Klei Aê Diê Blŭ: II Y-Pêtrôs 2:1-3
Êlan kliăng: “…Hŏng klei hgăm diñu srăng mtô mta klei đăo soh dưi bi rai, wăt hngah kơ Khua pô bi tui diñu, leh anăn diñu srăng bi truh kơ diñu pô klei bi rai djăl.”” (II Y-Pêtrôs 2:1b)
Klei êmuh ksiêm mĭn: Ti anôk mâo phung khua pô mtô soh leh anăn ya klei mtô diñu mtô? Si boh jhat mơ̆ng bruă mâo phung khua pô mtô soh leh anăn phung tui hlue srăng jing? Ya klei brei drei ngă čiăng đăm lĕ hlăm êlan soh čhuai phung khua mtô soh?
Khua Yang Yêsu tuôm lač leh kơ phung ƀĭng kna Ñu, hlăm Hruê knhal tuč srăng mâo lu phung khua pô hưn êlâo soh (Y-Mathiơ 24:11). Sĭt nik, phung khua pô hưn êlâo soh mâo leh hlăm phung ƀuôn sang, leh anăn Khua ƀĭng kna Y-Pêtrôs hưn brei răng ăt srăng mâo phung khua pô mtô soh hlăm ayŏng adei, hlăm Phung Sang Aê Diê. Phung khua pô mtô soh anei mgưt diñu pô jing dĭng buăl jăk klei mngač (II Kôrantô 11:14), čŏng hưn pô thâo Aê Diê, mtô klei sĭt nik. Khădah snăn Satan jing ama klei luar kyua anăn phung khua pô mtô soh ăt “srăng blŭ mčeh mă čiăng ƀơ̆ng ngăn diih…”. Ƀơ̆ng ngăn jing mă klei tŭ dưn kơ diñu pô, diñu mnia blei klei đăo kơ Krist čiăng mă klei tŭ dưn kơ pô (êlan 3), amâo uêñ kơ boh jhat kơ diñu pô leh anăn phung hmư̆ ôh.
Kyua klei tluh, phung khua pô mtô soh mtô “mta klei đăo soh dưi bi rai, wăt hngah kơ Khua pô bi tui diñu, leh anăn diñu srăng bi truh kơ diñu pô klei bi rai djăl” (êlan 1). Dŭm klei diñu mtô mdê mklăk hŏng klei hưn êlâo hlăm Klei Bi Mguôp Hđăp, mčeh klei mtô Khua Yang Yêsu leh anăn phung khua ƀĭng kna. Klei mtô amâo djŏ hŏng Klei Aê Diê Blŭ mơ̆ng phung khua pô mtô soh bi êdah diñu hngah kơ Aê Diê jing Pô bi mtlaih prŏng hĭn. Knhal tuč kơ diñu jing “srăng bi truh kơ diñu pô klei bi rai djăl”” (êlan 1). Ti anăp ală diñu, phung khua mtô soh mĭndah diñu tlaih leh mơ̆ng klei Aê Diê phat kđi, ƀiădah amâo hnưm snăn hnui, klei bi rai jing boh jhat klă sĭt kyua “mơ̆ng sui klei phat kđi mkra leh kơ diñu, leh anăn Pô bi rai diñu amâo pĭt ôh” (êlan 3). Hŏng phung hmư̆ klei phung khua mtô soh snăn amâo mdê ôh hŏng phung mŭt hlăm êlan prŏng ƀiădah knhal tuč êlan jing klei luč rai (Y-Mathiơ 7:13-14). Khua ƀĭng kna Y-Pêtrôs hưn brei răng: “Lu mnuih srăng tui hlue êlan klei knhông diñu, leh anăn kyua diñu arăng srăng blŭ jhat kơ êlan klei sĭt nik” (êlan 2), kyua phung khua pô mtô soh hdĭp knhông, bi êdah klei soh, ngă kơ arăng tlao mưč kơ Anăn Khua Yang.
Hruê anei, drei dôk tlă anăp hŏng lu klei mtô soh čhuai mơ̆ng phung klei đăo soh amâo sĭt kčưm đĭ čiăng mplư mnuih ƀuôn sang Aê Diê. Brei hdơr kơ Satan jing pô luar, yua phung khua pô mtô soh čiăng mplư lu mnuih. Phung đăo kơ Krist brei kriăng hriăm Klei Aê Diê Blŭ, knang kơ Yang Mngăt Jăk mtrang mngač čiăng răng hŏng phung amâo mă hlăm Klei Aê Diê Blŭ ƀiădah yua klei mĭn diñu pô čiăng mblang Klei Aê Diê Blŭ . Brei drei khut khat amâo sa ai hŏng phung hiu hưn, iêô mthưr ngă klei mdê hŏng klei sĭt nik Yang Mngăt Jăk bi êdah hlăm Klei Aê Diê Blŭ. Brei drei răng snăk, phung khua pô mtô soh rai luč snăn phung hmư̆, phung đăo leh anăn phung tui hlue diñu ăt srăng rai luč msĕ mơh, kyuadah “dưi mơ̆ sa čô mnuih bum ală atăt sa čô bum ală mkăn? Amâo djŏ hĕ jih diñu dua srăng lĕ hlăm ƀăng?” (Y-Luk 6:39).
Si drei dôk răng hŏng phung khua mtô soh?
Wah lač: Ơ Khua Yang, akâo kơ Ih đru kâo khăp hriăm Klei Aê Diê Blŭ čiăng thâo kơ Aê Diê lu hĭn. Akâo kơ Ih đru kâo amâo tui tiŏ ôh klei mtô soh hŏng klei kpă ênô leh anăn ñĕ đuĕ kbưi hŏng klei jhat ƀai. Kâo wah lač hlăm Anăn Khua Yang Yêsu Krist, Amen. Dlăng Klei Aê Diê Blŭ hlăm tlâo thŭn: Y-Yôp 24
Dlăng Klei Aê Diê Blŭ hlăm tlâo thŭn: Y-Yôp 24
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
