Klei Aê Diê Blŭ: Klei Mmuñ Hđăp 10:1-18
Êlan kliăng: “Ih ƀuh leh jih; ih ƀuh klei knap mñai leh anăn klei dleh, čiăng bi kmhal diñu hŏng kngan ih. Pô knap mñai jao ñu pô kơ ih; ih jing pô đru phung anak êrĭt” (Klei Mmuñ Hđăp 10:14)
Klei êmuh ksiêm mĭn: Si klei pô čih hră kwưh akâo leh hŏng Aê Diê kơ phung ƀai? Ti anăp boh klei anăn, si pô čih hră mđing kơ Aê Diê leh anăn bi êdah klei đăo? Si ngă čiăng kơ drei đăo kjăp kơ Aê Diê kpă ênô ăt dôk kiă kriê wăt tơdah klei Ñu phat kđi msĕ si hnui?
Klei Mmuñ Hđăp 10 jing klei kwưh akâo mơ̆ng sa čô huĭ mpŭ hlăk êjai msĕ si klei ƀai dưi hĕ ƀiădah Aê Diê ăt dôk kriêp ñăt: “Ơ Yêhôwa, si ngă ih dôk kbưi? Si ngă ih mdăp êjai mâo klei knap mñai?”. Anei jing klei klei ênguôt hnĭng kjham snăk hlăk mnuih lui leh anăn mưč kơ Aê Diê dôk ngă mgao, tluh, ngă jhat, mplư ngă jhat leh anăn plah mă ngăn drăp phung jăk. Diñu lač hlăm ai tiê amâo mâo ôh Aê Diê, leh anăn tơdah mâo snăn Aê Diê ăt kăn ƀuh klei diñu ngă, kăn dưi ngă kơ diñu rei. Diñu ăt dôk hdĭp jăk mơak, êngiê ngă klei jhat! “Aê Diê wơr bĭt leh, Aê Diê mdăp ƀô̆ mta, leh anăn amâo srăng dlăng ôh” (êlan 11)!
Leh ñu myơr hưn mdah boh klei ênguôt hnĭng anăn, pô čih hră mđing ai tiê ñu kơ Aê Diê. Ñu bi mklă klei thâo săng phung ƀai jing soh. Aê Diê kpă ênô leh anăn mâo jih klei dưi dôk kiă kriê nanao. Klei Ñu phat kđi jing dlông snăk kyua anăn diñu amâo thâo ƀuh ôh (êlan 5-6, 11). Ñu ăt dôk gĭr wah lač kơ Aê Diê ngă bruă čiăng kriê pioh klei kpă ênô (êlan 12-15). Ñu bi mklă Aê Diê jing Mtao lă lar, djă pioh klei phat kđi kpă ênô; Aê Diê ƀuh jih jang, Ñu mđing uêñ bi mtlaih phung êdu awăt leh anăn bi kmhal djŏ mnuih djŏ klei soh. Phung ƀai năng ai mdrŏng sah hlăm sa wưng, ƀiădah klei Aê Diê kiă kriê lă lar, ba klei kpă ênô lă lar.
Si klei thâo săng kơ Krist srăng bi mklă klei hdĭp sa čô mnuih. Tơdah drei đăo kơ Khua Yang thâo, ƀuh, mđing hmư̆ leh anăn bi mtlaih mnuih arăng ngă jhat snăn drei srăng êđăp ênang ti anăp klei phung ƀai ngă jhat, lŏ dơ̆ng hdĭp kpă ênô, leh anăn răng mgang phung êdu awăt msĕ si Ama drei ti dlông adiê (êlan 17 – 18). Tơdah arăng ngă jhat kơ drei, Klei Aê Diê Blŭ srăng bi juh drei, Khua Yang amâo mâo êmưt ôh hlăm klei phat kđi. Brei drei gĭr,“Kyuadah msĕ si phung adiê dlông hĭn kơ lăn ala, snăn mơh êlan Kâo dlông hĭn kơ êlan diih, leh anăn klei kâo mĭn dlông hĭn kơ klei diih mĭn” (Y-Êsai 55:9).
Mtao Đawit kah mbha leh klei ñu găn leh hlăm klei hdĭp ñu pô snei: “Đăm rŭng răng ôh kyua phung ngă ƀai, kăn tluh kơ phung ngă klei soh rei. Amâo sui ôh diñu srăng dliu msĕ si rơ̆k, leh anăn krô msĕ si rơ̆k mtah. Knang bĕ kơ Yêhôwa leh anăn ngă klei jăk; dôk bĕ hlăm čar leh anăn hdĭp hŏng klei sĭt suôr Ñu” (Klei Mmuñ Hđăp 37:1-3).
Si drei wĭt ngă tơdah ƀuh klei ƀai msĕ si dưi hĭn hŏng klei jăk?
Wah lač: Ơ Khua Yang, mâo lu blư̆ mâo ƀuh Ih ti anôk kbưi snăk! Wăt tơdah snăn, Klei Aê Diê Blŭ mñă kâo hdơr Ih jing Pô thâo jih, thâo djăp mta klei, ƀuh grăp êa ală, hmư̆ djăp klei kwưh akâo phung arăng ktư̆ juă. Ih srăng ngă bruă hlue si mmông leh anăn hdră Ih. Akâo kơ Ih đru kâo đăo knang, gĭr dôk guôn, rông pô hŏng klei sĭt suôr mơ̆ng Ama hlăm adiê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 25
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
