyơ̆l ăn kơ lu sư tơdrong ư-ang păng đei pơyom” (trong 5). Kon bơngai đei pơjing kiơ̆ thoi rup Kră Yang, đei tơdrong gơh hơgei, gơh pơm tôm tơdrongc gơh tơchĕng pơm ‘lơ̆ng, păng mă loi sư đei tơdrong arih gah bơhngol gơh tơ’bưh hăm Sư. Kon bơngai gơh đei Kră Yang ăn gơh pơgơ̆r wei-lăng tôm tơdrong tơmam (trong 6; Blŭng a 1:26-27). Mă khan kon bơngai pơm yoch “weh ataih đơ̆ng Kră Yang ‘Bok Kei-Dei” (Rôm 3:23), mâlei lu bơ̆n Kră Yang oei ‘mêm mơnat oei ‘blŏk păng wei-lăng (trong 4).
Đơ̆ng ‘bơ̆r lu bơngai hơ’lơ̆p păng bơngai nge oei mŏm, Kră Yang gơh “ pơm kơ lu bơngai ayăt păng lu bơngai wă pơm ‘mong gô thĕng hreh (trong 2). Tơdrong âu wă pơma kơ tơdrong mơsêh pran kơtang Kră Yang ưh kơ kiơ̆ kơ jơhngơ̆m pran dah gơh hơgei kon bơngai. Kră Yang rơih iŏk lu bơngai rơdu tơrăn hmă đĕch păng iơ̆m dim iŏk đon ala wă pơm tơ’bôh tơdrong mơsêh pran Sư. Đơ̆ng blŭng a păng tuch luch lăm Hơriso 8jơ̆ tơdrong kơkuh păng ư-ang Anăn Kră Yang gơh ba ăn jơ̆p jang kơ teh đak! Tơdrong hơri ư-ang Anăn Kră Yang noh jơ̆ wă tơ’bôh kơ minh ‘nu bơngai băt tơpă gah tơdrong gĭt găl sư kơdih.
Kon bơngai ngăl yua jơhngơ̆m pran, gơh jang, đei jên tơmam wă lăng pơdê păng arih ưh kơ lăp đon hăm bơngai nai. Khul Bơngau Lui kăl kơ băt hơđăl anih gĭt kăl Kră Yang ăn ‘noh jơ̆ tơdrong pŭn hiôk wă kơ arih đei pŭ iŏk hăm Kră Yang, hăm bơngai nai hăm dôm tơdrong tơmam mă Kră Yang đei pơjing. Lu bơ̆n rai đei jơhngơ̆m ‘mêm kơ Kră Yang, arih băt bơnê kơ Sư, kơkuh păng băt ư-ang kơ Kră Yang ưh kơ pơdơh. Lu bơ̆n băt lăng gĭt kơ bơ̆n kơdih păng ‘mêm kơ bơ̆n kơdih mă trŏ; lăng ‘bôh Kră Yang lăm rim bơngai wă kơ oei sa mă rơhâu hơlăng păng pơyom dih băl; arih ‘mêm mơnat, tơdŏng tơgŭm lu bơngai mơti mơtuei, kơ’bah kơ’bôch. Lu bơ̆n athei băt bơwei tơdrong arih đơ̆ng Kră Yang đei pơjing wă kơ dôm tơdrong arih gơh arih đơ̆ng Kră Yang ăn.
Kơkuh kơ Ih jơ̆ Kră Yang ‘Bok Kei-Dei inh! Tơdrong ‘lơ̆ng rŏ păng rŏ sor Ih hơdah hơdong jơ̆p kơpal plĕnh. Bơnê kơ Ih đei pơjing inh gĭt găl dêh, pơyơ̆l kơ inh tơdrong ‘lơ̆ng rŏ Ih păng ăn kơ inh gơh tơ’bưh hăm Ih! Apinh ăn kơ inh rai băt ‘mêm yom kơ Ih păng rai jing Ih hloh. Krao khan yua Anăn Kră Yang Yêsu Krist, Amen.
Lu bơ̆n hăm arih trŏ kơ anih gĭt kăl đơ̆ng Kră Yang ăn ưh? Hăm đei tơdrong kiơ kăl kơ tơplih?
Đŏk Sơ̆p Hla ar ‘Bok Kei-Dei lăm pêng sơnăm: Markôs 1
Kênh Youtube BHKTHN:
