Klei Aê Diê Blŭ: I Kôrantô 6:1-8
Êlan kliăng: “Diih amâo thâo hĕ drei yơh srăng phat kđi phung dĭng buăl jăk Aê Diê? Kdlưn hĭn mơh, drei dưi phat kđi klei djŏ kơ klei hdĭp anei!” (I Kôrantô 6:3).
Klei êmuh ksiêm mĭn: Ya klei mâo hŏng phung đăo ti ƀuôn Kôrantô hlăm trăn Klei Aê Diê Blŭ hruê anei? Khua ƀĭng kna Y-Pôl mtô diñu si srăng ngă? Ya ngă klei anei ăt dôk mâo hlăm Phung Sang Aê Diê hruê anei?
Lŏ sa mta klei mơh brei ƀuh phung đăo ti ƀuôn Kôrantô dôk bi luč pral snăk klei msĭn hra diñu ti krah phung amâo đăo ôh, anăn jing klei mgaih mkra klei amâo bi djŏ. Phung đăo bi mâo klei amâo bi djŏ, amâo bi mgaih mra hdơ̆ng Phung Sang Aê Diê ôh ƀiădah nao mkra hlăm sang phat kđi. Phung Yuđa mâo klei bhiăn phat kđi đơ kđi mâo hdơ̆ng mnuih ƀuôn sang hlăm Sang Bi Kƀĭn diñu. Ƀiădah lĕ, phung Grek lač mbĭt, leh anăn phung ƀuôn Athen lač mdê mâo klei hing ang hlăm klei bi kčŭt kơ sang phat kđi. Leh anăn phung đăo ti ƀuôn Kôrantô dôk tŭ klei bi hmăi mơ̆ng klei anăn.
Hŏng lu klei êmuh amâo čiăng kơ klei lŏ wĭt lač ôh, “si ñu jhŏng brei phung amâo đăo phat kđi klei anăn, leh anăn amâo brei ôh phung doh jăk phat kđi?” (êlan 1), “leh anăn tơdah diih srăng phat kđi lăn ala, diih amâo dưi hĕ phat kđi klei đơ điêt?” (êlan 2),… Khua ƀĭng kna Y-Pôl bi êdah klă klei ñu mĭn kơ klei anei snei: Klei mâo hdơ̆ng ayŏng amai adei hlăm gŏ sang Khua Yang brei bi mkra mă hlăm gŏ sang hŏng klei čiăng bi grăng leh anăn ngă klei mtăp mđơr. Khua ƀĭng kna Y-Pôl hưn bi sĭt phung đăo mâo klei dưi – dưi ngă jăk bruă anei hŏng klei ñu bi êdah dua klei sĭt nik: Tal sa, phung doh jăk yơh srăng phat kđi lăn ala, snăn bruă điêt hĭn jing bruă phat kđi klei bi mneh msao, klei amâo bi djŏ aguah tlam jing bruă digơ̆ dưi ngă sơăi (êlan 2). Tal dua, phung doh jăk srăng phat kđi phung dĭng buăl jăk Aê Diê, mâo asei mlei myang, snăn bi bruă “klei hdĭp anei” ƀai êjai hĭn jing ênưih kơ digơ̆ (êlan 3). Hŏng ñu, Phung Sang Aê Diê amâo kƀah ôh mnuih mâo klei thâo mĭn čiăng phat brei kđi hdơ̆ng phung đăo hlăm Phung Sang Aê Diê (êlan 5). Ñu lač phung đăo bi kčŭt kơ sang phat kđi klei anăn jing “soh leh” amâodah “lĕ leh” (êlan 7). Măng ai hlei jing pô găl kđi, Anăn Khua Yang ăt čhŏ leh mơh, leh anăn knŏng yang jhat yơh jing pô dưi. Hlăm êlan 7 leh anăn êlan 8, ñu lač jăk hĭn drei pô tŭ klei arăng bi msoh hĭn hŏng klei drei pô ngă soh, čiăng lač bi čhŏ kơ Anăn Khua Yang.
Ênguôt snăk, hruê anei ăt dôk mâo lu klei amâo bi djŏ hdơ̆ng phung đăo ti krah Phung Sang Aê Diê, klei amâo bi djŏ hdơ̆ng ayŏng amai adei găp djuê phung đăo kơ Khua Yang, amâodah klei amâo bi djŏ hdơ̆ng Phung Sang Aê Diê, tăp năng ba klei anăn kơ knŭk kna mơh phat brei kđi. Tăp năng phung anei knŏng čiăng ngă djŏ tui si klei bhiăn kơ klei mtăp mđơr đuč, ƀiădah diñu wơr bĭt hĕ kơ sa mta klei yuôm hĭn, anăn jing, tơdah mgaih mkra msĕ snăn diñu bi luč leh klei khăp, klei pap brei tui si klei Khua Yang mtă leh. Khua ƀĭng kna Y-Pôl mtă jăk ƀiă tŭ klei luč liê mơh čiăng djă pioh klei êđăp ênang hdơ̆ng ayŏng amai adei klei anăn jing jăk hĭn. Khua Yang thâo jih leh anăn Ñu srăng lŏ bi hnô brei kơ drei.
Hŏng ya êlan drei khăng mgaih mkra klei amâo bi djŏ hdơ̆ng phung ayŏng amai adei hlăm klei đăo?
Wah lač: Ơ Khua Yang, hmei knŏng jing phung mnuih soh, amâo jing klă ênŭm ôh kyuanăn ăt mâo klei amâo bi djŏ hdơ̆ng hmei. Akâo Yang Mngăt Jăk mtrang mngač đru kâo mgaih mkra hĕ klei amâo bi djŏ hlăm klei bi mguôp hŏng phung ayŏng amai adei hlăm Khua Yang tui si hdră êlan čiăng kơ Anăn Khua Yang mâo klei guh kơang leh anăn kâo mâo klei bi mđĭ ai. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mmuñ hđăp 104
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
