II Têsalônik 1:3-10
“Păng Sư gô ăn tơdrong gleh kơ lu bơngai pơm kơnê̆ kơ bơ̆n.”(II Têsalônik 1:6)
Nơ̆r jet tơchĕng pơwao:
– ‘Bok Pôl tơbăt tơdrong tơpăt kiơ wă pơlung Khul Bơngai Lui Têsalônik gah dôm tơdrong pơmat mă lu sư oei chu iŏk?
– Lu bơngai ưh kơ lui kơ Kră Yang gô pŭ phak thoi yơ?
– Tơdrong pơtrŭt wă kơ bơ̆n adrin chu iŏk pơmat yua kơ Anăn Kră Yang noh kiơ?
‘Bok Pôl bơnê kơ Kră Yang kơlih kơ lu bơngai lui tơ pơlei Têsalônik oei adrin tơpă hăm lui kơ Kră Yang kơjăp, mă đei tơdrong gleh, đe areh kơ lu sư (trong 3-4). Wă pơlung Khul bơngai lui, Sư tơbăt minh tơdrong tơpăt tơpă (trong 5-6). ‘Nâu ưh kơ sĭ minh tơdrong roi gah dôm tơdrong kiơ mă ‘Bok Kei-Dei gô pơm đĕch ôh mălei kư̆m pơma ‘bơm lăm dôm tơdrong mă Sư đei hloi mơ̆n. ‘Bok ‘lơ̆ng tơpăt dôm tơdrong kơnê̆ sư ưh kơ lê̆ đĕch ôh, mălei sĭt tơpă Sư gô sek tơlang tơdrong yoch (LĐ Êyiptơ 34:7; ‘Bok bơtho 3:17). Lu bơngai lui tơ pơlei Têsalônik oei tơ’bơ̆p tơdrong đe pơm kơnê̆, che bơle păng gleh pơmat yua kơ đon lui lu sư ‘bok Pôl khan hơđăl kơ lu sư khan Kră Yang ‘Bok Kei-Dei ‘lơ̆ng tơpăt, “Sư gô ăn tơdrong gleh kơ lu bơngai pơm kơnê̆ kơ bơ̆n.” (trong 6). ‘Nâu jơ̆ nơ̆r pơkă sĭt tơpă, Kră Yang ‘Bok Kei-Dei gô sek tơlang tơpăt, ưh kơ đei bơngai bu gơh sơngah (Rôm 3:19-20; Hơriso 143:2).
Tơdrong ‘lơ̆ng tơpăt ‘Bok Kei-Dei ling lang pơm hăm tơdrong ‘mêm mơnat. Dôm lu bơngai ưh kơ lui kơ Kră Yang gô dơ̆ng ‘bơ̆t anăp Kră Yang sek tơlang lu sư, na lu bơngai lui gô “pơdơh hiôk” kơplah năr Kră Yang Yêsu jur dơ̆ng (trong 7). Nơ̆r “pơdơh hiôk” ‘nâu wă khan huay kơ đei gleh, tơiung păng iŏk lê̆ pŭ trăp. Hăm lu bơngai lui kơ Kră Yang Yêsu, năr sek tơlang tuch luch ưh kơ trŏ kơ minh năr mă hli tơrơ, mălei ‘noh jơ̆ năr đon lui lu sư đei pơdah păng tơdrong pơmat lu sư đei ‘mong ăn đĭ. ‘Bok Pôl chih roi Kră Yang Yêsu jur dơ̆ng “yak lăm anê̆ ŭnh” hơdai hăm lu linh pran kơtang jang tơdrong Sư. ‘Bôh ‘lơ̆ng rŏ, ‘lơ̆ng rơgoh. ‘Noh bơih năr chơt hiôk pŭn hiôk kơ lu bơngai mă gơh ‘bôh pơtao ‘lơ̆ng rŏ mơsêh mơyang tơpă, mălei jơ̆ minh năr krưp dêh kơ lu bơngai sơngah kơ Tơdrong ‘Nao ‘Lơ̆ng. Tơdrong sek tơlang tơ’bôh tơdrong ‘lơ̆ng tơpăt Kră Yang ‘Bok Kei-Dei, tơdrong ‘lơ̆ng rŏ ‘măn ăn kơ lu bơngai gơh klaih tơ’bôh tơdrong ‘mêm mơnat Sư. ‘Bar tơdrong ‘noh tă tơ’bôh ăn tơdrong ‘lơ̆ng rơgoh păng tơ’bôh ăn tơdrong tơpăt Kră Yang.
Pơtrơp dơ̆ng, ‘bok Pôl pơma tơpăt minh nơ̆r hơmĕng tơpă: “Năr ‘noh kơnh bơih Sư jur tơ ala teh na đĭ đăng lu bơngai lui kơ Sư lăp ‘bôh Sư glêu kơ măt hloi hăm khan kơ Sư: “Bơnê kơ Ih”. Năr ei kơnh iĕm kư̆m khan bơnê kơ Sư hơdai hăm đĭ đăng bơngai lui mơ̆n kơlih kơ iĕm lui bơih kơ Tơdrong ‘Nao ‘Lơ̆ng Sư nhôn bơtho lu iĕm” (trong 10). ‘Nâu bơih tơm kăl năr sek tơlang tuch luch ‘măn kơ lu bơngai mă gơh klaih bơih, ưh kơ trŏ kơ hli tơrơ, mălei chơt hiôk dêh năr Kră Yang Yêsu jur, lu bơngai lui kơ Sư gô ưang păng bơnê kơkuh kơ Sư. Năr sek tơlang tuch luch ưh kơ trŏ khan tôch bơih ôh noh jơ̆ pơtơm tơdrong chơt hiôk ling lang hơdai hăm ‘bok mă dŏng pơklaih bơ̆n. Bơ̆n gô ‘bôh ‘Bok ‘lơ̆ng tơpăt sek tơlang tơpăt tơpă. ‘Noh bơih tơdrong pơtrŭt wă kơ bơ̆n adrin chu iŏk pơmat yua kơ Anăn Kră Yang.
Ơ Kră Yang, thim jơhngơ̆m pran ăn kơ inh kơplah đei tơdrong pơmat tat păng tơ’blŏk kơ inh ling lang ‘blŏk kơ Ih bơih ‘Bok ‘lơ̆ng tơpăt gô sek tơlang tơpăt lăm năr Kră Yang Yêsu jur dơ̆ng. Krao khan yua anăn Kră Yang Yêsu Krist, Amen!
Kơplah tơ’bơ̆p tơdrong pơlong lăng păng pơmat tat, bơ̆n hăm đei tơdrong pơlung đơ̆ng tơdrong ‘lơ̆ng tơpăt Kră Yang ưh?
Đŏk Sơ̆p Hla bơar ‘Bok Kei-Dei lăm pêng sơnăm: Esơra 9
Kênh Youtube BHKTHN:
