Klei Aê Diê Blŭ: II Têsalônik 1:3-10
Êlan kliăng: “Kyuadah sĭt nik Aê Diê mĭn jing djŏ bi wĭt klei knap mñai kơ phung bi knap diih” (II Têsalônik 1:6)
Klei êmuh ksiêm mĭn: Ya klei sĭt nik Khua ƀĭng kna Y-Pôl hưn čiăng bi juh Phung Sang Aê Diê Têsalônik kơ jih klei knap mñai digơ̆ dôk tŭ? Si klei bi kmhal srăng truh kơ phung amâo đăo ôh kơ Khua Yang? Ya klei mtrŭt čiăng kơ drei hmiêt mkăp tŭ klei knap mñai kyua Anăn Khua Yang?
Khua ƀĭng kna Y-Pôl bi mni kơ Khua Yang kyua phung đăo ti ƀuôn Têsalônik kyua klei gĭr digơ̆ leh anăn kyua klei đăo digơ̆ hlăm jih jang klei arăng ngă jhat leh anăn klei knap mñai digơ̆ tŭ (êlan 3-4). Čiăng bi juh Phung Sang Aê Diê, ñu hưn mdah sa klei sĭt nik êlam snăk: Aê Diê kpă ênô (êlan 5-6). Klei anei amâo knŏng hưn mdah jih ya klei Aê Diê srăng ngă ôh ƀiădah wăt lŏ kñăm kơ knuih Aê Diê jing. Pô kpă ênô amâo srăng dlăng hơăi mang kơ klei jhat ƀai ôh, ƀiădah sĭt nik srăng phat kđi klei soh (Klei Kbiă 34:7; Khua Pô Mtô 3:17). Phung đăo ti ƀuôn Têsalônik dôk tlă anăp hŏng klei arăng ngă jhat, tlao mưč leh anăn ktư̆ juă kyua klei digơ̆ đăo. Khua ƀĭng kna Y-Pôl rơ̆ng kơ digơ̆ snei, Aê Diê kpă ênô srăng “bi wĭt klei knap mñai kơ phung bi knap diih” (êlan 6). Anei jing sa klei ƀuăn sĭt nik, Aê Diê pô yơh srăng phat kđi kpă, amâo mâo hlei pô dưi hngah ôh (Rôm 3:19-20, Klei Mmuñ Hđăp 143:2).
Klei kpă ênô Aê Diê bi truh sĭt mbĭt hŏng klei pap nanao. Phung amâo đăo ôh kơ Khua Yang srăng dôk ti anăp klei phat kđi, bi phung đăo srăng dưi dôk “mdei” hlăk Khua Yang Yêsu srăng bi êdah mơ̆ng adiê (êlan 7). Boh blŭ “mdei” tinei mblang jing dôk mdei hơĭt ênang, lŏ bi mrâo leh anăn mă mđuĕ hĕ jih klei ktrŏ. Hŏng jih jang phung đăo kơ Khua Yang Yêsu, hruê phat kđi knhal tuč amâo jing sa hruê huĭ hyưt ôh, ƀiădah jing klei đăo digơ̆ dưi bi sĭt, leh anăn lŏ bi wĭt jih kluôm dhuôm ya klei knap mñai digơ̆ tŭ leh. Khua ƀĭng kna Y-Pôl hưn mdah Khua Yang Yêsu lŏ hriê “ti krah pui trơ̆ng” mbĭt hŏng phung dĭng buăl jăk myang Ñu, sa rup kdrưh kơang, doh jăk. Anăn jing hruê jăk mơak kơ phung mnuih dưi dlăng ƀuh Mtao guh kơang, ƀiădah srăng jing mnĭt mmông huĭ hyưt êdimima kơ phung hngah kơ Klei Mrâo Mrang Jăk. Klei phat kđi bi êdah klei kpă ênô Aê Diê; klei guh kơang pioh brei kơ phung mâo klei bi mtlaih bi êdah klei pap Ñu. Jih dua klei bi êdah sơăi klei doh jăk leh anăn klei sĭt nik Khua Yang.
Tui čuê, Khua ƀĭng kna Y-Pôl bi klă sa klei blŭ bŏ hŏng klei čang hmăng: “Hlăk Ñu srăng lŏ hriê hlăm hruê anăn, čiăng mâo klei guh kơang mơ̆ng phung doh jăk Ñu, leh anăn klei mpŭ mơ̆ng jih jang phung đăo leh, kyuadah diih đăo leh kơ klei hmei hưn kơ diih” (êlan 10). Klei anei jing phŭn kơ hruê phat kđi knhal tuč pioh brei kơ phung mâo klei bi mtlaih, amâo djŏ klei huĭ ôh, ƀiădah klei hơ̆k mơak. Khua Yang Yêsu lŏ hriê bi êdah, Anăn Ñu srăng mâo klei guh kơang leh anăn mpŭ mni ti krah phung ƀuôn sang Ñu. Hruê phat kđi knhal tuč amâo djŏ jing tuč ruê̆ ôh ƀiădah kčưm dơ̆ng kơ klei hơ̆k mơak nanao hlŏng lar hŏng Pô Bi Mtlaih drei leh. Drei srăng ƀuh Pô kpă ênô phat kđi hŏng klei kpă. Klei anăn yơh jing klei mtrŭt drei hmiêt mkăp tŭ klei knap mñai kyua Anăn Khua Yang.
Si ngă êjai dôk tlă anăp hŏng klei lông dlăng leh anăn knap mñai, drei mâo klei bi juh mơ̆ng klei kpă ênô Khua Yang mơ̆?
Wah lač: Ơ Khua Yang, akâo Ih thiăm brei klei ktang kơ kâo hlăm klei knap mñai, leh anăn mñă brei kâo hdơr, Ih jing Pô kpă ênô srăng phat kđi kpă hlăm hruê Khua Yang Yêsu lŏ hriê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsra 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
